Dijingunuinu Dia Bhana Kua Nzuá

Kioso poxolo Nzuá kia kexile mu kaleia mu kikolo kia Pátamo, Jezú ua mu londekesa 16 ia isuma mba jifikula ja lungu ni ima ia-nda bhita ku hádia. O isuma íii ia londekesa kiebhi o dijina dia Jihova a-nda di zelesa, kiebhi kia-nda kuiza o Utuminu uê ni kiebhi o vondadi iê kia-nda i bhanga bhoxi kala kiala ku i bhanga ku diulu.

Mu kisuma kimoxi, Nzuá ua mono Jihova ua xikama bhu kiandu kiê kia ungana ku diulu, a ki kondoloka kuala 24 a ikulakaji a te izuatu ia zele, o ku mitué iâ kuala itundu ia ulu. Bhu kiandu anga bhu tunda imuikinu ni jinzaji. O 24 ia ikulakaji a fukamena Jihova ni ku mu bheza. Mu kisuma kia mukuá, Nzuá ua mono mundu uavulu a mu bheza Jihova ene a tundu mu ifuxi ioso, miji ni madimi moso. O Kambudi Jezú, u kala mu a inga ni kua ambata katé bhuala o menha a muenhu. Mu kubhita thembu, mu kisuma kia mukuá, Nzuá ua mono Jezú ua mateka o kutumina kala Sobha ku diulu kumoxi ni 24 a ikulakaji. Mu kisuma kia mukuá, Nzuá ua mono Jezú ua mu bhânga ni kimudikixi mba Satanaji ni madimonho mê. Jezú ua a kaie ku diulu iu ua lundumuina mu ngongo.

Nzuá anga u mona o Kambudi ni 144.000 emana ku Mulundu ua Ziione. U mona ue anju ia mu bhita bhulu, ua mu tangela o athu phala kuxila Nzambi ni ku Mu bhana fuma.

Mu kisuma kia kaiela-ku, o ita ia Alumajedone i mateka. Mu ita ienioió, Jezú ni kifuxi kiê, a tolola o mundu uaiibha ua Satanaji. Mu kisuma kia sukina, Nzuá u mona kutululuka mu diulu ni mu ngongo. Satanaji ni madimonho mê anda ku a buikisa. Athu oso mu diulu ni mu ngongo a xila o dijina dia Jihova kuma dijina dikôla anga a mu bheza ngó muene.