DISÁ 29
Ihi Ibhita ni Muthu Kyoso Kyafwa?
O kwila wafundu kya ndandu ya kazola? Mu kudibhana ni maka ya abhonzo eye nange udibhwidisa: ‘Ihi ibhita ni muthu kyoso kyafwa? O kwila o athu ya utwazolo, kitwandakwamona dingi?’ Mu disá didi, ni mu disá dya kayela, twandamonamu o itambwijilu ya Bibidya iswinisa.
1. Ihi ibhita ni muthu kyoso kyafwa?
Jezú wasokesa o kalunga ni kilu kya zongo. O muthu wayi kukilu kya zongo katena kwijya ya mu bhita. O kalunga ka difwengo ni kilu mu ukexilu webhi? Kyoso muthu kyafwa, mwene kevu dingi ndolo, kadivu we ubheka. Kikale se wazolele kyavulu o makamba ni jindandu jê mba kana. O Bibidya yamba: “O yo afu kyá kejiya dingi kima kyoso-kyoso.”—Tanga Ndongixi 9:5.
2. O kwijiya o kidi kya lungu ni kufwa kutukwatekesa kyebhi?
Athu avulu ala ni wôma wakufwa, ala we ni wôma wamadifundu! Maji o kidi kya Bibidya kya lungu ni kufwa, kituximbakatesa. Jezú wambe: “O kidi anga ki mibhana ufôlo.” (Nzwá 8:32) Sayi jingeleja alongamu kwila, kyoso o muthu kyafwa utunda nzumbi. O nzumbi yiyi ikala kumwenyu mu kididi kyengi. Maji kikyene kilonga o Bibidya. Mu kiki, seku muthu utala hadi kyoso kyafwa. Kumbandu ya mukwa, o athu afu katena kutubhanga kya yibha, mukonda ene kejiya dingi kima. Kyenyiki, kitubhingi kukumbidila o ijila ya lungu ni madifundu, kala o kwasambela mba kwawikila jimvwela.
Sayi athu amba kwila atena kuzwela ni madifundu. Maji kiki kikola! Kala kitwamono, “o yó afu k’ejiya dingi kima kyoso-kyoso.” Kyoso muthu kya fika kwila wazwela ni kamba dyê mba ndandu yê wafu kya, mu kidi mwene wamuzwela ni madimonyo afikisa o dizwí dya muthu wafu kya. Mu kiki, kwijya o kidi kya lungu ni kufwa, kutulanga kumadimonyo. Jihova utudimuna mu kilwezu kya kusota kuzwela ni madifundu mukonda mwene wejiya kwila, kudilunga ni madimonyo, kilwezu kya dikota.—Tanga Matendelelu 18:10-12.
DILONGE DINGI
Ijiya ihi ibhita ni muthu kyoso kyafwa. Wandadilonga we kwila, o Nzambi ya henda Jihova, katena kutalesa hadi ku muthu wafu kya. Kiki kyandakolesa o kixikanu kyé kwa Nzambi yetu Jihova.
3. Dilonge o kidi kya lungu ni madifundu
O athu kumundu ala ni ixinganeku ki idifu ya lungu ni ihi ibhita kyoso kitufwa. Sayi ixinganeku ya kidi mwene, maji ya mukwa kana.
Mu dyembu mu watungu ihi ibanza o athu ya lungu ni ihi ibhita ni athu kyoso kyafwa?
Tumone ihi ilonga o Bibidya, tala OVIDYU.
Tanga Ndongixi 3:20, mukusuluka bhanga o ibhwidisu ya kayela:
Kala kitwamono mu velesu yiyi, ihi ibhita kyoso o muthu kyafwa?
O kwila o velesu yamba kwila, kyoso o muthu kyafwa utunda zumbi ikala kumwenyu mu kididi kyengi?
O Bibidya itutangela o musoso walungu ni kufwa kwa Lázalu kamba dya Jezú. Tanga Nzwá 11:11-14, tala ihi ya zwela Jezú ya lungu ni kyebhi kyexile Lázalu kyoso kyafu. Mukusuluka bhanga o ibhwidisu ya kayela:
Jezú wasokesa o kalunga ni ihi?
Kiki kitulonga ihi ya lungu ni ihi ibhita ni muthu kyoso kyafwa?
Kyebhi ki udivwa kyoso ki wivwa o ima ilonga o Bibidya ya lungu ni kufwa?
4. Kwijiya o kidi kya lungu ni kufwa kutukwatekesa kyavulu
Kwijiya o kidi kya lungu ni kufwa kutulanga kuwoma wamadifundu. Tanga Ndongixi 9:10, mukusuluka bhanga o kibhwidisu kya kayela:
O kwila o madifundu mba athu afu kya atena kutubhanga kya yibha?
Sayi athu abanza kwila, abhingi kukumbidila ijila phala kubhana kijingu kumadifundu kala o kwasambela ni kwawikila jimvwela. O kwijiya o kidi kya Bibidya kutulanga ku ijila yiyi. Tanga Izaya 8:19 ni Dijingunwinu 4:11, mukusuluka bhanga o kibhwidisu kya kayela:
Mudyé, kyebhi Jihova kya divwa kyoso o muthu kya sambela o madifundu mba kyoso kya sota o kikwatekesu kya muthu wafu kya?
O kidi kya lungu ni kufwa kutulanga ku ijila iluwalesa Jihova
5. Kwijiya o kidi kya lungu ni kufwa, kututululukisa
Athu avulu adilongo kwila kyoso kyandafwa andatala hadi mukonda dya ima ya yibha ya bhange. Maji tusanguluka mu kwijiya kwila, seku muthu utala hadi kyoso kyafwa, né mwene yó abhange ima ya ibha. Tanga Loma 6:7, mukusuluka bhanga o kibhwidisu kya kayela:
O Bibidya ilonga kwila, kyoso o muthu kyafwa, wajituka ku ituxi yê mba phala Nzambi, o ituxi yê yololoke. Mudyé, o kwila o muthu wafu kya utena kutala dingi hadi mukonda dya ituxi ya tele ande dya kufwa?
Kyoso ki udilonga dingi ya lungu ni Jihova, wandakwijiya kwila, o yó afu kya kandatala dingi hadi. O kixinganeku kya kwila o athu afu kya a atalesa hadi, kiluwalesa Jihova. Tanga Matendelelu 32:4 ni 1 Nzwá 4:8, mukusuluka bhanga o ibhwidisu ya kayela:
O kwila Nzambi wala ni idifwa kala itwatange mu jivelesu jiji? Utena kutalesa hadi kwa yó afu kya?
O kwila o kwijiya o kidi kya lungu ni yó afu kya, kukutululukisa? Mukonda dyahi?
ATHU AVULU AMBA: “Eme ngala ni wôma wahadi ingandatala kyoso kingandafwa.”
Jivelesu jebhi ja Bibidya jiweji tanga phala kukwatekesa muthu wala ni kibanzelu kiki?
IHI IWADILONGO
Kyoso muthu kyafwa, mwene kejiya dingi kima kyoso kyoso. O athu afu katale hadi katena we kubhanga kima kya yibha ku athu ala kumwenyu.
Kubhitulula
Ihi ibhita ni muthu kyoso kyafwa?
O kwijiya o kidi kya lungu ni kufwa kutukwatekesa kyebhi?
Mukonda dyahi o kwijiya o kidi kya lungu ni kufwa kututululukisa?
TOKWESA DINGI
Tala se o Bibidya ilonga kwila sayiku “nzumbi” itunda kumukutu wamuthu ikala kumwenyu mu kididi kyengi kyoso o muthu kyafwa.
Sota kwijiya se Nzambi ukastikala o athu ayibha.
O Kwila Kwene Mwene Infernu Mwene mu Jokotesa o Athu? (3:07)
O kwila twabhingi kukala ni wôma wamadifundu?
Tala o musoso wadiyala watululuka kyoso kya dilongo o kidi kya lungu ni ihi ibhita ni athu kyoso kyafwa.