Kiebhi ki tu Tena ku Kala tu Jikidistá ja Kidi ni ku Kala tu Athu Ambote

IMA iiadi iahi ia bhange Jezú mu ukunji uê? Kia dianga Jezú ua lungulula o ukexilu ua athu, maji ka bhange kiki mu ku di ta mu maka a jinguvulu. Mu kifika, ejiia se ihi ia longo Jezú mu diskursu dia bhange ku Mulundu. Ande dia Jezú kuzuela kuila o akaiedi’ê a tokalele ku kala kála móngua, ni mukengeji, muéne ua zuela ku jingivuidi jê kuila o ku zediua kua kidi kua tokala ku “jingadiama ja muxima,” iu uambe dingi: “A zediua alenduka, . . . a zela o muxima, . . . akua ku luulula.” (Matesu 5:1-11) Jezú ua kuatekesa o akaiedi’ê kuijiia o valolo ia ku lungulula o ibanzelu iâ, ni itumu ia Nzambi mu kuijiia o ima ia uabha ni ia iibha, ni ku sidivila Nzambi ni muxima uoso.

Kaiiadi, kioso Jezú kia kexile mu mona o jiphaxi ja athu, o henda iê ia mu bhangesa ku sosola o jiphaxi jâ. Maji o ku zubha o hadi ioso, ki kexile o kima kia dianga. (Matesu 20:30-34) Muéne ua sake athu a kate, maji ka bhuisa o mauhaxi. (Luka 6:17-19) Muéne ua kuatekesa o athu akexile mu a zukutisa, maji athu akexile hanji mu tala o hadi, mukonda dia ku kamba o kufundisa. Ua bhana kudia ku athu akexile ni nzala, maji o nzala ia kexile hanji mu jibha athu avulu.—Marku 6:41-44.

Ua Lungulula o Ibanzelu ia athu, iu ua Sosola o Hadi

Mukonda diahi Jezú ua thandanganhele dingi mu ku lungulula o ibanzelu ia athu, ni ku sosola o hadi, ka thandanganhele ni ku lungulula o jinguvulu, mba ku bhuisa o hadi? Jezú uejidile kuila Nzambi ua xindile o kithangana kiê, kia kuila o Utuminu Uê uene ua-nda buika o jinguvulu joso, ni ku bhuisa o ima i bheka o hadi ioso. (Luka 4:43; 8:1) Mukonda dia kiki, kioso o maxibulu kia bhingi kua Jezú n’a kale dingi ni kithangana kia ku saka a kate, Jezú ua ambela: ‘Tuienu kuengi, ku jisanzala ja mukuá, nga ka tange-ku maka; kuma kiene kia ngi bheka.’ (Marku 1:32-38) Jezú ua kuatekesa athu avulu a bhindamene, maji o kikalakalu kia dianga o ku bhanga, o ku boka, ni ku longa o maka a Nzambi.

Lelu kioso o Jimbangi ja Jihova kiaia mu boka, ene a kaiela o phangu ia Jezú. Ene a sosola o hadi ia athu a mu tala hadi ni ku a kuatekesa. Maji o jimbangi ja Jihova ka bhange ioso phala ku bhuisa o ku kamba o kufundisa kuene ku mundu. Ene a dielela kuila o Utuminu ua Nzambi, uene ngó ua-nda bhuisa o ima ioso iene mu bheka o hadi ioso. (Matesu 6:10) Kála kia bhange Jezú, ene a bhanga ioso phala ku lungulula o ibanzelu ia athu, maji ka di te mu isangela ia jinguvulu. Iú uene o ukexilu ua tokala mukonda o maka a dikota a athu ko jinguvulu, maji o ukexilu ua athu.

Athu Ambote

O Jimbangi ja Jihova a xikina kuila ene a tokala ku kala athu ambote. Mukonda dia kiki, ene a belesela, a xila o jinguvulu. Bhu kaxi ka madivulu mâ, ni kikalakalu kiâ kia ku boka, a suínisa o ji vizinhu jâ ku belesela o itumu ia jinguvulu. Maji kioso o jinguvulu kia tumina ku bhanga kima kio fidise kua Nzambi, ene ka xikina. Ene a “tumaka Nzambi, kana athu.”—Ikalakalu 5:29; Loma 13:1-7.

O Jimbangi ja Jihova a kunda o jivizinhu jâ, phala ku a longa o Bibidia. Mukonda dia ku a longa, kuene mazunda ni mazunda a athu, ene mu a kuatekesa kueha o ifua ia iibha, kála o ku xibha makanha, o kúnua kiavulu, ku xibha diamba, ku jokala ji joko ja ku nganhala kitadi, ni undumbu. Ene a kala athu ambote, mukonda a kumbidila o itumu ia Bibidia ku mienhu iâ.—Tanga o mbandu iambe: “A Bíblia Muda a Vida das Pessoas” mu mbandu ia 18, mu kadivulu kaka mu phutu.

O milongi ia Bibidia i kuatekesa ué o miji ku di xila mudiâ, ni ku di zuelesa kiambote—ki kale o makaza, o jitata, ni tuana. O ku di zuelesa ku muiji ku suínisa o ukamba ku muiji. O miji a suína kiambote, a suínisa ué o ukamba mu sanzala.

Mu ku bhitulula o jipondo joso ji tua di longo mu milongi íii, ihi i u banza: O kuila o Bibidia i longa kuma o jingeleja a tokala ku kala ni ukamba ni jinguvulu? Kana. O kuila o Jikidistá ja kidi a tokala muene ku kala athu ambote? A tokala. Maji kiebhi ene kia tena ku bhanga kiki? Mu ku kaiela o itumu ia Jezú ia ku kala kála móngua, ni ku kala kála mukengeji ua mundu.

Athu oso a kumbidila o itendelesu ia Kristu, a-nda katula mbote ku mienhu iâ, ni ua muiji uâ—ni ku a ximana mu diembu mua tungu. O Jimbangi ja Jihova mu diembu diê a-nda sanguluka kiavulu ku ku longa o Bibidia, kála ki uene mu a mona ku longa mu diembu diê.a

[Tanga mu luji]

[Kilombuelelu ku mbandu 7]

Jezú ua lungulula o ibanzelu ia athu, maji ka di te mu isangela ia jinguvulu

[Kilombuelelu ku mbandu 8]

O Jimbangi ja Jihova ejiia kuila ene a tokala ku kala athu ambote