O Kuila Tua Tokala ku Dielela ku Jingeleja mu Maka Alungu ni Kitadi?

Esterea ua kexile múia ni an’ê izuua ioso mu ngeleja. Muéne uambe: “Nga bhingi ku mukunji uetu phala ku ngi longa o Bibidia.” Maji o mukunji ka xikina ku mu longa o Bibidia. Kienhiki, Estere ka kexile dingi múia mu ngeleja. Muéne uambe dingi: “O mukunji ua soneka kuila se ki ngi mesenene dingi kuia mu ngeleja, nga tokalele ngó ku tumikisa o kitadi. Eme nga banze, ‘ene ka mesena kuijiia se ihi ia mu ngi bhangesa ku fonga mu ngeleja; a mesena ngó o kitadi kiami.’”

Angelina, uene múia mu ngeleja tundé mu undenge, uambe: “Mu ngeleja iami, ene akexile mu bhitisa o ngalu veji jitatu mu kiônge kiâ, ia a mesenene kuila tu ta-mu kitadi mu veji joso ji bhita. Ene akexile mu bhinga jinga kitadi. Eme nga banze: ‘Ene kala ni nzumbi ia Nzambi.’”

O kuila o jingeleja mu diembu diê, jene mu bhinga mba mu jijidika o athu ku bhana kitadi? O kuila kiene ki longa o Bibidia?

IHI I LONGA O BIBIDIA?

Jezú, ua mateka o kilunga kia Ukidistá, uambe: ‘Mua tambula sé ku futa, bhanenu ué sé ku bhinga kitadi.’ (Matesu 10:8) O Mak’â Nzambi, ka tokala ku a sumbisa, a tokala ku a longa ku athu oso a mesena.

Kiebhi o Jikidistá ja dianga, kia kexile mu sumba o imbamba?

Kala muthu, ua kexile mu bhanga ‘kala kia mu kexile ku muxima uê, ka bhanene ni ku luuala, mba mu ku mu jijidika. Mukonda Nzambi ua zolo mukua ku bhana ni ngalasa ioso.’ (2 Kolindu 9:7) O poxolo Phaulu uambe: “Kioso ki tua mi tudila o Njimbu Iambote ia Nzambi, tua kalakala muanha ni usuku phala kana muthu mudienu tu mu nemena.” (1 Tesalonika 2:9) Phaulu ua kexile mu tunga jibalaka phala ku di dikila mu ukunji uê.—Ikalakalu 18:2, 3.

KIEBHI O JIMBANGI JA JIHOVA, KIENE MU DIKILA O IBHINDAMU IÂ?

O Jimbangi ja Jihova, ene mu diongeka mu ididi a ixana Kididi kia Ubhezelu. Kuebhi kuene mu tunda o kitadi? Ene kene mu bhitisa ngalu phala o athu ku ta-mu kitadi; né ku tumikisa kivilope mu ku bhinga dijimu. Mu veji dia kiki, uoso ua uabhela o milongi iu ua mesena ku sangela kitadi, u tena ku ta mu kaxa kene mu kala mu Kididi kia Ubhezelu.

Phala ku bhanga o kadivulu kaka ni ku ka tumikisa, ku bhinga kitadi. Maji, nuka ua-nda kuívua ngolokela ia ku bhinga kitadi. O kiala-ku, o ku tula o kidi kia Bibidia mu ididi ioso.

Mudiê, o kuila o ukexilu iú ua lungu ni izuelu ia Jezú ni phangu ia tu xila o Jikidistá ja dianga?