Kana Ku ‘Tatela Jihova’

1, 2. Mukonda diahi ki tu tokala ku tatela Jihova mukonda dia maka ene mu bhita mu ixi? Bhana kifika.

XINGANEKA kuila u diiala ua sanguluka mu ukaza ué mu mivu iavulu. Maji saí kizuua u vutuka ku bhata u sanga ima ioso io zange. O ima ioso m’onzo a i bulu, o malonga o tutujule, o tapete a i zange, ka tena dingi ku i iudika. O inzo iê ia valolo ia kituka kála kididi mua bhiti kibuika. O kuila ueji kuibhula: “Mukonda diahi o muhatu’ami ua bhange kiki?” Anga ueji kuibhula: “Nanhi ua bhange kiki?” Sé phata, ueji bhanga o kibhuidisu kia kaiadi. Mukonda diahi? Mukonda eie uejiia kuila o kaza diê dia kazola, keji tena ku bhanga o kima kiki kia iibha.

² Lelu etu tua mu mona o ixi ietu kuizala ni ixete, usuéia, ni undumbu. Etu tua mu di longa o Bibidia, tuijiia kuila Jihova ki muéne uene mu bheka o maka enhá. Muéne ua bhange o ixi phala ku kala palaízu ia iuka. (Dim. 2:8, 15) Jihova, Nzambi ia henda. (1 Nzu. 4:8) O ku di longa o Bibidia, kua tu kuatekesa kuijiia kuebhi kuene mu tunda o maka ene mu ngongo. Ki muthu uéngi uene mu bheka o maka, maji Satanaji o Diabhu, “o sobha ia mu tumina mu ngong’umu.”—Nzuá 14:30; 2 Kol. 4:4.

3. Kiebhi ki tu tena ku kamba ku xinganeka kiambote?

³ Maji ki tu tokala ku tatela Satanaji o maka oso u tu bhita nau. Mukonda diahi ki tu tokala ku bhanga kiki? Mukonda saí maka u tu bhita nau, ejila mu ku kamba unjimu. (Tanga Matendelelu 32:4-6.) Né muene se tu xikina o kidi kiki, maji o ukexilu uetu ua ituxi u tena ku tu fidisa ku xinganeka kiambote kioso ki tu kala ni maka, ni ku tuambata mu njila i tu bhekela ibhidi. (Jisa. 14:12) Kiebhi ki tena o ku bhita? Mu veji dia ku di tatela mba ku tatela Satanaji, tu tena ku mateka ku tatela Jihova. Nange tu kala ‘ni njinda ia Jihova.’—Jisa. 19:3.

4, 5. Kiebhi o Kidistá kia tena ku kala ‘ni njinda ia Jihova?’

⁴ O kuila tu tena muene ku kala ‘ni njinda ia Jihova?’ Ki tu katula mbote mu ku kala ni njinda ia Jihova. (Iza. 41:11) Ihi i tueji kingila? Saí diiala dia unjimu uambele kiki: “O lukuaku luê lua butu phala ku bhana ndumbi kua Nzambi.” Etu ki tu tokala kuzuela kuila tuala ni njinda ia Jihova. Maji o divulu dia jisabhu 19:3 dizuela, o kutobha kua muthu ‘kuene ku mu bhangesa o njila iê ku bhengalala; o ku muxima uê-phe, u tatela Jihova.’ O muthu u tena ku kala ni njinda ia Nzambi ku muxima ué. O muthu u tena kulondekesa o ukexilu iú mu kasuekelu. O muthu u tena ku kolokota ku kala ni njinda ia Jihova. Mukonda dia kiki o muthu iú u tena ku xisa o kilunga, mba ku kamba ku belesela o itendelesu ia lungu ni ubhezelu ua Jihova.

⁵ Ihi i tena ku tu bhangesa ku kala ‘ni njinda ia Jihova?’ Ihi i tua tokala o ku bhanga phala ki tu di bhale mu kibhetu kiki? Kima kiambote kuijiia o kidi kia ibhuidisu íii. Mukonda diahi tua tokala ku langa o ukamba uetu ni Jihova!

IHI I TENA KU TU BHANGESA KU ‘TATELA JIHOVA?’

6, 7. Mukonda diahi o akua Izalaiele mu izuua ia Mozé, a mateka ku longolola Jihova?

⁶ Ihi ieji bhangesa o muxima ua selevende ia fiiele ia Jihova ku mateka ku longolola Nzambi iê? Tu di longe ima itanu, ni tu xinganeke mu phangu ia Bibidia ilondekesa kiebhi mu ukulu saí athu a di bhalele mu kibhetu kiki.—1 Kol. 10:11, 12.

⁷ O izuelu ia athu a mukuá i tena ku tu zozesa. (Tanga Matendelelu 1:26-28.) O akua Izalaiele a a bhuluile ku ubhika mu Ijitu. Jihova ua tumikisine o dikuinhi dia mabhebhu ku akua Ijitu, mu kusuka-ku, ua buika Falaó ni masoladi mê mu Kalunga Kakusuka. (Mak. 12:29-32, 51; 14:29-31; Jisá. 136:15) O mundu ua Nzambi ua kexile polondo phala ku bokona mu Ixi ia Kanana. Maji né muene ni madiuanu a mono, o akua Izalaiele a mateka ku longolola Jihova. Ihi ia bhangesa ku kamba o kixikanu? Ene akexile ni uôma, mukonda dia izuelu ia iibha ia alondi endele mu londa o ixi. (Dia. 14:1-4) Ihi ia bhiti? O kifuxi kioso ka kiehela ku bokona mu ‘ixi ia uabha.’ (Mate. 1:34, 35) O kuila tu tena kuehela o izuelu ia akuetu ku zozesa o kixikanu kietu, ni ku tu bhangesa ku longolola o ukexilu ua Jihova ua kuendesa o mundu uê?

8. Ihi ia bhangesa o mundu ua Nzambi mu izuua ia Izaia ku mateka ku longolola Jihova, mukonda dia maka akexile mu bhita nau?

⁸ O mabhebhu ni ibhidi i tena ku tu zozesa. (Tanga Izaia 8:21, 22.) Mu izuua ia Izaia, o akua Judá akexile mu tala hadi. Ene akexile ni jinguma javulu. Kua kexile nzala iavulu. Athu avulu akexile ni nzala. Maji o nzala mu nzumbi iene ia betele-kota. (Amo. 8:11) Mu veji dia ku bhinga o kikuatekesu kia Jihova, mu ku bhita mu maka enhá, ene a mateka ku “lebhula” sobha iâ muéne ué Nzambi iâ. Kienhiki ene a tatela Jihova mu maka akexile mu bhita nau. Se tua kexile mu bhita ni maka, o kuila tueji zuela ué ku muxima ietu, ‘Kuebhi kua kexile Jihova kioso ki nga bhindamene o kikuatekesu kiê?’

9. Mukonda diahi o akua Izalaiele mu izuua ia Izekiiele, ka kexile mu mona o ima mu ukexilu uambote?

⁹ Ki tuijiia kiambote o maka oso. Mukonda dia ku kamba kuijiia kiambote o maka, o akua Izalaiele mu izuua ia Izekiiele, a monene kuila o njila ia Jihova “ki i iuka.” (Ize. 18:29) Ene akexile mu fundisa Nzambi, mu kulondekesa kuila, ene a betele kuijiia ku batula o maka, sumbala ene kejidile o maka oso akexile mu bhita. Se saí ithangana ki tu tendela kiambote o itumu ia Bibidia, mba o izulukutu i bhita ku muenhu uetu, o kuila ku mixima ietu tueji xinganeka kuila o ukexilu ua Jihova ua ku bhanga o ima ‘ki u iuka?’—Jobe 35:2.

10. Kiebhi o muthu kia tena ku kaiela o phangu ia iibha ia Adá?

¹⁰ Ki tu xikina kuila tua té kituxi mba tua bhange ima ia iibha. Ku dimatekenu dia mundu, Adá ua tatela Nzambi kioso kia te o kituxi. (Dim. 3:12) Sumbala Adá uejidile kiambote o ibhidi ieji kuijila mu ku bhukumukina o itumu ia Nzambi, né kiki muéne ua solo ku mu bhukumukina, anga u tatela Jihova. Mu kidi, muéne ua kexile mu zuela kuila Jihova ka mu bhana muhatu uambote. Tundé o kithangana kieniókio, o athu a kaiela o phangu ia Adá ia ku tatela Nzambi, kioso kia tá kituxi. Kima kiambote se tu di ebhuidisa: ‘O kuila o ibhidi ijila mu ituxi i tu ta, i tu bhangesa ku banza kuila o itumu ia Jihova ki i iuka?’

11. Ihi i tu longa o musoso ua Jona?

¹¹ Tu kala mu di banza ngó mudietu. O polofeta Jona ua thandanganhele ni kulenduka kua Jihova kua lungu ni akua Ninive. (Jona 4:1-3) Mukonda diahi? Muéne ua thandanganhele kiavulu ni ihi ieji mu zuela o athu, se o mbanza ia Ninive ka i buikile. Jona uehela o kibanzelu kiki ku beta-kota, o ku kala ni henda ia athu a mbanza ia Ninive ndenge. O kuila etu ué tu tena ku mateka ku di banza ngó mudietu, ni ku kala ni ‘njinda ia Jihova,’ mukonda ka mu bheka luua o dizubhilu? Se tua mu boka kiá ithangana iavulu kuila o kizuua kia Jihova kia zukama, tueji mateka ku tatela Jihova, kioso kia tu xonguena ku athu mukonda dia kuboka o njimbu iambote?—2 Phe. 3:3, 4, 9.

IHI I TUA TOKALA O KU BHANGA PHALA KI TU ‘TATELE JIHOVA’

12, 13. Se tu mateka ku kala ni phata ia ima i bhanga Jihova ku muxima uetu, ihi i tua tokala o ku bhanga?

¹² Ihi i tua tokala ku bhanga se ku muxima uetu tu mateka ku kala ni phata ia ima i bhanga Jihova? Lembalala kuila ki unjimu o ku banza kiki. O Mikanda Ikôla izuela mu divulu dia Jisabhu 19:3 kuila: ‘O kutobha kua muthu, kuene ku bhangesa o njila iê ku bhengalala; o ku muxima uê-phe, u tatela Jihova.’ Mu kuijiia o kidi kiki, tua-nda di longa ima itanu ia-nda tu fidisa kuehela kuila o ibhidi ietu ku muenhu i tu bhangesa ku tatela Jihova.

¹³ Kolokota o ku suínisa o ukamba uê ni Jihova. Tu tena kueha o ukexilu ua ituxi ua ku kala ni njinda ia Nzambi se tu suínisa o ukamba uetu ni muéne. (Tanga Jisabhu 3:5, 6.) Tua tokala ku dielela kua Jihova. Ki tu tokala ué ku dielela o unjimu uetu, mba ku di banza ngó mudietu. (Jisa. 3:7; Ndo. 7:16) Se tu banza kiki, kia-nda tu fidisa ku tatela Jihova kioso ki tu kala ni ibhidi ku muenhu uetu.

14, 15. Ihi ia-nda tu fidisa ku kaiela o izuelu ia iibha ia kuetu?

¹⁴ Kana kuehela kuila o izuelu ia iibha ia athu i ku zozesa. O akua Izalaiele mu izuua ia Mozé, a monene ima iavulu ia tokalele ku a bhana kidielelu, kuila Jihova ueji ku a kuatekesa ku bokona mu Ixi ia Kanana. (Jisá. 78:43-53) Maji kioso kiévu o izuelu ia dikuinhi dia alondi a kambele o kixikanu, ene ka “lembalala dingi o nguzu ia lukuaku luê.” (Jisá. 78:42) Se tu xinganeka mu ibhangelu ia Jihova ni ku xinganeka o ima ioso ia mbote iene mu tu bhangela, tua-nda suínisa o ukamba uetu ni muéne. Mukonda dia kiki, ki tua-nda kuehela kuila o izuelu ia iibha ia akuetu i tu sondolokesa kua Jihova.—Jisá. 77:11, 12.

¹⁵ Se tu kala ué ni ibanzelu ia iibha ia lungu ni jiphange jetu? Se tu kala ni ukexilu iú, o ukamba uetu ni Jihova tua-nda u zanga. (1 Nzu. 4:20) Kioso o akua Izalaiele kia kexile mu longolola o kikalakalu kia Ala, Jihova uambe kuila ene akexile ku mu longolola Muéne. (Dia. 17:10) Kiene kimoxi, ué se tu mateka ku longolola o jiphange ala ku pholo mu kuendesa o kilunga kia Jihova mu ixi, kia difuangana kála tua mu longolola Jihova.—Jihe. 13:7, 17.

16, 17. Ihi i tua tokala ku lembalala kioso ki tu kala ni maka?

¹⁶ Lembalala kuila Jihova ki muéne uene mu tu bhekela o maka. Sumbala o akua Izalaiele mu izuua ia Izaia a bhukumukine Jihova, maji né kiki, Muéne ua mesenene hanji ku a kuatekesa. (Iza. 1:16-19) Kabasa maka u tu bhita nau, tu tena ku tululuka mu kuijiia kuila Jihova u tu langa, ni kuila ua mesena ku tu kuatekesa. (1 Phe. 5:7) Mu kidi, muéne u tu kanena ku tu bhana nguzu phala tu kolokote.—1 Kol. 10:13.

¹⁷ Se a mu tu bhanga kia iibha—kála kia bhitile ni Jobe, o diiala dia kixikanu—tua tokala ku lembalala kuila Jihova ki muéne ua mu tu bhanga kia iibha. Jihova ua zemba o ku kamba ku batula mu kidi; ua zola o kufundisa. (Jisá. 33:5) Tu tena ku xikina kála kia bhange o dikamba dia Jobe, Edihu, kioso kiambe: “Kuma Nzambi ka tena kubhanga kia ibha! o Muteni-a-Ioso ka tena kubhanga mangonha!” (Jobe 34:10) Mu veji dia ku tu bhekela maka, Jihova u tu bhana “o ujitu uambote u tu tambula, ni uhete uauabha.”—Tiia. 1:13, 17.

18, 19. Mukonda diahi ki tu tokala ku kala ni phata ia Jihova? Bhana kifika.

¹⁸ Kana ku kala ni phata ia Jihova. Nzambi ki mukua kituxi, o ibanzelu iê ia beta-kota, ki i sokela ni ibanzelu ietu. (Iza. 55:8, 9) Mu kiki, o ku lenduka kuetu, kuene kua-nda tu bhangesa ku xikina kuila ki tu tena kuijiia o ima ioso i bhita. (Loma 9:20) Saí ithangana ki tuijiia o ima ioso ia mu bhita. Sé phata eie ua mono kiá o kidi kia izuelu íii: ‘Muthu kia kuata ku diba diê, u di mona kulunga; katé mukuá kiéza anga u mu tukulula o kidi.’—Jisa. 18:17.

¹⁹ Se kamba dietu tuene kiá mu mu dielela, n’a bhange kima ki tu ki tendela mba tu mona kuila ua bhange kima kia iibha, o kuila tua-nda mu tatela ni lusolo? Anga tua-nda muehela katé kia tu londekesa o kidi, bhenge-bhenge se muthu iú tua muijiia ukulu? Se tu bhanga kiki ku kamba dietu ni henda ioso, ki tu tokala ué ku dielela Tata ietu ia diulu, uene ni ibanzelu ia beta-kota!

20, 21. Mukonda diahi tua tokala ku lembalala nanhi uene mu tu bhekela o maka?

²⁰ Lembalala se nanhi uene mu tu bhekela o maka. Mukonda diahi tua tokala ku bhanga kiki? Mukonda saí ithangana, etu muene tu di bhekela o maka. Se etu tua mu di bhekela o maka, tua tokala tu xikina o kidi kiki. (Nga. 6:7) Kana ku tatela Jihova, mu maka u bhita nau. Mukonda diahi ki kima kiambote ku mu tatela? Xinganeka mu phangu íii: O dikalu di tena kuenda lusolo luavulu, maji xinganeka kuila o muendexi u di endesa kiavulu, muéne ka kaiela o itendelesu, ni lusolo luoso, u bhita nadiu mu jinjila ja iibha, anga u di bunda nadiu ku matadi. O kuila a tokala ku tatela o muthu ua bhange o dikalu? Kana! Kiene kimoxi ué, Jihova ua tu bhange ni ufôlo, maji muéne ua tu bhana ué itendelesu phala tu tene ku sola ni unjimu. Mukonda diahi-phe tueji tatela o Mubhangi uetu kioso ki tu lueza?

²¹ Tuijiia kuila ko maka oso u tu bhita nau, ijila mukonda dia ima ia iibha i tu bhanga. Saí izulukutu i bhita ku muenhu uetu, ijila mukonda dia ‘ima i bhita se ku i kingila.’ (Ndo. 9:11) Ki tu tokala ku jimba kuila Satanaji o Diabhu muéne ua dianga ku bheka o maka oso mu ngongo. (1 Nzu. 5:19; Dij. 12:9) Muéne o nguma ia dikota—ki Jihova kana!—1 Phe. 5:8.

LANGA KIAMBOTE O UKAMBA UÊ NI JIHOVA

22, 23. Ihi i tua tokala ku lembalala se o maka metu a mu tu zozesa?

²² Kioso ki ua mu bhita ni maka, xinganeka o phangu ia Josuué ni Kalebe. O maiala enhá exile akua kixikinu, ka sokele ni dikuinhi dia alondi a bhekele o njimbu ia iibha, ene a bhekele njimbu iambote. (Dia. 14:6-9) Ene a londekesele kixikanu kua Jihova. Né kiki, ene a nhungana ué kumoxi ni akua Izalaiele ni akuâ, mu kikangalakata mu 40 a mivu. O kuila Josuué ni Kalebe akexile mu longolola mba ku tatela Jihova, mu ku xinganeka kuila muéne ua kexile mu ku a bhanga kia iibha? Kana. Ene a dielela kua Jihova. O kuila a a besoala? Sé phata! Maji o akua Izalaiele oso a fuila mu kikangalakata, o kiiadi kiki, kia bokona mu Ixi ia Kanana. (Dia. 14:30) Kiene kimoxi ué, tua-nda tambula ngó o mabesá a Jihova, se tu kamba “kubhuila” mu ku bhanga o vondadi iê.—Nga. 6:9; Jihe. 6:10.

²³ Se ua mu bhuila mukonda dia maka mba ituxi ia akuenu mba mukonda dia ituxi iê, ihi i ua tokala o ku bhanga? Xinganeka mu ídifua iambote ia Jihova. Xinganeka mu ima iambote ia ku kanena Jihova. Dibhuidise: “Kuebhi ku ngeji kala sé Jihova? Kolokota ku naminina kua Jihova, kana kuehela o muxima uê ku mu tatela!