O “Drama Eureka” ia Kuatekesa athu Avulu Kuijiia o Kidi Kia Bibidia

“EUREKA!” Kizuelu kilombolola kuila, “nga ki sange!” Mu hama ia 19, mu mbanza ia Califórnia, mu ixi ia Estados Unidos da América, mu kithangana kia sota o ulu, o akua ku sota, akexile ku di kola “Eureka”, kioso ene kia kexile mu sanga o ulu. Maji Charles Taze Russell ni adilongi a mukuá a Bibidia, a sangele kima kia betele kota mu valolo o ulu ndenge, o kima kiki, o kidi kia Bibidia. Ene a mesenene kiavulu ku longa o kidi kiki ku akuâ.

Ku muvu ua 1914, mu thembu ia nvula athu avulu, mu jimbanza ja makota a monene o “Fotodrama da Criação,” o filme íii ia bhangele 8 dia ji ola, ia tokalele ku Associação Internacional dos Estudantes da Bíblia (I.B.S.A.). O filme íii ia jimbulula ku athu, o musoso ua Bibidia tundé Nzambi kia mateka ku bhanga o ima, katé ku utuminu ua midi ia mivu ia Jezú Kristu. O filme ia kexile ni ji foto ja fuamene akexile mu ji bhitisa, ni izuelu iambote ni mimbu io iudike kiambote.—Dij. 20:4.a

Maji, ihi i tuamba ia lungu ni ió a tungu ku maxokololo mba ió a tungu mu ji sanzala jo fele? Phala ki ku kambe muthu kuívua o milongi ia Bibidia, mu mbeji ia kakuinhi ka muvu ua 1914, o adilongi a Bibidia a iudika o “Drama Eureka” ia londekesele jimbandu ja filme “Fotodrama.” Kua kexile maukexilu atatu a ji drama, a ji iudika mu madimi avulu: O Drama “Eureka X,” iexile ngó milongi io ngalavale ni muimbu. O Drama “Eureka Y,” ia kexile ni jimbandu joso ni ji foto jo iudikile kiambote. O “Drama Eureka Familia,” a i bhangele phala ku i mona ku mabhata, ia kexile ni milongi io ngalavale ni mimbu. O ji drama jiji, ja kexile ni falamenda ia kexile mu kuatekesa phala ku ji londekesa.

Né muene sé o mitelembe ia katunda, ni ji falamenda ja mukuá, o Adilongi a Bibidia a tenene ku londekesa o ji drama jiji katé muene ni ku maxokololo, mu ku boka o njimbu ia Utuminu mu ji mbambe ja mukuá. O Drama “Eureka X,” iexile milongi io ngalavale, a tena ku i xika mu muanha mba mu usuku, sê mukola ua mu kengeji. O Drama “Eureka Y,” a tena ku i londekesa, né muene, se kuala mukengeji, kabasa se kua kexile kimuikinu. Saí milongi mu Mulangidi mu dimi dia akua Finlândia iambe “etu tu tena kulondekesa o ji foto jiji mu kididi kioso-kioso.” Kiki, kidi muéne!”

Mu veji dia ku lukalesa ididi ia makota phala ku londekesa o ji drama, o Adilongi a Bibidia akexile mu sota o ji xikola, ididi ia ku fundisa, ididi ia ku kuata komboio mba ji nzo ja kexile ni ididi ia soko, phala kulondekesa o ji filme jiji. Saí kithangana, o ji filme akexile mu ji londekesa bhu kanga, mu ku ta dilasola dia dikota bhu muelu. Anthony Hambuch ua soneka: “O idimakaji akexile mu iudika ididi mu mábhia mâ, mu ku ta mixi iavulu phala o athu ku xikama ni ku katula mbote mu milongi.” O kibuka kia kexile mu londekesa o drama “Eureka” a kexile múia ni “Dikalu dia Drama,” o imbamba ioso ia bhindamene phala ku bhanga o kudia ni ku zeka.

Saí ithangana o athu akexile mu mona o drama “Eureka” a tolele, maji mu ithangana ia mukua a kexile hama ni ji hama ja athu. Mu ixi ia Estados Unidos, 400 a athu a mono o filme íii io londekese veji jiuana mu 150 dia ji veji ja londekesa. Mu ididi ia mukuá, o athu akexile mu kuenda 8 dia ji kilómetulu, phala kuia ni ku vutuka, phala ku mona o “Drama Eureka.” Mu ixi ia Suécia, o jivizinhu ja Charlotte Ahlberg’s a di bhongolola mu inzo iê iofele, a mono kuila o milongi ia kidi ia a tula ku muxima, kioso kiévu o milongi io ngalavale. 1.500 ja athu, ai mu mona o filme íii, mu mbanza ia dikanga mu ixi ia Austrália. Mu Mulangidi mueza milongi ia londekesa kuila “o alongexi ni adilongi a ji xikola, a di uanene kiavulu mu ku mona o jifoto ni milongi ietu io ngalavale.” O “Drama Eureka” a tenene ku i sanga katé muene mu jinzo ja ku londekesa o ji filme.

KU KUNA O IBUNDU IA KIDI

O “Drama Eureka” ia kuatekesa kiavulu ku sanzumuna o “ibuka” ia adilongi a Bibidia mu ku tumikisa akunji, phala ku mateka ku longa o Bibidia ku ibuka ia ubhe. Ki tu tena ku zuela se athu akuxi a mono o “Drama Eureka.” Saí ji mbandu ja “Drama” akexile mu ji londekesa kiavulu. Maji ku muvu 1915, 14 mu 86 a ibuka akexile mu soneka o ji ola ja kexile mu bhanga mu sidivisu. Mu ku zuela ia lungu ni athu a monene drama, o mukanda ua disukilu dia muvu iú, ua londekesa kuila dizunda dimoxi ndenge dia athu a monene o “Drama.” 30.000 a athu a monene o drama, a bhingile madivulu a Bibidia.

O “Drama Eureka” nange ki xisa fuma iavulu, maji tundé ku ixi ia Austrália katé ku ixi ia Argentina, África do Sul katé ku Ilhas Britânicas, India, ni Caribe, mazunda ni mazunda a athu a mono o ji drama jiji. Athu avulu a mono kuila, o kidi kia Bibidia kia beta o ku kala ni valolo o ulu ndenge, mu kiki a tena ku zuela ni ngalasa ioso “Eureka!”