Tu Tena Kukala ni Mwenyu Wambote Lelu

MWENYU, sé kukata, kukuka mba kufwa. O mwenyu yú, eye u tena kukala na-u ku hádya! Lelu, o mwenyu wezala ni usweya ni ibhidi mba maka avulu. Ihi i tena ku ku kwatekesa kukala ni mwenyu wambote lelu? O Bibidya i bhana itendelesu i tena kukwatekesa kuzediwa ni kukala ni mwenyu wambote kindala. Tala o ibhidi yiyi ni kyebhi o Bibidya i tena ku kukwatekesa kudibhana na-yu.

SANGULUKA NI IMA I WALA NA-YU

O Bibidya i dimuna: “Ki mu kale mu akwa lwimbi lwa kitadi, yoso i mwa mono i mi soke.”—Jihebelewu 13:5.

O mundu wa lelu u tu swinisa ngó kukala ni ima yavulu mba kuta mawenji. O Bibidya i zwela kwila, etu tu tena “kusanguluka ni ima i twala na-yu.” Kyebhi?

Kana “kuzola o kitadi.” O athu ene mu dibotesa o kithangana, sawídi, ukaza, mwiji, makamba, ukexilu wa mbote—mu konda dya ‘kuzola o kitadi.’ (1 Timote 6:10) Yoso yiyi, ukumbu ngó! Mu kiki, o yó a zolo o kitadi “ki mungu ki mu kuma dingi.”—Ndongixi 5:10.

Bhana valolo ku athu, kana ku ima. O jimbote jala ni kididi kyé. Maji o ima ki i zolo o athu, o athu ene a zolo o jimbote. Kukala ni ‘dikamba dya kidi’ ku tu kwatekesa kukala ni kisangusangu ku mwenyu.—Jisabhu 17:17.

O MWENYU WETU U TENA KUKALA KYAMBOTE KYOSO KI TU KAYELA O ITENDELESU YA BIBIDYA

KYOSO KI U KATA, KOLOKOTA

O Bibidya i tendelesa: “Muxima wa sanguluka, u di bhanga milongo ya mbote mu mukutu wa muthu.”—Jisabhu 17:22.

Kala o “milongo yambote,” O kusanguluka ku tena ku tu kwatekesa kukala ni sawidi yambote. Se twa mu kata, kyebhi ki tu tena o kusanguluka?

Kala ni ukexilu wa kusakidila. Se tu xinganeka kyavulu mu ibhidi i twa mu bhita na-yu, ‘izuwa yetu yoso’ ya malamba ngó. (Jisabhu 15:15) Mu veji dya kiki, o Bibidya yamba: “mwila we ni kusakidila.” (Kolose 3:15) Kala ni ukexilu wa kusakidila ku mwenyu, ne mwene mu ima yofele. Kutala o dikumbi dya mu boba, ka kitembu kambote ka mu bhusa, o kwolela kwa muthu wa mu zolo, ima yoso yiyi i tena kusangulukisa o mwenyu wetu.

Bhanga ima phala akwenu. Ne mwene se ki twala ni sawidi yambote, “o kubhana kota mu kuzediwisa, o kutambula ndenge.” (Ikalakalu 20:35) Kyoso akwetu kya mona o nguzu i tu bhanga, tu divwa kyambote, ki tu xinganeka dingi kyavulu mu ibhidi yetu. Kyoso ki tu kwatekesa akwetu kukala ni mwenyu wambote, etu we tu tena kukala ni mwenyu wambote.

KOLESA O UKAZA WÉ

O Bibidya i tendelesa: ‘Sola o ima ya beta-o-kota ku mwenyu.’—Filipe 1:10.

O makaza a kala kumoxi tu ithangana ngó twofele, a ta o ukaza wâ mu kilwezu. O diyala ni muhatu kyoso kya ta o ukaza wâ ku pholo, a mu londekesa kwila ala ni unjimu, kyene o kima kya beta-o-kota ku mwenyu.

Bhang’yenu o ima kumoxi. Mu veji dya kubhanga o ima ubheka, kima kyambote ku di sokejeka phala ku i bhanga kumoxi . O Bibidya yamba:“ Kota o kukala kiyadi, muthu umoxi ndenge.” (Ndongixi 4:9) Kumoxi, mu tena kubhanga ima kala: kulamba, kutungutisa o mukutu ni kutonoka.

Londekesa kwila wa mu zolo ni muxima woso. O Bibidya i swinisa o munumi, ni muhatu ku di zola ni ku di xila mu dyâ. (Efezu 5:28, 33) Kwolela ni ngalasa yoso, ku di ndwakuna ni henda mba kubhana ujitu, ku tena kukolesa o ukaza. O kudijiya mba kuzeka kumoxi, kikale ngó ni kaza dyé.—Jihebelewu 13:4.

KINDALA NGA SANGE O KIDYELELU KU MWENYU!”

Musoso wa Ryoko Miyamoto, ku Japão.

Mwenyu wami wa bhonzele kyavulu. Mwadi wami wexile kiholwa, mukonda dya kiki kexile mu mu xikina ku salu. Mwene kexile mu kumbidila o ujitu wê wa kukala mutwameni wa mwiji, wa bwazeka o twana twetu tuwana. Sumbala ngexile mu kalakala kyavulu, maji ki ngexile ni kidyelelu kya kwila o mwenyu wami weji lunguluka. Ngexile mu dibhwidisa, ‘o kwila o kya mu bhita n’eme, o futu ya ituxi yami ku mwenyu?’

Mu kiki, sayi kizuwa o Mbangi ya Jihova wa phuphu ku dibhitu dyami. Ni kusanguluka, mwene wa ngi tangela ni kulenduka kwoso, ya lungu ni Utuminu wa Nzambi ni kidyelelu kya mwenyu wa kalelaku. Mwene wa mateka ku ngi longa o Bibidya. Ngeza mu kwijiya kwila, sayi-ku Nzambi ni kwila mwene henda, mukwá kuyuka, wala ni kwijiya kwa soko. Nga dilongo we ihi i bhita n’etu kyoso ki tu fwa. Nga mono kwila o ibhidi i ngexile mu dibhana na-yu ku mwenyu, ki mukonda dya ituxi i nga tele.

O kya beta-o-kota, o kwijiya kwila, o ku zediwa kwa kidi ku mwenyu kwijila mu kukala ni ukamba wambote ni Nzambi. O kwijiya o kidi kya Bibidya kwa ngi swinisa kyavulu ni kukala ni kutululuka. Kindala nga sange o kidyelelu ku mwenyu!