“Kindala Ngazolo o Ukunji!”

OKUSANGULUKA KWAMI KWABHU

Kima kyakuluwa kumitangela kwila kyoso kingabokona mukitala kyakikumbi, o ukamba wami ni Jihova wamateka kuzoza. Kyedile kala ojikoleka jami jexile dingi ni ufolo, kyenyiki eme ngamesenene o ufolo yú. Ngexile mudivwa kwila o ijila ya jitata jami ni ijila ya Jikidistá yexile kungikatula o ufolo wami, o ikalakalu ya ubhezelu wa Jihova ngexile ku imona kala yanemene kyavulu. Sumbala eme kingexile ni phata yakwila kwene Nzambi, maji ngamateka kudivwa kwila kingexile dingi ni ukamba wambote ni mwene.

Kingexile muboka dingi ojisemana joso kala kingexile muboka kudimatekenu. Ngexile muboka kyango bhofele kumbeji. Kyoso kingexile kuya muboka kingexile kudipelepalala, kyenyiki, kyangibhonzele kumateka ni kusuluka ni kubhana umbangi. Kyenyiki, kingexile dingi ni athu phala kwakunda mba phala kwalonga o Bibidya, mukiki, kingexile dingi muwabhela o ukunji. Ngadibhwidisa: ‘Kyebhi mwene omuthu kyatena kusuluka ni kuboka semana ni semana, mbeji ni mbeji ni ukexilu yú?’

Kyoso kingatenesa 17 dyamivu, eme ngamesenene kyavulu kukala ni ufolo wakubhanga o ima kala kingamesenene. Kyenyiki ngalongela o imbamba yami, ngaxisa odibhata dya jitata jami, eme ngayi ku ixi ya Australia. Ojitata jami jaluwalele kyavulu kyoso kingaxisa odibhata phala kuya mutunga ku ixi yadikanga. Ene athandanganyele kyavulu, maji ejidile kwila eme ngeji suluka kusidivila Jihova.

Mu ixi ya Australia okuzoza kwami munzumbi kwadibandekesa. Ngamateka kufonga muyônge. Eme ngabhangele ukamba ni minzangala edile kala asanguluka kyoso kyaya muyônge, maji m’usuku wakayela aya mukididi kyakukina ni kunwa mawuholwa. Mukuyala kudima, ngimona kwila eme ngexile kinama mukilunga kinama kumundu, maji kingejidile se ngatokalele kwebhi.

NGADILONGO DISA DYAKATUNDA KINGADIKIFIKILE

Mukubhita mivu iyadi, ngadisangele ni phange se kukijiya wangikwatekesa kumona kwila onjila ingexile muditela kiyexile njila yambote. Eme ngatungele mudibhata dimoxi ni jiphange jitanu jahatu, kyenyiki kyoso okafunga ka ilunga kyakundu okilunga kyetu, twasolo kwazalela mwene ni muhatwê, Tamara, musemana yamuvimba. Kyoso omwadi wê kyexile mubhanga o ima mukilunga phange Tamara wexile mubhita kithangana ni jiphange jahatu ni kwolela kyavulu kumoxi netu. Eme ngakiwabhela. Mwene wexile muthu walenduka kikwabhonzele kuzwela nê. Ngadiwana mukumona omuthu wakulu munzumbi, ubhanga ikalakalu yavulu mukilunga wawabhela kwolela ni akwa.

Phange Tamara wexile muhatu wanguzu. Kuma mwene wazolele okidi, wazolele o ukunji, o ukexilu wê yú, wexile musambukila akwâ. Mwene wasangulukile musidivisu yê, mukonda mwene wexile musidivila Jihova ni nguzu yê yoso, maji eme ngaluwalele mukonda kingexile musidivila Jihova ni nguzu yami yoso. O ukexile wambote wakutala o ima ni kusanguluka kwê kwakidi, kwafunyisa omwenyu wami. Ophangu yê yambote yangibhangesa kuxikina mukidi kiki kya Bibidya: Jihova wamesena kwila ojiselevende jê joso amusidivila ni “kutana” ni “kwimba.”—Jisá. 100:2.

NGAMATEKA KUZOLA DINGI O UKUNJI

Ngamesenene kusanguluka kala Tamara, maji phala kusanguluka, ngabhingile kulungulula ima yavulu kumwenyu wami. Mukubhita mivu itatu, bhofelebhofele ngamateka kulungulula omwenyu wami. Ngamateka kyá kudipelepalala ande dyakutunda m’ukunji, sayi ithangana ngexile mukalakala kala muboki wa ithangana ni ithangana. Kiki kyangikwatekesa kukamba woma mukuboka. Kyoso kingexile mutanga dingi o Bibidya ni athu m’ukunji, okusanguluka kwami kwexile mudibandekesa. Kikwalaleka, ngakituka muboki wa ithangana ni ithangana mujimbeji javulu.

Ngamateka kubhanga o ukamba ni athu a itala yoso, yó exile kyambote munzumbi, asangulukile mukikalakalu kyâ kwa Jihova. Ophangu yâ yambote yangikwatekesa kusola o ima yabetakota kumwenyu ni kukala ni kifwa kyakutanga o Bibidya izuwa yoso. Ngamateka kyá kusanguluka m’ukunji, kiki kyangikwatekesa kumateka kukalakala kala muboki wathembu yoso. Mumivu yavulu, yiyi yene oveji yadyanga ingadivu kwila ngasanguluka, okilunga kididi kyakondama.

NGASANGE MUBOKI WATHEMBU YOSO WANANGENENA KUMWENYU WAMI

Mukubhita mivu ngadijiya ni Alex, muthu wambote wazolo Jihova ni ukunji. Mwene wakexile musidivila kala mukwatekexi watufunga, wexile kyá muboki wathembu yoso mumivu isamanu. Alex wakalakalele kyá mu ididi mwabhindamene aboki mu ixi ya Malawi mudinake dya jimbeji. Kwenyoko, mwene wabhiti ithangana yavulu ni akunji ajixi jengi, amuswinisa kuta o Utuminu wa Nzambi kupholo wa mwenyu wê.

Kumuvu wa 2003, Alex neme twakazala, etu twasuluka musidivisu yathembu yoso. Twene mudilonga madisá avulu ambote, Jihova wene mutubhana mabesa mumawukexilu avulu.

JIHOVA WATUBESOWALA DINGI KYAVULU

Kumuvu wa 2009, atutumikisa phala kusidivila kala akunji ajixi jengi ku Timor-Leste, kikolo kyatokala ku ixi ya Indonesia. Mukithangana kyenyokyo, twadiwana, twasangulukile, twexile we ni woma. Mukubhita mbeji jitanu, twabhixilla mumbanza yadikota ya ixi, ombanza ya Dili.

Okuya kutunga ku ixi yengi kwejibhinga kulungulula o ukexilu wamwenyu wetu. Twabhingile kwijidila ijila yawubhe, dimi dyawubhe, kudya kwawubhe ni ukexilu wawubhe wamwenyu. M’ukunji twakexile mumona athu akexile jingadyama, kadilongele kyavulu, kexile ni ima yavulu, akexile kwazukutisa. Twakexile mumona athu avulu akexile ni ibhidi, kasangulukile kumwenyu, mukonda dya ita ni usweya.a

O ukunji wexile mungisangulukisa kyavulu! Mukifika, sayi kizuwa ngasange kamunzangala wexile ni 13 dyamivu dijina dyê Madiya.b Mwene waluwalele mukonda mivu kudima manya wafu, mwene kexile mumona tat’ê muveji javulu. Kala ominzangala yavulu akitala kyê, Madiya kejidile se ihi yejibhanga kumwenyu wê. Ngilembalala okizuwa kyoso mwene kyangijimbulula kyebhi kyexile mudivwa ni masoxi kumesu. Maji eme kingatendela kyambote kyebhi mwene kyexile mudivwa, mukonda kingejidile hanji kuzwela odimi dyê dya uvwalukilu. Ngasambe kwa Jihova, ngabhingi phala kungikwatekesa kumuswinisa, mukithangana kyenyokyo ngasange velusu ya Bibidya phala kumuswinisa. Mukonda dyakudilonga o Bibidiya, mukubhita tumivu, Madiya wasangulukile kyá, opholo yê kiyadiswatele dingi. Lelu amubatizala kyá, wene mulonga kyá o Bibidya kumaxibulu mê. Lelu Madiya wala ni mwiji wadikota, omundu wa Jihova. Mwene udivwa kwila ojiphange amuzolo kyavulu.

Jihova watubesowala kyavulu mu ixi ya Timor-Leste. Sumbala avulu abatizala mukwinyi dya mivu kudima, maji avulu amusidivila kala aboki athembu yoso, akwatekexi atufunga, ni tufunga. Amukwa amukalakala mu ididi yakubhanga okudya munzumbi, mumadimi awuvalukilu a’xi. Ngidivwa kyambote kyoso kingamona amukwimba mukyônge, kyoso kingimona okusanguluka kupholo yâ, ni kyoso kingimona kwila amukula munzumbi.

NUKA NGABANZELE KWILA NGEJISANGULUKA KIKI KUMWENYU

O ukexile wamwenyu wetu ku Timor-Leste kiwadifwile ni ukexile wamwenyu wetu ku Australia, maji eme nuka ngabanzele kwila ngejisanguluka kiki kumwenyu. Sayi ithangana twexile mukwendela mumaximba mwezala o athu, mwexile mabunda ambiji yakukuta ni ifwata yamutunda mukitanda. Sayi izuwa twexile mulonga o Bibidya mukanzo katema, mwexile ixyete bhoxi ni jisangi jexile kujinguluka mujimbandu. Sumbala ni ibhidi, ‘okikalakalu kyakuboka kyexile kutusangulukisa kyavulu!’

Mukuxinganeka yabhiti m’ukulu, ngisakidila kyavulu ojitata jami abhange yoso phala kungilonga kala kyamesenene Jihova, angikwatekesa nemwene kyoso o ukamba wami ni Jihova wazozelele. O izwelu itusanga mudivilu dya Jisabhu 22:6 yadikumbidila kumwenyu wami. Ojitata jami asangulukile mukwijiya kwila Alexi neme, twasangulukile mukusidivila Jihova ni muxima woso. Tunde kumuvu wa 2016, twamusidivila mukikalakalu kyakukunda o ilunga mumbambe ya filiyale ya Australasia.

Kate kibhonza kuxikina kwila mivu kudima kingazolele o ukunji. Maji lelu ngazolo o ukunji! Eme ngatonginina kwila kabasa o ima itudibhananayu kumwenyu, etu tukala ngó ni kusanguluka kwakidi, se tusidivila Nzambi ni muxima woso. Kyene mwene, eme ni Alex twasanguluka kyavulu, mu 18 dyamivu utwamusidivila kumoxi. Kindala ngitendela kwila o izwelu ya sobha Davidi kwa Jihova yakidi mwene: “Oso-phe alengela kokwé, a tane-ku! A dikole ni ngalasa, . . . a zola o dijina dyé, a kolokote ku ku dyelela.”—Jisá. 5:11.