Eye Wakijidile?

Kyebhi o jitijolu jasange mu jingundu ja ixi ya Babilonya yokulu ni ukexilu wexile mujibhanga jilondekesa kwila o Bibidya izwela o kidi?

O ATOKWEXI akwa kukanda o mavu mu ididi mwatungile o athu, asange mazunda a jitijolu bhwexile o mbanza ya Babilonya m’ukulu, jatungile naju o mbanza yenyoyo. O mutokwexi Robert Koldewey, wambe kwila o jitijolu jenyiji exile mujiyudika mu majiku “exile bhukanga dya mbanza, kwexile mavu ambote ni . . . jihwinyi javulu.”

O atokwexi eza mu kwijiya we kwila o jinguvulu mu Babilonya exile we mubhanga imbamba yamukwa yayibha kinene mu majiku enyo. O mulongexi wa misoso ni ijila yokulu ya Akwa Assidya, ngana Paul-Alain Beaulieu, wene mulonga mu Xikola ya Katunda ku Toronto, wambe: “Mikanda yavulu ya Babilonya ilondekesa kwila . . . o sobha wabhele kitumu kya kwila oso amubhukumukina mba akamba kuxila o ima ikola, atokalele kwatakula mu kijiku phala kwajokotesa.” Mu kifika sayi mukanda wa izuwa ya Sobha Nabukodonozolo wambe: “Bhwikisawu, jokotesawu, ohawu . . . bhu kijiku kya mulambi . . . bhangesa o dixi dya kubanda bhulu, wa ajibha mu kwa takula bhu tubhya.”

Kiki kitulembalesa o musoso utusanga mu divulu dya Daniyele kibatulu 3. O musoso ulondekesa kwila Sobha Nabukodonozolo wemika kiteka kyonene kya ulu bhu kididi akixanene Dula—ku kanga dya mbanza ya Babilonya. Kyoso o minzangala itatu exile Jihebelewu, a exanene Sadalake, Mizake ni Abedeneko, aditunu kufukamena o kiteka, Nabukodonozolo njinda yamukwata, watumina kutemesa o kijiku ‘lusambwadi, o kyene kuyitemesa ndenge,’ yu watumu ‘kwatakula mu kijiku kya tubhya twamuzukuta.’ Maji kwamoneka anju ya abhulula.—Dan. 3:1-6, 19-28.

© The Trustees of the British Museum. Licensed under CC BY-NC-SA 4.0. Source

O jitijolu josange mu Babilonya jilondekesa we kwila o Bibidya izwela o kidi. Kwala jitijolu javulu kwasonama izwelu ya kiximanu phala o sobha. Sayi tijolu kwasonama kiki: “Nabukodonozolo, Sobha ya Babilonya . . . O mbanza, o kididi kya Ungana wami kingatungu . . . O yo ungibhingana a tumine kate hadya ni hadya.” O izwelu yiyi yadifwe ngo ni izwelu ya Nabukodonozolo itusanga mu divulu dya Daniyele 4:30, yene yamba: “Abha yiyi ki yene mbanza yadikota ya Babilonya I ngatunga eme, ngixi dyene o dibhata dya ungana, dya tundu ku undanda wami, phala kijingo kyami kiye ni kufumana?”