1924​—⁠Hama ya Mivu Kudima

ENE ABOKO BHUKAXI KAMUTELEMBE WA IFOFO

O jiphange ku Betele abhiti muvu umoxi ndenge mu kutunga o inzo mwakexile o rádio yetu, mu mbanza ya Nova York. O rádio yetu a ixanene WBBR. Ene abatula o mixi, ya atungu inzo ya dikota phala o akalakadi ni inzo phala kubhaka-mu o imbamba. Kyoso o kikalakalu kyabhu ene akatula o imbamba yabhindamene phala kumateka o kikalakalu kya, maji adibhanene ni ibhidi yavulu.

Kwa abhonzele kyavulu kutudika o antena, mukonda, o antena o kulebha kwe kwexile ni 91 ya jimetulu, atokalele ku ikuta ku mixi iyadi. Kala muxi, o kulebha kwe kwexile ni 61ya jimetulu. Mu veji yadyanga o jiphange katena ku itudika, maji mu izuwa kupholo ni kikwatekesu kya Jihova, ene atena kubhanga kiki. Phange Calvin Prosser wakalakala mu kididi kiki wambe: “Se twatenene kuyudika o antena mu veji ya dyanga, tweji dinanza.” O jiphange abhana kijingu kwa Jihova. Maji ne kiki ene exile hanji mu dibhana ni ibhidi yengi.

O kubhitisa o minangu mu jirádio kyexile kima kya ubhe, kyabhonzele kusumba o iselekete itwabhindamene. O jiphange asange iselekete exile mukalakala nayu mukididi kya zukama mwexile mukalakala ene. Muveji dya kusumba dingi o dilaka, ene akalakala ni mutelembe wa kafwetele. Mu mbeji ya Kawana, sayi kizuwa mu usuku o jiphange amesenene kufikisa o iselekete, mu kiki atokalele kuzwela kima, kyenyiki asolo kwimba o mimbu yetu. O phange Ernest Lowe wajimbulula musoso wabhangesa kwelela ya bhiti mu kizuwa kyenyokyo. Kyoso kyexile mu kwimba, o Mufundixi Rutherfordb wevu o mimbu mu mutelembe we wa ifofo, anga waxindi ku jiphange. Bhwakexile mwene phala kubhixila bhu rádio, kwabhingile kwenda 25 ya jikilometulu.

Phange Rutherford wambe: “Mwamubhanga jibuya javulu!” O jiphange, o jisonyi ja akwata, ni lusolo lwoso eha kubhanga yexile mubhanga. Ene ejidile kwila o iselekete yexile mukalakala kyambote ni kwila yexile polondo phala kukalakala nayu.

Mu kizuwa kyadyanga, o kizuwa kya 24 kya mbeji ya Kawana ka 1924, o phange Rutherford wambe kwila o rádio eji kalakala nayu phala kubhanga o kikalakalu kya abhanene o sobha Kidistu. Mwene wambe kwila yene, yeji kwatekesa o athu oso kutendela o Bibidya, ni kwakwatekesa kutendela kwila twala mu izuwa isukidilaku.

Mu kizuwa kya dyanga, yoso yabhiti kyambote. O jiphange abhitisa o minangu yetu mu 33 kya mivu.

NI KUSWINA KWOSO ENE AFUNDISA O ATWAMENI A JINGELEJA

Mu mbeji ya Kavwa ka 1924, o Adilongi a Bibidya adyongekele mu kyonge kya dikota mu mbanza ya Columbus, ku Estados Unidos. Ene evu o madiskulusu mu dimi dya Árabe, Kingileji, Francês, Alemão, Grego, Húngaro, Italiano, Lituano, Polonês, Russo, Ucraniano ni mu madimi a jixi ja Escandinâvia. Athu avulu atena kwivwa o madiskulusu bhu kaxi ka mutelembe wa ifofo. O jiphange abhingi ku musoneki wa mikanda ni jijurnale phala kusoneka yoso yazwela mu kyonge kya dikota.

Kya Kinda mu kizuwa kya 24 kya mbeji ya kavuwa, 5.000 ya jiphange ayile muboka mu mbanza kwexile mubhita o kyonge kya dikota. O madivulu abhanene kwakambele ngo bhofele phala kutenesa 30.000 ya madivulu, ya amateka kulonga o Bibidya ku mazunda ni mazunda a athu. O Mulangidi wambe kwila kyoso kyexile kizuwa kya katunda.

Kya Sesa mu kizuwa kya 25 ya mbeji ya Kavwa o phange Rutherford kyoso kyexile mubhanga o diskulusu, ni kuswina kwoso mwene watange mukanda wexile mubalakala o atwameni a jingeleja. Mwene wambe: “O jinguvulu, o atwameni a jingeleja ni atwameni a matenda exile mufidisa o athu kudilonga yalungu ni Utuminu wa Nzambi ni kwila Nzambi wanda besowala o mundu wê bhukaxi ka Utuminu wê.” Mwene we wazwela kwila “exile mutanga makutu, mukonda exile mu kwatekesa o Liga das Nações ni kwila exile muzuwela kwila yu wene o ukexilu wa Nzambi wa kutumina o ixi.” O Adilongi a Bibidya atokalele kuswina phala kuboka o njimbu yambote ku athu oso.

Mu kuzwela yalungu ni kyonge kiki kyadikota, o Mulangidi wambe: “O kyonge kiki kyadikota kyabhiti mu mbanza ya Columbus, kyakolesa o kixikanu kya jiphange ni kwila kya abhana nguzu phala kusuluka mu kuboka sumbala ni izukutisu.” Phange Leo Claus, wakexile mu kyonge kiki kyadikota wambe: “Kyoso kyabhu o kyonge, twakexile ni hanji yavulu ya kuboka o njimbu yiyi mu mbambe yetu.”

Mu mbeji ya Kamusasadi o Adilongi a Bibidya amateka kubhana tu mikanda twakexile o njimbu ya Phange Rutherford yalungu ni atwameni a jingeleja. Mu mbanza yofele ku Oklahoma, ku Estados Unidos, Phange Frank Johnson mu kithangana kwofele mwene watena kubhana o tumikanda twoso wexile natu yu wakingila o jiphange jakamukwa mu 20 a ithangana. Mwene katokalele kukingila o jiphange mu kididi kyoso-kyoso, mukonda exile mwasota kwa yo a azembele. O Phange Johnson wayi mu disweka mu ngeleja. Mu ngeleja kikwexile muthu, mu kiki mwene wate kamukanda mu Bibidya ni tumikanda mu yalu yoso. Mwene watundu ni lusolo lwoso mu ngeleja. Kuma wakexile dingi ni kithangana, mwene wabhange kiki mu jingeleja jiyadi.

Phange Frank wayi ni losolo mu kididi mweji disanga ni jiphange joso, mwene wadisweka mu kididi kuya makalu phala kusumba gazolina. Kwenyoko, mwene wexile mu tonginina o jinguma exile mu musota. O jinguma abhiti kwenyoko ni makalu, maji kamumono. Kyoso ene kyayi, o jiphange joso abhixila, mu kusuluka ayi kumoxi.

Sayi phange wambe: “Kyoso ki twatundu mu mbanza, twabhiti mu jingeleja jitatu, kala ngeleja kwemanene 50 a athu. Sayi athu exile mutanga o tumikanda, amukwa exile mukingila o mutwameni wa ngeleja phala kumulondekesa natu. Twatena kutunda sé kutukwata! Tusakidila Jihova Nzambi yetu mu kutulanga ni mu kutukwatekesa kwijiya itwatokalele kubhanga phala kuboka o njimbu yê sé kutukwata ku jinguma jetu.”

O ADILONGI A BIBIDYA MU JIXI JENGI ABOKO WE NI KUSWINA KWOSO

O Adilongi a Bibidya mu jixi jengi aboko we ni kuswina kwoso. Mu mbandu ya thunda mu ixi ya França, o phange Józef Krett wabokela o athu atundu mu ixi ya Polónia, exile mukalakala koxi a milundu. Mwene amusolo phala kubhanga o diskulusu dyeji zwela yalungu ni difukunukinu. Kyoso kyexile mubhana o kixanu ku athu o mutwameni wa ngeleja, watangela o athu phala kayi-ku. Maji ki kyene kyabhiti. Midi jitanu ja athu ndenge ayi-ku katé mwene o mutwameni wa ngeleja! Phange Krett wexana o mutwameni wa ngeleja phala kuzwela-nê yalungu ni Bibidya, maji mwene waditunu. Kyazubha kubhanga o diskulusu, phange Krett wabhana ku athu o madivulu oso akexile nawu mukonda ene amesenene kyavulu kudilonga o Mak’â Nzambi.—Amo. 8:11.

Phange Claude Brown wayi mu ixi ya Gana, phala kuboka o njimbu yambote. Athu avulu evu o njimbu yambote mukonda mwene wabhange madiskulusu avulu, wabhana we madivulu avulu. Phange John Blankson, wexile mudilonga phala kusumbisa milongo, wevu diskulusu dimoxi. Mwene waxikina kwila wasange o kidi. Phange John wambe: “O kidi kyangisangulukisa kyavulu. Ku xikola ngexile muzwela yalungu ni kidi kiki ni athu avulu.”

Phange John wadilongo mu Bibidya kwila Nzambi ki tilindade. Sayi kizuwa mwene wayi mu ngeleja phala kuzwela ni mutwameni wa ngeleja yiyi yalungu ni tilindade. O mutwameni wa ngeleja njinda yamukwata, yu wadikola ni dizwi dyaswina: “Tunda bhabha! Eye ki kidistá, eye watokala kwa Dyabhu!”

Kyoso phange John kyabhixila kubhata, wasoneka mukanda phala o mutwameni wa ngeleja, yu wamutangela phala kuzwela yalungu ni tilindade mwaxaxi ka athu. O mutwameni wa ngeleja watangela phange John phala kuya mu dixilu dya mutwameni wa xikola nazwele ni mutwameni wa xikola. O mutwameni wa xikola wamwibhwisa se phange John wasonekene o mutwameni wa ngeleja.

Phange John wamutambwijila: “Kyene ngana yami.”

O mutwameni wa xikola watumina phange John phala kusoneka mukanda wa mukwa phala kubhinga muloloki ku mutwameni wa ngeleja. Kyenyiki phange John wasoneka kiki:

“O mutwameni wa xikola mu ngamudilonga wangitumina phala ku kubhinga muloloki, maji nganda bhanga ngo kiki se uxikina kwila o ima i wamulonga, ima ya makutu!”

O mutwameni wa xikola wadiwana ni kima kyasoneka o phange, mu kiki wamutangela: “John, wasaluka?”

“Kana ngana. Maji kingabhingi ku mubhinga muloloki, mukonda kingate kituxi.”

“Twanda kukaya mu xikola se usuluka mu kuzwela kyayibha yalungu ni mutwameni wa ngeleja yene mwakwatekesa ku jinguvulu.”

“Ngana yami, kyoso ki wamutulonga, se tukamba kutendela kima, twene mu kubhanga ibhwidisu.”

“Kyene mwene.”

“Kiki kyene ngo kyabhiti ngana yami. O mutwameni wa ngeleja wexile mu tulonga o Bibidya, eme ngamubhange ibhwidisu. Se mwene katena kungitambwijila, ngimona kwila kingabhingi ku mubhinga muloloki.”

Phange John kamukaye mu xikola, kabhingi we muloloki.

O ADILONGI A BIBIDYA AMESENENE KUKALAKALA KYAVULU MU SIDIVISU YA JIHOVA

O Mulangidi wambe kiki yalungu ni muvu wa 1924: “Tuxikina o ima yazwela Davidi: ‘Eye wa ngi kutu ni nguzu ya kubhânga.’ (Jisálamu 18:39) O muvu yú twaswina kyavulu mu kumona kwila Jihova watukwatekesa kubhanga o kikalakalu kyé. O jiselevende jê asanguluka kyavulu mu kuboka o njimbu yambote.”

Mu muvu yu o jiphange abhange yoso phala kukala ni rádio. Atungu dingi kididi kyengi mu mbanza ya Chicago, ku Estados Unidos. O rádio ya ubhe a wixana WORD, kilombolola maka, mukonda eji zwela-mu yalungu ni Mak’â Nzambi. O iselekete yakexile mu rádio yiyi, yabetele-kota mukonda katé o athu mu ixi ya Canadá, exile mu kwivwa yexile muzwela-mu.

Mu muvu wa 1925, Jihova wakwatekesa o jiphange kutendela o divulu dya Dijingunwinu kibatulu 12. Mukonda dya kiki amoxi eha kusidivila Jihova. Maji jiphange javulu asanguluka mu kutendela kyambote o ima yexile mu bhita ku dyulu, ni kyebhi o ima yiyi yeji bheka maka mu ixi.