Kukala ni Ukamba Wambote ni Jiphange Jetu Kima Kyambote Phala Etu!

1-2. Kima kyebhi kyala ni valolo yavulu phala Jihova ni kwila mwene utuswinisa kubhanga ihi?

O UKEXILU wetu wa kutalatala akwetu wala ni valolo yavulu phala Jihova. Jezú walongo kwila twatokala kuzola akwetu kala kitwadizolo etu. (Mat. 22:​37-39) Kiki kyalungu ni kubhanga mbote katemwene kwa yo kene musidivila Jihova. Kyoso kitubhanga kiki tukayela o phangu ya Nzambi yetu, kuma “mwene mukwa kubhangesa o dikumbi dyê ku mwikina athu ambote ni athu ayibha, utumikisa o mvula ku athu ayuka ni athu ayibha.”—Mat. 5:45.

² Jihova uzola o athu oso, maji uzola dingi yo ubhanga o vondadi ye. (Nzw. 14:21) Mwene wamesena kwila tukayela o phangu ye. Mwene utuswinisa phala “o henda yetu mudyetu ivule” phala ‘tudizole mudyetu kala tujindandu.’ (1 Ph. 4:8; Lom. 12:10) O henda yiyi yadifu ni henda itwala nayu ku jindandu jetu, ni makamba metu ma kazola.

3. Ihi itwatokala kulembalala yalungu ni henda?

³ O jifololo mu njaludi phala kubwingita etu twabhingi kujilanga kyambote, kyene kimoxi we, o henda yetu ku akwetu phala kudibandekesa etu twabhingi kubhanga nguzu. O poxolo Phawulu wa bhana o kitendelesu kiki ku Jikidistá: “Sulukenu mu kudizola ni jiphange.” (Jih. 13:1) Jihova wamesena kwila o henda yetu ku jiphange isuluka mu kudibandekesa. Mu milongi yiyi twanda mona se mukonda dyahi twatokala kusuluka mu kukolesa o ukamba wetu ni jiphange ni kyebhi kitutena kubhanga kiki.

MUKONDA DYAHI TWATOKALA KUZUKAMA KU JIPHANGE JETU?

4. Ihi itwatokala kusuluka mu kubhanga phala kubhana valolo mu ukamba wetu ni jiphange? (Jisálamu 133:1) (Tala we o jifoto.)

⁴ Tanga Jisálamu 133:1. Etu tuxikina mu izwelu ya mukwa Jisálamu kyoso kyambe kwila “kima kya fwama” ni “kyadi wabhela” kukala tumakamba a yo ene musidivila Jihova. Maji sayiku kilwezu. Xinganeka ku muthu u bhita izuwa yoso bhumbandu ya muxi wa fwama, mukubhita ithangana mwene utena kukamba kubhana valolo mu kuwabha kwa muxi yu. Kyene kimoxi we netu, etu tubhita ithangana yavulu ni jiphange jetu kujisemana joso, kyenyiki tutena kukamba kubhana valolo mu ukamba utwala nawu ni jiphange jetu. Ihi itwatokala o kubhanga phala kiki kikibhite? O henda yetu kujiphange jetu yanda dibandekesa dingi se tukatula kithangana phala kuxinganeka mu valolo yala nayu ene mukilunga ni kokwetu.

5. Ihi ibhita kyoso o athu kyamona o henda itudilondekesa mudyetu?

⁵ O yo ene muya mu yonge yetu muveji yadyanga adiwana kyavulu mu henda itwala nayu mudyetu. Sayi Bhabha o kima kiki kyene mwa kwatekesa kumona kwila etu tu Jikidistá ja kidi. Jezú wambe: “Kyenyiki, o athu oso anda mijiya kwila mu maxibulu mami, se mudizola mudyenu.” (Nzw. 13:35) Tumone o kifika kya mana Chaithra, wadilongo mu xikola ya katunda wexile mudilonga o Bibidya ni jimbangi ja Jihova. Mwene waxikina kyoso kyamwixana phala kuya mu kyonge kya dikota pholo ni pholo. Mukizuwa kya dyanga kya kyonge kya dikota, mu ngoloxi mwene wambe ku mulongexi we: “O jitata jami nuka angindwakwine. Maji mukyonge kyenu kya dikota, angindwakuna 52 kya jiveji mu kizuwa kimoxi ngo! Ngamono o henda ya Jihova bhukaxi ka jiphange. Eme ngamesena kubhanga mbandu ya mwiji yu.” Mana Chaithra wa suluka mukukula munzumbi ya amubatizala kumuvu wa 2024. Kiki, kilondekesa kwila mu ithangana yavulu kyoso o athu a mesena kwijiya o kidi amona o ibhangelu yetu, kate mwene o henda yetu mudyetu, ene asola kusidivila Jihova.—Mat. 5:16.

6. Mukonda dyahi o kukala ni ukamba wambote ni jiphange jetu kitena kutulanga?

⁶ Kukala ni ukamba wambote ni jiphange jetu, kutulanga. Poxolo Phawulu wa tendelesa o Jikidistá: “Kolokotenu mu kudiswinisa mudyenu izuwa yoso . . . phala kana muthu a mubhomba kwala o ituxi n’a kole o muxima.” (Jih. 3:13) Sayi bhabha kyoso kituluwala kyavulu, tumateka kudisondolola kumakamba a Jihova. Maji o phange umoxi utena kumona, anga Jihova umutumikisa phala kutubhana o kikwatekesu ki twabhindamena. (Jisá. 73:​2, 17, 23) Kidi, o kikwatekesu ni kiswinisu kiki kitubhanga kyambote.

7. Kyebhi o henda itena kutukwatekesa kukala ni kutululuka? (Kolose 3:​13, 14)

⁷ Kuma tubhanga mbandu yamundu ene mubhanga nguzu yavulu phala kudilondekesa henda mudya, kiki kitubhekela mabesá avulu. (1 Nz. 4:11) Mukifika, o henda itukwatekesa ‘kukolokota ni kudilendukila mudyetu’ kiki kyene kyabheka o kutululuka kutwala naku mudyetu. (Tanga Kolose 3:​13, 14; Efe. 4:​2-6) O henda ni kutululuka utwala nawu mu yonge yetu, kitutena ku isokesa. Seku kibuka mu ixi kitena kukala ni kutululuka kuku.

DIXILYENU MU DYENU

8. Kyebhi Jihova kyatukwatekesa kukala ni ukamba wambote ni jiphange?

⁸ O ukamba utwala nawu ni jiphange jetu kumundu woso madiwanu a Jihova. Mukonda etwenyoso tu akwa ituxi. (1 Ko. 12:25) O Bibidya yambe kwila ‘Nzambi wa tulongo kya kudizola mudyetu.’ (1 Te. 4:9) Kiki kilombolola kwila Jihova mu maka mê ututangela se ihi itwatokala o kubhanga, phala kukala ni ukamba wa kolo ni akwetu. Phala “kutulonga kwa Nzambi” twabhingi kudilonga o maka mê ni kukumbidila o ima itwadilongo. (Jih. 4:12; Tiy. 1:25) Kiki kyene o kima kyene mubhanga o jimbangi ja Jihova.

9. O kuxila akwetu kwalungu ni ihi? (Loma 12:​9-13)

⁹ Kyebhi o Bibidya itulonga kukala ni ukamba wakolo ni akwetu? Mukifika, tala yazwela poxolo Phawulu mudivulu dya Loma 12:​9-13. (Tanga.) Kima, kimoxi kyabetakota kya zwela poxolo Phawulu, kya kwila twatokala ‘kudyanga kuxila akwetu.’ Kiki kilombolola kwila twatokala ‘kudyanga kulondekesa henda’ ku jiphange jetu. Tutena kubhanga kiki mumaukexilu avulu, mukifika, mukuloloka, kuzalela ni kukala ni ukexilu wa kubhana. (Efe. 4:32) Eye kiwatokala kukingila kwila o phange uzukama kokwe. Muveji dya kiki, eye ‘watokala kudyanga’ kukolesa o ukamba we ni mwene. Mukubhanga kiki, eye wanda mona kwila Jezú walungile kyoso kyambe: “O kubhana kusangulukisa dingi, o kutambula ndenge.”—Ika. 20:35.

10. Kyebhi kitutena ‘kudixila mudyetu’ se kukala ni usudi? (Tala we ofoto.)

¹⁰ Kyoso kyazubha kuzwela yalungu ni kuxila akwetu, Phawulu wambe: “Kalakalenu ni kuswina kimukale mu imonya.” O mukalakadi waswina ukumbidila o mbambe ye. Mwene ubhana valolo mu ikalakalu yamubhana anga ubhanga nguzu phala kwikumbidila. O divulu dya Jisabhu 3:​27, 28 dibhana o kitendelesu kiki: “Muthu woso wa tokala ku mu bhanga mbote, eye ku fule ku mu bhanga-yu se o lukwaku lwé lwala ni kutena kwa ku kibhanga.” Mukiki kyoso kitumona muthu wabhindamena kikwatekesu tukibhanga ni lusolo lwoso. Kitwatokala kukingila kubhanga kiki mu kithangana kyengi, mba kuxinganeka kwila kwanda moneka muthu wengi wanda mukwatekesa.—1 Nz. 3:​17, 18.

11. Ukexilu webhi dingi wa kulondekesa henda ku jiphange jetu?

¹¹ O ukexilu wa mukwa wa kulondekesa henda kujiphange jetu o kukamba kulaleka mu kuloloka akwetu kyoso kyatubhanga kima kyayibha. Efezu 4:26 yamba: “Dikumbi ki dikufwile mu njinda.” Mukonda dyahi kiki kima kyabeta kota? Mukonda kala kilondekesa o velusu 27 kiki kyeji ‘bhana kithangana kwa Dyabhu.’ Etu twejiya kwila mu Bibidya mu veji javulu, Jihova ututendelesa kudiloloka mudyetu. O divulu dya Kolose 3:13 ditutangela phala tusuluke mu ‘kudiloloka mudyetu.’ O kukamba kudikwatenena mu itondalu yakwetu ukexilu wambote wa kukolesa o ukamba wetu ni akwetu. Kyoso kitubhanga kiki tukwatekesa, phala ni tukale ni kutululuka, ‘mukonda o nzumbi ikôla yéne itukwatekesa phala tukale kumoxi’. (Efe. 4:3) Kidi, o kuloloka kwene kubhangesa o mundu wa Nzambi kukala ni muxima umoxi ni kutululuka.

12. Kyebhi Jihova kya tukwatekesa kuloloka akwetu?

¹² Kidi kwila kubhonza kuloloka o muthu wa tubhange kyayibha. Maji ni kikwatekesu kya nzumbi ikôla ya Nzambi, tutena kuloloka. Kyoso kyazubha o kuzwela “dizolenu mu dyenu” ni “kukalakala ni kuswina,” o Bibidya ituswinisa: “Ehelenu o nzumbi ikôla ku mibhangesa kufulujuka.” Bhabha o kizwelu “kufulujuka” kyalungu ni muthu ukalakala ni kuswina kwoso mukonda dya kikwatekesu kya nzumbi ikola. (Tanga o nota de estudo mu divulu dya Loma 12:​11, mu Bibidya ya phutu.) Kiki kilombolola kwila o nzumbi ikôla ya Nzambi itena kutukwatekesa kulondekesa henda ni kutalatala kyambote o jiphange jetu ni kwa loloka ni muxima woso. Mukiki, twatokala kudyondela kwa Jihova phala kutukwatekesa kubhanga kiki.—Lom. 12:11.

“PHALA KI MUDIWANUNE MU DYENU”

13. Kima kyahi kitena kuwanuna o kilunga?

¹³ Mu kilunga kya Jihova tusanga-mu “athu a maukexilu oso”. (1 Ti. 2:​3, 4) Kala muthu amusase mu ukexilu kiwadifu ni idifwa ki yadifu, kiki kijimbulula se mukonda dyahi twala ni maukexilu kadifu a kusola o ima. Kala o ukexilu wa kuzwata, o ukexilu wa kusola o itonokenu ni ukexilu wa kutusaka, se kitudilange o ima yiyi itena kuwanuna o kilunga. (Lom. 14:4; 1 Ko. 1:10) Kuma Nzambi watulongo kudizola mudyetu, kitutokala kubanza kwila o ima itusola, yene ya beta dingi kota, o ima isola akwetu ndenge.—Fil. 2:3.

14. Twatokala kubhanga nguzu phala kubhanga ihi ni mukonda dyahi?

¹⁴ Etu wetu tutena kukwatekesa o kilunga kukala ni kutululuka kyoso kitubhanga ima iswinisa akwetu. (1 Te. 5:11) Mu izuwa yiyi, athu avulu azozele mu nzumbi ni yo a akatwile mu kilunga, avutuka dingi mu kilunga. Etu twa atambulula ni maku ayadi! (2 Ko. 2:8) Tala ya zwela phange ya muhatu wa zozele mu nzumbi mu 10 dya mivu yu wavutuka mu kilunga: “O jiphange joso eza mungimenekena ni kusanguluka kwoso.” (Ika. 3:19) O phangyetu wadivu kyebhi ni ukexilu yu? Mwene wambe: “Kyedile kala Jihova wexile dingi mu ngibheka mu njila ya kusanguluka.” Kyoso kitubhanga nguzu phala kuswinisa akwetu, Jezú utena kuswinisa ‘yo abhwila ni yo a tohoka ni imbamba ya anemena’, bhukaxi ketu.—Mat. 11:​28, 29.

15. Ihi dingi itena kutukwatekesa kukala ni kutululuka ni jiphange jetu? (Tala we ofoto.)

¹⁵ O ima ituzwela itena kutukwatekesa kukala ni kutululuka ni jiphange jetu. Jobe 12:11 yamba: “Manyi o maka moso kene mu ku a lola ku dítwi, kala dimi kilola o kúdya mu kanu?” Ande dya kusidivila o kúdya o muthu wejiya kulamba kyambote ulola hanji o kúdya phala kwijiya se o kúdya kwa wabha, kyene we kimoxi, ande dya kuzwela twatokala kuxinganeka kyambote. (Jisá. 141:3) Twamesena kudyelela kwila o ima ituzwela yanda ‘sangulukisa ni kuswinisa yo amutwivwa’.—Efe. 4:29.

16. Benge-benge ananyi atokala kudilanga mu ima yazwela?

¹⁶ Benge-benge o anumi, o jitata ni jimama atokala kudilanga mu ima ya zwela, ene abhingi kuzwela mu ukexilu uswinisa o miji ya. (Kol. 3:​19, 21; Tit. 2:4) O tufunga ala ni kikalakalu kya kusidivila kala abhidi atokala kusangulukisa ni kuswinisa o jimbudi ja Jihova. (Iza. 32:​1, 2; Nga. 6:1) Twamesena kulembalala jinga izwela Jisabhu 15:23: “Kuma o kizwelu kyene mu towala bhu thembu yê!”

O HENDA TU ILONDEKESA “MU IMA YOSO ITUBHANGA”

17. Kyebhi kitutena kuzola o jiphange jetu ni muxima woso?

¹⁷ O poxolo Nzwá wambe “o henda yetu ki yatokala kukala ngó mu ima i tuzwela, maji yatokala ikala henda ya kidi, tu ilondekesa mu ima yoso i tubhanga.” (1 Nz. 3:18) Twamesena kuzola o jiphange jetu ni muxima woso. Kyebhi kitutena kubhanga kiki? Kyoso kitubhita ithangana yavulu ni jiphange jetu, tuzukama dingi kwa ene, o henda yetu mu dyetu ikola dingi, mu kiki bhanga yoso phala kukala ni jiphange. Mukifika, mu yonge ni musidivisu ya kuboka. Katula we kithangana phala kwakunda. Se tubhanga kiki twanda londekesa kwila, ‘amutulonga kwa Nzambi kudizola mudyetu.’ (1 Te. 4:9) Kumbandu yengi twanda suluka mukumona kuma “kima kya fwama, kya di wabhela kyambote, ki u sanga jiphange a takana mu muxima umoxi!”—Jisá. 133:1.