“Exane o Tufunga”

1. Kyebhi Jihova kyalondekesa kwila wazolo o jimbudi jê?

JIHOVA wazolo kyavulu o jimbudi jê joso. Mwene wa asumbu ni manyinga a Jezú, yu watumu o tufunga phala kwa alanga. (Ika. 20:28) Nzambi wamesena kwila o tufunga alanga kyambote o jimbudi jê. Ni kikwatekesu kya Jezú, o tufunga akwatekesa o jimbudi kukala ni ukamba wambote ni Jihova.—Iza. 32:​1, 2.

2. Kala kyamba o divulu dya Izekiyele 34:​15, 16, Jihova wazolo kyavulu benge-benge ananyi?

² Jihova wazolo kyavulu o jiselevende jê joso, benge-benge yó amutala hadi. O yó azoza mu nzumbi, mwene u akwatekesa bhukaxi ka tufunga. (Tanga Izekiyele 34:​15, 16.) Maji Jihova wamesena we kwila tusota o kikwatekesu kyoso kitwabhindamena. Mwene kamesena ngo kwila tusamba kwa mwene, maji wamesena we kwila tusota o kikwatekesu kya “abhidi ni alongexi” mu kilunga.—Efe. 4:​11, 12.

3. Mbote yebhi itutena kukatula ku tufunga?

³ Mu milongi yiyi, twanda dilonga kyebhi Jihova, bhukaxi ka tufunga, kyene mukwatekesa yó azoza mu nzumbi kukala dingi ni ukamba wambote ni mwene. Twanda tambwijila o ibhwidisu yiyi: Kithangana kyebhi kitwatokala kusota o kikwatekesu kya tufunga? Mukonda dyahi twatokala kusota o kikwatekesu kyâ? Mu kusuka-ku, kyebhi ene kyatukwatekesa? Nange mu kindala kiki, kiwabhindamena o kikwatekesu kya tufunga. Né kiki, o milongi yiyi yanda kukwatekesa kumona se kyebhi ki utena kusakidila Jihova mu kutubhana o tufunga, ni kumona ihi i utena kubhanga se uzoza mu nzumbi.

KITHANGANA KYEBHI KITWATOKALA KWIXANA “O TUFUNGA”?

4. Kyebhi kitwejiya kwila o divulu dya Tiyaku 5:​14-16, 19, 20, dyamuzwela yalungu ni athu azoza mu nzumbi? (Tala we o jifoto.)

⁴ O dixibulu Tiyaku wasoneka yalungu ni kyebhi Jihova kyene mutukwatekesa bhukaxi ka tufunga. Mwene wambe: “O kwila sayi muthu mudyenu wamukata? Mwene exane o tufunga twa kilunga.” (Tanga Tiyaku 5:​14-16, 19, 20.) O dixibulu Tiyaku wexile muzwela yalungu ni muthu wazoza mu nzumbi. Mu kifika, mwene wambe kwila o muthu wamukata watokala kwixana o tufunga, mu veji dya kusota o jidotolo. Mwene wambe we kwila o muthu wazoza mu nzumbi udivwa kyambote kyoso kyamuloloka o ituxi yê. O muthu wamukata, phala kudisanza watokala kuya kwa dotolo ni kumutangela se uhaxi webhi wala nawu. Mwene watokala kubelesela o itendelesu ya dotolo. Kyene we kimoxi, phala kukala dingi tu makamba a Jihova, twatokala kuzwela ni tufunga, kwa atangela o maka utwala nawu ni kubelesela o itendelesu yatubhana bhukaxi ka Bibidya.

5. Kyebhi kitutena kwijiya se twamuzoza mu nzumbi?

⁵ O divulu dya Tiyaku kibatulu 5 dituswinisa kuzwela ni tufunga kyoso kitwamuzoza mu nzumbi. Maji phala kitute kituxi kyadikota, kima kyambote kuzwela kya ni tufunga! Maji kitutokala kudinganala, mukonda tutena kubanza kwila twala hanji ni ukamba wambote ni Jihova, mbe kana. (Tiy. 1:22) Kiki kyabhiti ni Jikidistá mu kilunga kya Salade. Maji Jezú wambe kwila ene kexile dingi musangulukisa Jihova. (Dij. 3:​1, 2) Kyebhi kitutena kwijiya se twala ni ukamba wambote ni Jihova? Ukexilu umoxi o kubanza se lelu twasanguluka, kala kitwasangulukile m’ukulu kyoso kitwamateka kusidivila Jihova. (Dij. 2:​4, 5) Tutena kudibhwidisa: ‘O kwila kingawabhela dingi kutanga o Bibidya ni ku ixinganeka? O kwila ngene mufonga mu yonge? Mba kyoso kingene muya mu yonge, ngikamba kusokejeka o milongi ya kyonge? O kwila kingawabhela dingi kuboka? O kwila ngene mubanza ngo ku kitadi ni jimbote?’ Se twatambwijila kyene mu kibhwidisu kimoxi, kiki kilombolola kwila o ukamba wetu ni Jihova wamuzoza. Se mudyetu kitwamutena dingi kukolesa o ukamba wetu ni Jihova, twatokala kusota o kikwatekesu kya tufunga.

6. O yó ate ituxi ya makota atokala kubhanga ihi?

⁶ Se o muthu uta kituxi kyadikota, anga kadyela, atena kumukatula mu kilunga. Se twate kituxi kala kiki, twatokala kuzwela ni tufunga. (1 Ko. 5:​11-13) Se o muthu uta kituxi kyadikota, wabhindamena kikwatekesu phala natene kukala dingi kamba dya Jihova. Phala Jihova kutuloloka bhukaxi ka sata ya kukula, twatokala “kubhanga ima ilondekesa kwila” twadyela o ituxi yetu. (Ika. 26:20) Ukexilu umoxi wa kulondekesa kwila twadyela o kituxi kyetu, o kuzwela ni tufunga.

7. Ananyi dingi abhindamena o kikwatekesu kya tufunga?

⁷ O tufunga kakwatekesa ngo yo ate ituxi yamakota, maji akwatekesa we yo azoza mu nzumbi. (Ika. 20:35) Nange wamubanza kwila ki wanda tena dingi kubhânga ni jihanji jê jayibha. Kyanda bhonza dingi se ande dya kukituka mbangi ya Jihova, eye wexile mumona ufusa, wexile mukwa undumbu ni kunwa jidroga. Keye ngo wamudibhana ni maka yá. Eye utena kuzwela ni tufunga anda ku kwivwa, kukubhana itendelesu ni kuzwela kwila se wamesena kusangulukisa Jihova, kiwatokala kwehela o jihanji jê ku kutolola. (Ndo. 4:12) Se uluwala mukonda dya jihanji jiji, o tufunga anda kutangela kwila eye wamubhanga nguzu phala kukolesa o ukamba we ni Jihova ni kwila eye kiwadyelela mu nguzu yé.—1 Ko. 10:12.

8. O kwila twabhingi kuzwela ni tufunga kilwezu kyoso-kyoso kituta? Jimbulula.

⁸ Maji kikubhingye kuzwela ni tufunga kilwezu kyoso-kyoso kituta. Mu kifika se twazwela kyayibha ni phange mukonda twexile ni njinda, mu veji dya kuzwela ni tufunga, twatokala kuya mubatula o maka ni phang’yetu kala kyatendelesa Jezú. (Mat. 5:​23, 24) Etu twatokala kudilonga yalungu ni kubatâma, o mwanyu ni kuditumina o jihanji jetu. Maji se ne kiki twabhindamena hanji o kikwatekesu kya tufunga, tutena kuzwela ni kafunga kamoxi. Kyoso Evodya ni Sindike katenene kubatula o maka mâ, Phawulu wabhingi ku phange mu kilunga phala kwa akwatekesa. Kafunga kamoxi mu kilunga utena we kutukwatekesa.—Fil. 4:​2, 3.

MUKONDA DYAHI TWATOKALA KWIXANA O TUFUNGA?

9. Mukonda dyahi kitwatokala kwehela o jisonyi kutufidisa kuzwela ni tufunga? (Jisabhu 28:13)

⁹ Kwabhingi kukala ni kixikanu kyakolo ni kuswina phala kubhinga kikwatekesu kyoso kituta kituxi kyadikota mba kyoso kyamutubhonza kulenga tendasá. Kitwatokala kwehela o jisonyi kutufidisa kuzwela ni tufunga. Mukonda dyahi? Mukonda, Jihova watubhana o tufunga phala kutukwatekesa kukala ni ukamba wambote ni mwene. Mukonda dya kiki, kyoso kituzwela ni tufunga, tulondekesa kwila twadyelela kwa Jihova ni kwila tumubelesela. Tuxikina kwila twabhindamena o kikwatekesu kyê phala tusuluke mu kubhanga o ima yatokala. (Jisá. 94:18) Se twate kituxi, Jihova wanda tuloloka se tudyela o kituxi ni kweha kubhanga o ima yayibha.—Tanga Jisabhu 28:13.

10. Ihi ibhita kyoso ki tusweka o kituxi kyetu?

¹⁰ Kyoso kituzwela ku tufunga o kituxi ki twate, Jihova wanda tubesowala, maji kyoso ki tukisweka, twanda tala hadi yavulu. Kyoso sobha Davidi kyasweka o kituxi kyê, mwene wazozele mu nzumbi, wexile ni kikote ku muxima ni kwila wakatele. (Jisá. 32:​3-5) Kala kibhita ni uhaxi mba o fidila, se kitu italatala kyambote, yanda dibandekesa dingi, kyene we kimoxi mu nzumbi. Mukonda dya kiki Jihova ututangela phala kubatula o maka ni mwene bhukaxi ka tufunga phala tutene dingi kukala tu makamba mê.—Iza. 1:​5, 6, 18.

11. Ihi ibhita se tusweka kituxi kya phange mukilunga?

¹¹ Kyoso kitusweka o kituxi kyetu, athu amukwa anda tala we hadi. Mukilunga kimwanda kala nzumbi ikola ne kutululuka. (Efe. 4:30) Se twejiya kwila mu kilunga sayi phange wate kituxi kyadikota, twatokala kumu tangela phala nazwele ni tufunga.a Se tusweka o kituxi kyê, etu we twala ni kikuma. (Iji. 5:1) Mukonda dya henda yetu kwa Jihova, tuzwela ni tufunga se twejiya kwila sayi phange mu kilunga wate kituxi kyadikota. Kyoso kitubhanga kiki, tukwatekesa kuzelesa o kilunga ni kukwatekesa o muthu wate kituxi kyadikota kukala ni ukamba wambote ni Jihova.

KYEBHI O TUFUNGA KYATUKWATEKESA?

12. Kyebhi o tufunga kyatena kukwatekesa yo azoza mu nzumbi?

¹² O Bibidya yamba kwila o tufunga atokala kukwatekesa yo azoza mu nzumbi. (1 Te. 5:14) Se wate kituxi, o tufunga anda kubhanga ibhwidisu phala kutendela o ixinganeku yé ni kyebhi kiwamu divwa. (Jisa. 20:5) Nange kukubhonza kyavulu kuzwela ni tufunga mukonda eye umukwa jisonyi mba wala ni jisonyi jakuzwela o ima i wabhange. Maji se uzwela o maka uwamu dibhana nawu ku tufunga, kiki kyanda kwa akwatekesa. Kana kutandanganya se wanda zwela ima yayibha. (Jobe 6:3) O tufunga kanda kufundisa ni lusolo mukonda dya ima i wanda zwela, ande dya kukubhana kitendelesu kya Bibidya, anda dyanga hanji kukwivwa ni mwanyu. (Jisa. 18:13) Ene ejiya kwila phala kulanga o jimbudi kwabhingi kithangana, mukonda dya kiki, sayi bhabha phala kukwatekesa phange mu kilunga, ene anda bhinga kuzwela ni mwene muveji javulu.

13. Kyoso o tufunga kyasamba netu anga atubhana itendelesu bhukaxi ka Bibidya, kiki kitukwatekesa kyebhi? (Tala we o jifoto.)

¹³ O tufunga kamesena kwila udivwa dingi kyayibha mukonda dya kituxi ki wate. Mu veji dya kiki ene anda samba phala udivwe kyambote. Kyoso ene kyanda samba wanda divwa kyambote. O kikwatekesu kya kyalungu ni ‘kuku unda ni maji mu dijina dya Jihova.’ (Tiy. 5:​14-16) O maji ya alombolola o maka a Nzambi. Bhukaxi ka Bibidya, o tufunga anda kukwatekesa kukala dingi udikamba dya Jihova. (Iza. 57:18) O itendelesu yanda kubhana yanda kukwatekesa kubhanga o ima yambote. O tufunga atena kuku kwatekesa kwivwa o dizwi dya Jihova kukutangela kiki: “Yiyi yene o njila, endelenu mwenyumu.”—Iza. 30:21.

14. Kala kilondekesa o divulu dya Ngalásya 6:​1, kyebhi o tufunga kyakwatekesa phange wamuditela mu “njila yayibha”? (Tala we o jifoto.)

¹⁴ Tanga Ngalásya 6:1. O phange wamuditela mu njila yayibha, kamubhanga o vondadi ya Jihova. O kuditela mu njila yayibha nange yalungu ni ima yayibha yasolo muthu ku mwenyu mba o kituxi kyadikota kyate. Ni henda yoso o tufunga asola kukwatekesa o jiphange jiji ni kubatama kwoso. O kizwelu “kukwatekesa” mu dimi dya Ngeleku kyalungu ni musaki utalatala o haxi wabukuka o kifuba phala kyene kivutuke dingi mu kididi kye. O musaki wambote, mu kusaka muthu wabukuka o kifuba, umutalatala ni henda phala o haxi kevwe dingi ndolo yavulu. Kyene we kimoxi ni tufunga, mu kukwatekesa phange wakate mu nzumbi, ene abhanga kiki ni henda yoso phala mwene kakale dingi ni kikote ku muxima. O Bibidya yamba kwila o tufunga atokala we ‘kudilanga.’ Kyoso kyaya ni kutukwatekesa, o tufunga atokala kulembalala kwila ene wa akwa ituxi atena we kuditela mu njila yayibha. Ene kalondekesa kwila abeta dingi kota o phange wate kituxi ndenge, muveji dya kiki ene alenduka, akwatela henda kwa phange wate kituxi.—1 Ph. 3:8.

15. Se twala ni maka, ihi itwatokala kubhanga?

¹⁵ Tutena kudyelela ku tufunga twetu. Jihova wa alongo phala kazwele o maka a jiphange ku athu akamukwa, ene wa abhana itendelesu bhukaxi ka Bibidya kana bhukaxi ka ixinganeku yâ. Ene ejiya kwila atokala kusuluka mu kukwatekesa o jiphange amudibhana ni maka. (Jisa. 11:13; Nga. 6:2) O tufunga ala ni idifwa kiyadifu, sayi ya ala dingi ni mauhete. Ne kiki tutena kudivwa kyambote phala kuzwela ni kafunga koso-koso. Maji kitwatokala kubhinga kikwatekesu ku tufunga twavulu phala ngo kusanga kafunga kamoxi ututangela yoso itwamesena kwivwa. Se tubhanga kiki kyanda kala kala ‘amutu aza ku mátwi’ muveji dya kuxikina “o ulongelu wambote” wa maka a Nzambi. (2 Ti. 4:​3, tala o nota.) Kyoso kitwanda bhinga kikwatekesu ku kafunga, mwene wanda twibhula se twazwela kya ni tufunga twamukwa ni itendelesu yebhi yatubhana. Kuma mwene muthu walenduka wanda bhinga we kikwatekesu ku kafunga kamukwa.—Jisa. 13:10.

IHI ITWATOKALA O KUBHANGA?

16. Etu enyoso twatokala kubhanga ihi?

¹⁶ Sumbala o tufunga atulanga kala tujimbudi ja Jihova, maji ene katutangela o ima itwatokala kubhanga. Bhukaxi ka ibhangelu ni izwelu yetu, etu enyoso tutena kulondekesa kwila twazolo Jihova ni kwila twamesena kumusangulukisa. Mwene wanda tukwatekesa kusola kyambote o ima ku mwenyu ni kusuluka fiyele kwa mwene. (Lom. 14:12) Mu veji dya kututangela se ihi itwatokala kubhanga, bhukaxi ka Bibidya o tufunga atukwatekesa kutendela se ihi ibanza Jihova yalungu ni maka utwala nawu ni kutukwatekesa kusola ni unjimu. Bhukaxi ka itendelesu ya Bibidya tutena kulonga o “kilunji” kyetu ni kusola kyambote o ima.—Jih. 5:14.

17. Jihova wamesena kwila tubhanga ihi?

¹⁷ Ujitu wadikota kukala tujimbudi ja Jihova! Jihova watumikisa o “mubhidi wambote” Jezú phala kutubhulula mu ituxi yetu phala tutene kukala ni mwenyu wakalelaku. (Nzw. 10:11) Bhukaxi ka Bibidya Jihova wamukumbidila o kikanenu kyê kiki: “Anga ngi mi bhana [tufunga] kala kyendi o muxima wami, a m’inga ni kwijiya ni unjimu.” (Jel. 3:15) Kyoso kituzoza mu nzumbi mba tuta kituxi kyadikota twatokala kuzwela ni tufunga, kitwabhingi kukala ni woma. Mukubhanga kiki twanda mona kwila Jihova wene mutukwatekesa kyavulu bhukaxi ka tufunga.