“ Bhangenu Yoso Phala Mutunge Kumoxi ni Kutululuka”
POXOLO Phawulu wasoneka kiki ku Jikidistá mu mbanza ya Efezu: “Mu dilendukile mudyenu ni henda ni mwanyu woso. Bhangenu yoso phala mutunge kumoxi ni kutululuka, mukonda o nzumbi ikôla yéne imi kwatekesa phala mukale kumoxi.”—Efe. 4:2, 3.
Etu tutunga kumoxi ni jiphange jetu ni kutululuka mukonda dya kikwatekesu kya nzumbi ikôla. Poxolo Phawulu wajimbulula kwila o Jikidistá joso jatokala ‘kubhanga yoso phala kutunga kumoxi ni kutululuka.’
Xinganeka kwila sayi-ku muthu ukubhana dikalu dya ubhe. Nanyi watokala kulanga o dikalu didi? Eye mwéne! Se ukamba kulanga o dikalu, anga dyene dizanganya, eye kiwatokala kutatela o muthu wakubhana na-dyu.
Kyene we kimoxi netu, sumbala o kutululuka mwaxaxi ketu, ujitu watubhana Nzambi, maji kala muthu mudyetu watokala kubhanga nguzu phala tutunge kumoxi ni kutululuka. Se kitukale ku paze ni jiphange jetu, twatokala kudibhwidisa: ‘O kwila ngamubhanga yoso i ngitena phala tutunge kumoxi ni kutululuka?’
‘BHANGA YOSO PHALA UTUNGE KUMOXI NI KUTULULUKA’ NI JIPHANGE JÉ
Kala kyazwela poxolo Phawulu, sayi ithangana twatokala kubhanga yoso phala kutunga kumoxi ni kutululuka ni akwetu. Maji kiki kitena kubhonza kyoso o phangyetu kyatubhanga kima kyayibha. O kwila mu ithangana yoso twanda bhindamena kuzwela ni muthu phala kubatula o maka? Kana! Dibhwidise: ‘O kwila se ngizwela ni phangyami, o maka anda batuka inga anda dibandekesa dingi?’ Sayi bhabha, o kima kyabetakota, o kuloloka phangyetu ni kujimba o maka.—Jisa. 19:11; Mál. 11:25.
Dibhwidise: ‘O kwila se ngizwela ni phangyami, o maka anda batuka inga anda dibandekesa dingi?’
Kala kyasoneka Phawulu, twatokala kusuluka mu kudilendukila mudyetu “ni henda ni mwanyu woso.” (Efe. 4:2) Sayi divulu dyamba kwila o izwelu yiyi atena ku ilungulula mu ukexilu yu: “Xila o idifwa yala nayu o athu.” Kiki kilombolola kuma etu tuxikina kwila o jiphange jetu akwa ituxi wa, kala etu. Kidi kwila twamubhanga yoso phala “kuzwata o ukexilu wa ubhe.” (Efe. 4:23, 24) Maji seku muthu utena kubhanga kiki ni kuyuka kwoso. (Lom. 3:23) Se tuxikina o maka enyá, ki kyanda tubhonza kudilendukila mudyetu, kuloloka o jiphange jetu ni ‘kubhanga yoso phala kutunga kumoxi ni kutululuka.’
Kyoso o jiphange jetu kyatubhanga ima yayibha, tutena kutunga nawu kumoxi, mu kwaloloka ni kujimba o maka. O divulu dya Efezu 4:3 dyamba: “Mutunge kumoxi ni kutululuka.” O izwelu yiyi mu dimi dya Ngeleku yalungu ni ‘mixibha mba dilanda ditena kubunjika o ifuba.’ Kyene we kimoxi, o kutululuka ni henda i twala nayu ku jiphange jetu, yanda tukwatekesa kutunga kumoxi ni ene, né mwene se atubhanga ima yayibha.
Se phange ukukwatesa njinda mba ukubhanga kima kyayibha, sota kumukwatela henda, mu veji dya kumufundisa. (Kol. 3:12) Kuma etwenyoso twa akwa ituxi, eye we sayi kizuwa wabhangele kya kima kyayibha kwa mukwenu. O kulembalala o kima kiki kitena ku kukwatekesa kubhanga o mbandu yé phala ‘tutunge kumoxi ni kutululuka’ ni jiphange jetu.