Kyebhi ki Utena Kubhana Kijingu Kwa Jihova mu Kizuwa Kya Ukaza Wé?

1-2. Jihova wamesena ihi mu kizuwa kyé kya ukaza?

O KWILA eye wamuditangesa ni kwila wamusokejeka o ima phala o kizuwa kya ukaza? Se kyene, kima kyambote! Mukithangana kiki enu mwala ni ima yavulu yakubhanga. Jihova wamesena kwila o ima yoso ibhite kyambote. Mwene wamesena kwila enu musanguluka mu kizuwa kya ukazaa wenu ni kwila musanguluka ku mwenyu.—Jisa. 5:18; Miku. 3:11.

² Kima kyambote kubhana kijingu kwa Jihova mu kizuwa kya ukaza. Mwene wafwama kutambula o kijingu kiki. Mukonda dyahi? Ni kyebhi kimutena kubhanga kiki? Sumbala o milongi yiyi a isoneka benge-benge phala yo amudisokejeka phala o kizuwa kyâ kya ukaza, maji o itumu i twanda dilonga yanda tukwatekesa etwenyoso kubhana kijingu kwa Jihova kyoso kyatwixana phala o ukaza mba kyoso o makaza kyatubhinga itendelesu yalungu ni kyebhi ene kyatena kudisokejeka.

MUKONDA DYAHI TWATOKALA KUBHANA KIJINGU KWA JIHOVA?

3. Ihi yatokala o kubhanga o diyala ni muhatu kyoso kyamudisokejeka phala o kizuwa kya ukaza ni mukonda dyahi?

³ O dikaza dyamu disokejeka phala o kizuwa kya ukaza atokala kubhanga kiki mu kukayela o itumu ya Jihova itusanga mu Bibidya. Mukonda dyahi? Mukonda Jihova mwéne wabhange o ukaza. Mwene wabhange o ukaza wadyanga ni kwila mwene wabundu Adá ni Eva kala diyala ni muhatu. (Dim. 1:28; 2:24) Mu kiki, mu kudisokejeka phala o ukaza o diyala ni muhatu atokala kuta kupholo o kibanzelu kya Jihova kyalungu ni ukaza, phala ene natene kubhana kijingu kwa Jihova.

4. Kima kyebhi dingi kyabeta kota kyatokala kubhangesa o diyala ni muhatu amudisokejeka phala o kizuwa kya ukaza kubhana kijingu kwa Jihova?

⁴ Sayi kima kyengi dingi kyabeta kota kyatokala ku kubhangesa kuta kupholo o kibanzelu kya Jihova kyoso ki uya ni kudisokejeka phala o kizuwa kye kya ukaza: Jihova Tata yé ya dyulu ni kwila kamba dyé dya beta kota. (Jih. 12:9) Mukidi eye wamesena kwila o ukamba yu unangenena. Eye kiwamesena kwila mu kizuwa kyé kya ukaza mba mu kizuwa kyengi kubhita kima kyayibha kyanda luwalesa kamba dyé. (Jisá. 25:14) Kyoso ki uxinganeka mu ima yabhange kya Jihova kokwé ni ima yanda bhanga kokwé ku hadya, ki uxikina kwila mwene wafwama kutambula kijingu mu kizuwa kyé kya ukaza?—Jisá. 116:12.

KYEBHI KI UTENA KUBHANA KIJINGU KWA JIHOVA?

5. O itumu ya Bibidya itena kukwatekesa o diyala ni muhatu amudisokejeka phala o kizuwa kya ukaza kubhanga ihi?

⁵ O Bibidya ki ibhana ijila yalungu ni kyebhi kyatokala kubhita o ukaza mba o fesa ya ukaza. Kyenyiki o diyala ni muhatu atokala kudisokejeka kala kyene mubhanga mu ixi yâ mba kala kyamuxinganeka. Maji o jikidistá atokala kubelesela o ijila ya ixi yalungu ni ukaza. (Mat. 22:21) Mu kidi kyoso o diyala ni muhatu kya disokejeka phala o kizuwa kya ukaza, o itumu ya Bibidya itena kwakwatekesa kubhana kijingu kwa Jihova ni kumusangulukisa. Kyenyiki-phe itumu yebhi yatokala kuxinganeka ene?

6. Mukonda dyahi o diyala ni muhatu atokala kukayela o ijila ya jinguvulu yalungu ni ukaza?

⁶ Belesela o ijila ya jinguvulu. (Lom. 13:​1, 2) Mu jixi javulu o diyala ni muhatu atokala kukayela o ijila ya jinguvulu phala natene kukazala. Ene abhingi kwijiya se ijila yebhi atokala ku ikayela. Se kimwejiya se ijila yebhi i mwatokala kukayela, bhingenu kikwatekesu ku tufunga.b

7. Ihi i utena kubhanga phala o kizuwa kya ukaza wé kibhane kijingu kwa Jihova?

⁷ Disokejeke phala o kizuwa kya ukaza kibhane kijingu kwa Jihova. (1 Ko. 10:​31, 32) Mu veji dya kukayela o ukexilu wa mundu yu, o ukaza wé watokala kubhana kijingu kwa Jihova. (Nga. 5:​19-26) O Bibidya yamba kwila o mutwameni wa mwiji, o diyala. Mu kiki o diyala mwéne watokala kubhanga yoso ni yoso phala o kizuwa kya ukaza kikale kithangana kya kusanguluka ni kwila kibhane kijingu kwa Jihova. Ihi itena kukwatekesa? O kubhanga diskulusu mu kizuwa kya ukaza. Kyoso o phange kyabhanga o diskulusu uzwela ni henda, mwene ukwatekesa athu oso kumona kwila o ukaza ujitu watubhana Jihova. O diskulusu dikwatekesa we o athu oso ala-mu kumona kwila o ukaza kima kyavalolo. Mu kuxinganeka mu maka enya, jiphange javulu asola kwila o diskulusu didi adibhanga mu kididi kya ubhezelu se kibhana. Se wamesena kwila o diskulusu adibhanga mu kididi kya ubhezelu, watokala kusoneka mukanda ku tufunga mu kithangana kya soko.

8. Se mwamesena kubhanga fesa mu kizuwa kyenu kya ukaza, ihi i mwatokala o kubhanga phala kimukayele o mundu? (Loma 13:13)

⁸ Tanga Loma 13:13. Se mwamesena kubhanga fesa mu kizuwa kyenu kya ukaza, ihi i mwatokala o kubhanga phala kimukayele o mundu? O kizwelu mu dimi dya Ngeleku kyolungulule “jifesa jayibha”, kyalungile ni jifesa mwakexile mauhôlwa ni mimbu ya bolo, o jifesa jiji jakexile muya katé mukaxi ka usuku. (Tanga o nota de estudo “festas descontroladas” mu divulu dya Loma 13:13.) Se mu fesa yenu mwanda kala uhôlwa, xinganekyenu mu ima i mwanda bhanga phala o athu ka kodiwe.c Se mu fesa axika-mu mimbu, alukenu phala o jibuya ki jifidise o athu kudizwelesa. Solenu kyambote o mimbu phala kimubhangese muthu kudibhala.

9. Ihi yatokala kuxinganeka o diyala ni muhatu kyoso kyamusola itonokenu phala o kizuwa kya ukaza wâ?

⁹ O kwila mwamesena kulondekesa jividyu, jifoto mba kutonoka mu fesa yenu? Nange o athu ala mu fesa amesena kuximana o athu amukazala. Ima kala yiyi itena kufwamesa dingi o kizuwa kya ukaza. (Fil. 4:8) Dibhwidisyenu: ‘O kwila kiki kyanda londekesa kwila twamuxila o athu? O kwila yanda xila o ukaza?’ O kyabeta dingi kota: ‘O kwila kyanda bhana kijingu kwa Jihova?’ Kidi kwila kima kyambote kubhanga itonokenu, maji dilange phala ki ikale ima ya ufusa kala o ima ibhangesa o athu kubanza mu undumbu. (Efe. 5:3) Se o jindandu jenu mba o makamba menu amesena kuzwela kima mu kizuwa kya ukaza wenu, ene atokala kwijiya o ima yatokala kuzwela ni ima katokala ku izwela.

10. Mukonda dyahi kima kyambote o diyala ni muhatu kulenduka kyoso kyamudisokejeka phala o kizuwa kya ukaza? (1 Nzwá 2:​15-17)

¹⁰ Kala u muthu walenduka. (Tanga 1 Nzwá 2:​15-17.) Jihova usanguluka kyavulu kyoso o jiselevende jê abhanga yoso ni yoso phala kumujingisa, muveji dya kudijingisa ene. O diyala ni muhatu jikidistá jalenduka, kangastalé kitadi kyavulu phala ‘kudizangeleka’. Mbote yebhi ijila mu kukamba kungastala kitadi kyavulu mu fesa ya ukaza? Tala o phangu ya phange ya diyala amwixana Mike, watungu mu ixi ya Noruega. Mwene wambe: “Etu kitwate makongo, kiki kyatukwatekesa kusuluka mu kukala tu aboki a thembu yoso. O fesa yetu yabhiti kyambote, nuka twanda jimba o kizuwa kyokyo.” Phange ya muhatu amwixana Tabita, watungu mu ixi ya Índia, wambe: “Kuma kitwabhanene fesa ya dikota, kitwexile ni hele yavulu mukonda kitwexile ni ima yavulu ya kubhanga.”

11. Ihi yanda kwatekesa o ngàyala ni dibhanga kusola kyambote o izwatu yandata mu kizuwa kya ukaza? (Tala we o jifoto.)

¹¹ O kwila wasolo kya o izwatu i wandata mu kizuwa kya ukaza wé? Sé phata eye wamesena kufwama kyavulu. Kate mwene mu ukulu, o ngàyala ni dibhanga exile musola kyambote o izwatu yexile muta mu kizuwa kya ukaza. (Iza. 61:10) Kidi kwila o izwatu i wandata mu kizuwa kya ukaza kiyadifu ni izwatu iwene muta mu kizuwa ni kizuwa. Maji ne kiki watokala kuta izwatu yafwama. (1 Ti. 2:9) Kana kwehela o izwatu yé kukala o kima kyabeta dingi kota mu kizuwa kya ukaza wé.—1 Ph. 3:​3, 4.

12. Mukonda dyahi o diyala ni muhatu atokala kudituna kima kyoso-kyoso kyazembe Nzambi?

¹² Ditune o ima yazembe Nzambi. (Dij. 18:4) Kuma Satanaji mwéne wamutumina o ngongo yiyi, lelu sayi jifesa javulu ja ukaza ene mubhanga-mu ima yavulu yayibha yalungu ni jingeleja ja makutu ni wanga. Jihova ututangela phala ku disandula ku ima yiyi. (2 Ko. 6:​14-17) Se wala ni phata yalungu ni ijila mba ima yene mubhita mu jifesa ja ukaza, tokwesa phala kwijiya se jene jatundu kwebhi ni kumona se jivelusu jebhi ja Bibidya jitena ku kukwatekesa kusola o ima yanda bhita mu kizuwa kyé kya ukaza.

13. Kyebhi o diyala ni muhatu kyatena kukayela o phangu ya Jihova yalungu ni kutambula maujitu?

¹³ O kwila mu dyembu mu watungu o athu ala ni ukexilu wa kubhana maujitu mu kizuwa kya ukaza? Kala muthu ubhana o ujitu bhoso bhwasuku o nguzu yê. Kidi kwila, o jikidistá ene mwaswinisa kukala ni ukexilu wa kubhana, ene asanguluka kyavulu mu kubhanga kiki. (Jisa. 11:25; Ika. 20:35) Kitwatokala kujijidika o athu twa exana mu fesa yetu, kutubhana maujitu mba kubanza kwila se atubhana ujitu kiwate kitadi kyavulu kitwanda sanguluka. Yalungu ni kutambula maujitu, tukayela o phangu ya Jihova. Mu kubhanga kiki, etu twehela akwetu kutubhana maujitu ni muxima woso.—2 Ko. 9:7.

IHI I MUTENA KUBHANGA PHALA KUDIBHANA NI IBHIDI ITENA KUMONEKA?

14. Kibhidi kyebhi kyene mudibhana nakyu o athu kyoso kyaya ni kudisokejeka phala o kizuwa kya ukaza?

¹⁴ Mu kusokejeka o kizuwa kya ukaza, phala o fesa ibhane kijingu kwa Jihova, nange mwanda dibhana ni ibhidi. Mu kifika, kubhonza kubhanga fesa yofele. Phange ya muhatu amwixana Charli, watungu mu ixi ya Ilhas Salomão, wambe: “Kwatubhonzele kyavulu kusola o athu utweji kwa exana phala o fesa. Etu twala ni makamba avulu. Mu ixi yetu athu oso akingila kwa exana!” Mana Tabita, twamutumbula kya kudima wambe: “Mu kididi mu ngatungu, o athu ene mubhanga jifesa jamakota ja ukaza. Kwabhiti ithangana yavulu phala o jitata jetu kuxikina o kima kitwasolo, kwixana ngo 100 ya athu phala o fesa.” Phange ya muhatu amwixana Sala, watungu mu ixi ya Índia, wambe: “Athu avulu awabhela kuta jifoto mu internete. Sayi athu ku mwiji wami angastala kitadi kyavulu mu fesa ya ukaza wâ. Ene abhange jifesa jamakota. Mu kiki ngamono kwila o fesa yami yatokalele kubeta dingi kota.” Mu kiki, ihi itena kukwatekesa yó anda kazala kutolola o kibhidi kiki?

15. Mukonda dyahi o athu anda kazala atokala kusamba jinga?

¹⁵ Kyoso kimuya ni kudisokejeka, sambenu jinga. Enu mutena kusamba kwa Jihova yalungu ni maka oso-oso umwamudibhana nawu. (Fil. 4:​6, 7, tanga we o nota de estudo mu kizwelu “em tudo”) Mutena kumubhinga kikwatekesu phala kusola ni unjimu, phala kutululuka kyoso kimwanda kala ni hele ni kuswina kyoso ki mwanda sola o ima ki idifu ni ima yamesena akwenu. (1 Ph. 5:7) Kyoso kimwanda mona kwila Jihova wamutambwijila o misambu yenu, o kidyelelu kyenu kwa mwene kyanda dibandekesa dingi. Mana Tabita, twamutumbula kudima, wambe: “Eme ni kazola kami, twexile ni woma wakudikwata etu mudyetu ni kudikwata ni jindandu jetu. Mu kiki, ande dya kumateka kuzwela kima kyoso-kyoso kyalungu ni ukaza wetu, twexile hanji musamba. Kyenyiki, twatena kutululuka, twamono we kwila Jihova watukwatekesa.”

16-17. Mukonda dyahi o athu anda kazala atokala kudizwelesa kyambote ni kuxila kwoso?

¹⁶ Dizwelesyenu kyambote ni kuxila kwoso. (Jisa. 15:22) Enu mwabhingi kusola ima yavulu phala o ukaza wenu. Enu mwatokala kusola o kizuwa ki mwanda kazala, kikuxi ki mwanda ngastala, o athu umwanda kwa exana ni kusola ima yamukwa. Ande dya kusola kima, kiyadi kyenu mwatokala kudikunda o jindunge ji mwala naju ni kutonginina o itendelesu ya Bibidya. Mwatokala we kubhana matwi ku jindunge janda mibhana o jiphange jakulu mu nzumbi. Mu kuzwela yalungu ni ima i mwamesena kubhanga, zwelenu ni henda yoso, kanenu kudikwatenena kyavulu mu ibanzelu yenu. Mu kifika, se o jitata jenu amibhinga kima, se o kima kiki ki kituxye, mutena kukibhanga. O kizuwa kiki, kizuwa kya katunda phala ene we. Maji se kimutena kukibhanga, mwajimbulwila ni kuxila kwoso. (Kol. 4:6) Tangelenu ku jindandu jenu kwila mwamesena kuma o kizuwa kya ukaza wenu, kikale kizuwa kya kusanguluka, kizuwa kibhana kijingu kwa Jihova.

¹⁷ Se o jitata jenu ki Jimbangi ja Jihova, kutena kumibhonza dingi kwajimbulwila o ima i mwasolo kubhanga. Maji enu mutena kubhanga kiki, se muzwela nawu ni kuxila kwoso. Sayi phange watungu mu ixi ya Índia amwixana Santos, wambe: “O jindandu jetu amesenene kuta o ijila ya ngeleja yâ mu ukaza wetu. Eme ni kazola kami twabhiti ithangana yavulu phala kwajimbulula o ima i twasolo. Twaxikina kubhanga o ima yatubhingi ene, maji se o ima yiyi kiyeji luwalesa Jihova. Mu kifika, twasolele kya o kudya kutweji dya mu fesa, maji twasolo kuta kudya kwengi phala kusangulukisa o jindandu jetu. Etu kitwembi, kitwakini we mukonda ene kejidila o ima yiyi.”

18. Ihi i mwatokala kubhanga phala kimutandanganye kyavulu mu kizuwa kya ukaza? (1 Kolindu 14:40) (Tala we o foto.)

¹⁸ Disokejekyenu kyambote. Se mudisokejeka kyambote, nange mu kizuwa kya ukaza kimwanda tandanganya kyavulu. (Tanga 1 Kolindu 14:40.) Phange watungu mu ixi ya Taiwan, amwixana Wilson, wambe: “Ande dya kubhixila o kizuwa kya ukaza wetu, twadyongeka ni athu eji tukwatekesa. Twa atangela o ima itwamesenene kubhanga. Twafikisa kyebhi kitweji ku ibhanga, mukonda twamesenene kwila o ima ibhite kyambote.” Phala kuxila o athu andaya mu ukaza wenu, bhixilenu mu kithangana ki mwaxindi.

19. Ihi dingi i mutena kubhanga phala o ima mu kizuwa kya ukaza ibhite kyambote?

¹⁹ Mutena kulenga ibhidi yavulu se mudisokejeka ni kithangana kyasoko. (Jisa. 22:3) Mu kifika, se mu ixi yenu o athu ala ni kifwa kya kumoneka mu ukaza né mwene se ka exana, xinganekenu o ima i mwatokala kubhanga phala kulenga o kibhidi kiki. O jindandu jenu ki Jimbangi ja Jihova, mu atangela o ima yanda bhita mu ukaza wenu ni kwila sayi ijila ya ixi yenu kimwanda ku ikayela. Tangenu nawu o milongi mu jw.org ni dyambu: “O que acontece em um casamento de Testemunhas de Jeová?” Phala o ima ibhite kyambote, mutena kubhinga ku phange wakulu mu nzumbi, nakale “o mutwameni wa fesa.” (Nzw. 2:8) O phange yú, mwatokala kumutangela se mwamesena kwila o ima ibhita kyebhi. Se mubhanga kiki, mwene wanda mikwatekesa phala o kizuwa kya ukaza wenu kibhane kijingu kwa Jihova, ni kikale kizuwa kya kusanguluka.

20. O athu anda kazala atokala kulembalala ihi yalungu ni kizuwa kya ukaza wâ?

²⁰ Mu kuzubha kumona o ima i mwatokala kubhanga kyoso kimuya ni kudisokejeka phala o kizuwa kya ukaza wenu, nange mutandanganya bhofele. Maji mwatokala kulembalala kwila o kizuwa kiki, dimatekenu ngo dya mwenyu wenu wa kusidivila Jihova kumoxi ni kisangu-sangu kyoso. Bhangenu yoso phala kimungastale kitadi kyavulu. Dyelelenu kwa Jihova! Ni kikwatekesu kyê, mwanda tena kusokejeka kizuwa kya ukaza wenu. Kyoso ki mwandaya ni kulembalala o kizuwa ki mwakazala, kimwanda dyela kana, mwanda sanguluka ngo.—Jisá. 37:​3, 4.