Anton Petrus/Moment via Getty Images
KALA KUMESU AZELE!
Okwila Mukithangana ni Mbandu Tutena Kukingila Kubhita Dingi Ita ku Mundu Woso?—Ihi Izwela o Bibidya?
Mu 30 amivu kudima, athu avulu exile mubanza kwila, o ukamba wa jixi ni jixi ku mundu woso wexile mudibandekesa ni kukola dingi. Maji o ima yamubhita mu izuwa yetu, yamubhangesa o athu kulungulula o ibanzelu yiyi.
“Mukonda dya ita yamubhita ku Gaza, o athu alalama kwila o ita yiyi itena kubhangesa o jixi ja akondoloka kudita we mu ita, kala o ixi ya Izalayele kuluwa ita ni Hezbollah mu mbambe ya Libanu,”—Reuters, 6 ya Katatu ka 2024.
“Irão wamubhangesa ibuka ya masoladi kubhânga mu ididi yavulu, o ixi ya Irão yamateka we dingi kubhanga jibomba nuclear. Kumbandu ya mukwa o ixi ya Russia ni China ala kumbandu imoxi ni ixi ya Irão—yoso yiyi phala kudifikidila ni kubhânga ni jixi ala jinguma ja.”—The New York Times, 7 ya Katatu ka 2024.
“O ixi ya Russia yamusuluka ni kubhwikisa ima yavulu mu ixi ya Ucrânia.”—UN News, 11 ya Katatu ka 2024.
“O ixi ya China kikale mumaka alungu ni kitadi, usoladi wamudibandekesa dingi, o ukumbu wamudibandekesa we dingi ku Taiwan, o ukamba wa ixi ya China ni America ki wamuya dingi kyambote, o ima yoso yiyi kifwa itena kubheka ita mu kithangana ni mbandu.”—The Japan Times, 9 ya Katatu ka 2024.
O kwila o Bibidya izuwela yalungu ni ima yiyi yamubhita kumundu mu izuwa ya lelu? O kwila ima yiyi yandabhekesa ita kumundu woso?
O Bibidya yakanena o ima yamubhita mu izuwa ya lelu
O Bibidya ki yakanena o ididi mweji bhita o ita yiyi. Mukidi, o Bibidya yakanena kwila mu izuwa yetu kweji bhita “ita mu ngongo” yoso—Dijingunwinu 6:4.
O divulu dya Daniyele dyakanena kwila mu izuwa isukidilaku kya “kà bhwa o jitembo-phe,” o jinguvulu jabeta mukukala ni kutena mu ngongo eji “dilukula,” nguvulu ni mukwa phala kutumina o ngongo yoso. O kudilukula kuku kwalungu ni kusokejeka masoladi avulu ni kungastala “ulu ni phalata,” mba kitadi kyavulu.—Daniyele 11:40, 42, 43.
O ita yanda bhita
Ande dya ima kumundu kukala kyambote o Bibidya ikanena kwila o kuyibha kwanda dibandekesa dingi. Jezú wakanena kwila “kwanda kala hadi yadikota, kiluwa ibhita tundé ku dimatekenu dya ngongo” (Matesu 24:21) O “hadi yadikota” yiyi yanda ya kate kyanda mateka o ita a ixana Alumajedone o ita yiyi a ilombolola kala “ita ya kizuwa kya dikota kya Nzambi Muteni wa Yoso.”—Dijingunwinu 16:14, 16.
Maji mukidi, o Alumajedone yanda bhulula o athu muveji dya kwabwika. Bhukaxi ka ita yiyi, Nzambi wanda bwika o jinguvulu joso ja mundu jene mubhekela o ita yene mubhwikisa o ima mu ngongo. Phala kwijiya dingi se kyebhi o Alumajedone yanda bheka kutululuka kate kuhadya ni hádya tanga o milongi ya kayela: