Ihi i ua Tokala o ku Bhanga Phala u Tene ku Tendela Kiambote o Bibidia?

O Bibidia i tambuijila

O Bibidia ilondekesa ihi i ua tokala o ku bhanga phala ku i tendela kiambote. O njimbu ia Nzambi i tu sanga mu Bibidia ki i ‘lembua ku ku tetulukila, ki kia kala ué bhua lebha.’—Matendelelu 30:11.

Ima i ua tokala o ku bhanga phala ku tendela kiambote o Bibidia

1. Kala ni ibanzelu iambote. Xikina o Bibidia kuma Mak’â Nzambi. Kala u muthu ua lenduka mukonda Nzambi ua iibhila oso a di zangeleka. (1 Tesalonika 2:13; Tiiaku 4:6) Maji kana ku xikina ni lusolo ioso i u tanga mba uivua sé hanji ku i tokuesa kiambote. Nzambi ua mesena kuila eie u mu bheza ni ‘kilunji kia fuama.’—Loma 12:1, 2.

2. Samba mu ku bhinga unjimu. O Bibidia mu divulu dia Jisabhu 3:5, di zuela: “Kana ku dielela ngó o kilunji kié.” Kienhiki, ‘bhinga jinga Nzambi,’ unjimu phala u tene ku tendela o Bibidia.—Tiiaku 1:5.

3. Tanga o Bibidia izuua ioso. Ua-nda tambula mabesá avulu se u tanga o Bibidia izuua ioso.—Josuué 1:8.

4. Sola o milongi. O ku sola o milongi ni ku i tokuesa mu Bibidia, ukexilu uambote u tena ku kuatekesa o muthu kuijiia ihi i zuela o Mikanda Ikola. Mateka ni ku di longa ‘o ima iofele’ iedi kala lete, kiene ngó ki u bhita mu kudia ‘kua adiakime.’ (Jihebeleu 6:1, 2) Ua-nda mona kuila o jivelusu ja Bibidia ja mu di jimbulula mudiâ, katé muene ni jimbandu ja “bhônzo o ku ijiia.” — 2 Phetele 3:16.

5. Bhinga ki kuatekesu. O Bibidia i tu suínisa ku bhinga kikuatekesu kua akuetu. (Ikalakalu 8:30, 31) O Jimbangi ja Jihova ene mu kuatekesa o athu mu ku a longa o Bibidia sé ku bhinga kitadi. Kála o Jikidistá ja dianga, ene edikisa ni ku lombolola bhu kaxi ka Mikanda Ikola phala ku kuatekesa o athu kuijiia se mu kidi ihi i longa o Bibidia.—Ikalakalu 17:2, 3.

Eie ku bhingi

1. Ku kala muthu ua di longo kiavulu. O 12 kia jipoxolo ja Jezú akexile mu tendela kiambote o Mikanda Ikola, ia akexile mu longa akuâ sumbala o athu akexile mu a mona kala “ka zubha ku dilonga madivulu.”—Ikalakalu 4:13.

2. Ku kala ni kitadi. Eie ku bhingi ku futa phala kuijiia o Mak’â Nzambi. Jezú uambela jixibulu jê, uixi: “Mua tambula ngoho, bhenenu ngoho.”—Matesu 10:8.