KIKWATEKESU PHAL’O MWIJI
Kyebhi ki Ukwatekesa Mon’é Kukala ni Jinota Jambote Muxikola
Xinganeka kwila mon’é wedi kala kawabhela kuya kuxikola, mwene kawabhela kudilonga né kubhanga o ikalakalu yabhata. Mukonda dya kiki ihi ibhita? Ojinota jê jitola, ukala we ni wendelu wayibha. Mu kiki kyebhi ki utena kukwatekesa mon’é kukala ni jinota jambote muxikola?
Ihi i wabhingi okwijiya?
Okumujijidika kuvudisa ngó dingi omaka. Okujijidika mon’é, kumubhangesa kukala ni hele muxikola ni kubhata! Phala kutululuka, mwene wandatanga makutu, wandasweka ojinota jofele, mwene wandasoneka mukalata ka jinota muveji yakukubhanaku eye mba wandakala mufonga muxikola. Omaka avula dingi.
Okumubhana ujitu, kikikwatekesu kyatokala. Sayi tata amwixana Mandele, wambe kiki: “Phala kuswinisa mon’etu wamuhatu, twasoto kumubhana ujitu kyoso kyakexile mukatula jinota jambote. Maji kiki kyakexile kumubhangesa kuxinganeka ngó ku ujitu. Kyoso kyakatula nota yofele, mwene waluwala kana mukonda dya kukatula nota yofele maji waluwala mukonda dya kukamba kutambula o ujitu.”
Okutatela o alongexi, kikwandakwatekesa omona. Mon’é wandafika kwila phala kukatula ni jinota jambote muxikola kikubhingi kubhanga nguzu. Mwene wejidilonga kukala mutatela akwâ mukonda dya itondalu yê ni kukingila kwila akwâ abatula omaka mukididi kyê. Kiki kilombolola kwila, mon’é wejibotesa kithangana kyambote kyakudilonga uhete watokala phala okitala kya wadyakime, o uhete wakuxikina o ibhangelu yê kikale se yambote mba yayibha.
Ihi i watokala okubhanga?
Langa o ixinganeku yé. Se ukala ni njinda, sota kithangana kyengi phala kuzwela ni mon’é yalungu ni jinota. Sayi tata amwixana Brett, wambe kiki: “Muhatu wami n’eme twene mutena kuditunda kyambote kyoso kituximbakata ni kukwatela henda ya mon’etu.”
Kitumu kya Bibidya: “Muthu ni muthu-phe a lenguluke kwivwa, maji a kokoloke kuzwela, a kokoloke o kutêma.”—Tiyaku 1:19.
Sota kwijiya omaka alaku. O ibhangesa kyavulu kukatula jinota jofele, okilokalalu, kutunda xikola kuya xikola, wôma wakubhanga ezame, maka kumwiji, kukamba kuzeka kyambote, kukamba kusokejeka kyambote o ima mba okulanduka. Kana kubanza kwila mon’ê kimonya kyahatu.
Kitumu kya Bibidya: “Muthu woso ubetekela kyambote omaka, wandakusanga kubhanduluka.”—Jisabhu 16:20.
Kala ni kididi kyatululuka phala mon’é kudilonga. Kala ni kithangana kyakubhanga o ikalakalu yabhata ni kudilonga. Kala ni kididi phala mon’é kukalamu ni kubhanga o ikalakalu yabhata sé ilandukisu (sé kilandukisu kya mutelembe wa izunzumbya mba wakafwetele). Wanuna o ikalakalu mutumbandu twofele phala kukwatekesa mon’é kutubhanga sé kulanduka . Hector, tata mukwa Alemanya wambe kiki: “Se okizuwa kya polova kizukama, kala kizuwa tubhitulula milongi muveji yakukingila kudilonga ngó mukizuwa kyasukina.”
Kitumu kya Bibidya: “Ima yoso yala ni kithangana kyê.”—Ndongixi 3:1.
Swinisa omona okudilonga. Se mon’é wijiya ombote ijila mukudilonga kindala, mwene wandakala dingi ni vondadi yakudilonga. Mukifika, okwijiya omatematika, kwandamukwatekesa kwijiya kulanga kyambote okitadi kyê.
Kitumu kya Bibidya: “Sota unjimu, sota kutongoloka. . . . Zangeleka unjimu.”—Jisabhu 4:5, 8.
Ndunge: Kwatekesa mon’é kubhanga o ikalakalu yabhata, maji kana ku ibhanga mukididi kyê. Mandele wambe kiki: “Mon’etu wamuhatu, muveji dya kusota kutambwijila o ikalakalu yabhata mwene ubheka, mwene wadyelele mukwijia kwetu.” Longa mon’é kubhanga o ikalakalu yabhata mwene ubheka.