Kyebhi Kimutena Kulonga Kyambote Otwana Twenu

• Ihi iwabhingi okwijiya

• Ihi iwatokala okubhanga

• Ihi izwela ojitata

Ihi iwabhingi okwijiya

Mu izuwa yalelu, sayi miji otwana twazukama dingi kujitata jâ, kyoso kyabhindamena itendelesu, enemubhinga okikwatekesu kujitata jâ. Maji kumiji yamukwa, o twana asola kubhinga okikwatekesu kumakamba mâ.

Kyoso otwana kyabhinga o itendelesu kumakamba mâ, amulondekesa kwila kenemuxila ojitata jâ. Mukidi, kyoso otwana kyakula anga akituka minzangala, ojitata adivwa kwila katena dingi kwabhana itendelesu. Kiki ki kima kyakudiwana! Kyoso otwana kyabhita ithangana yavulu ni makamba mâ, ene adivwa kwila o amwasasa omakamba mâ, muveji dya jitata jâ.

Mukonda dyahi otwana adikwatenena dingi kumakamba mâ muveji dya kudikwatenena kujitata jâ? Tumone se mukonda dyahi.

• Xikola. Kyoso otwana kyabhita ithangana yavulu ni jikoleka jâ, ene amateka kusuwa dingi o ixinganeku ya jikoleka muveji dya kusuwa o ixinganeku ya jitata jâ. Kyoso kyakituka minzangala, ene asuwa dingi o makamba mâ.

  

• Kukamba kubhita kithangana kyasoko ni twana. Mu miji yavulu, kyoso otwana kyatunda mu xikola anga abhixila kubhata, kene musanga muthu kubhata mukonda nange ojitata ala hanji kusalu.

• Ima yawabhela ominzangala. Kyoso otwana kyakituka minzangala, ene athandanganya dingi ni ukexilu wakuzwela, wakuzwata ni kubhanga o ima kala ominzangala yamukwa. Phala ene o ima izwela omakamba yala dingi ni valolo, o izwela ojitata jâ ndenge.

• Wenji. Omatenda enemubhanga dingi o itonokenu phala ominzangala muveji dyakubhanga phala o adyakime, kiki kyene mubhonzesa dingi ojitata kudibhana kyambote ni twana twâ. O dotolo Robert Epstein wambe: “Se kikwexile o itonokenu yawabhela ominzangala, omatenda keji nganyala kitadi kyavulu, eji kwajika.”a

Ihi iwatokala okubhanga

• Suluka mukukolesa o ukamba wé ni twana twé.

  O Bibidya yamba: “Maka u ngala ku ku tendelela lelu’idi u ma lunda ku muxima wé. An’é u a longa mwene o ku a bhaka ni ku a kumbidila; o ki u xikama m’onzo yé, banza maka enyá; o ki u kala mu kwenda njila, enda ni maka enyá; o ki u zeka, zeka ni maka enyá; o ki u balumuka ku kilu, kwata maka enyá.”—Matendelelu 6:6, 7.

  Otwana atena kukala ni ukamba ni minzangala ni akwa, maji o itendelesu ibhana ene ki isoko ni itendelesu ibhana ojitata. Maji sayi njimbu yambote: O jingijiye amba kwila twana twavulu axila ojitata jâ, ya amesena kubhanga o ima ya asangulukisa. Se ukala ni ukamba wambote ni twana twé, ene andakusuwa dingi muveji dya kusuwa o makamba mâ.

  

  “Sota kubhita ithangana kumoxi ni twana twé izuwa yoso, bhangenu ima kumoxi kala o kulamba, kusukula, kukomba mba kikalakalu kyengi. Bhangenu ima kumoxi kala, kujokala, kutala jifilime ni mutelembe wa izuzumbya. Phala kukala ni ukamba wambote ni twana twé, eye watokala kubhita nawu kithangana kyasoko!”—Lorraine.

• Kana kwehela otwana twé kukala ngó ni ukamba ni minzangala ni akwa.

  O Bibidya yamba: “Wôwa wa nyenganana ku muxima wa mona-ndenge.”—Jisabhu 22:15.

  Sayi jitata asanguluka mukumona kwila, otwana twâ ala ni makamba avulu. Sumbala kima kyambote omunzangala kukala ni makamba akitala kimoxi, maji wabhingi we kukala ni ukamba ni adyakime phala kumukwatekesa kukala ni kilunji. Ominzangala ni akwa katena kubhana o itendelesu ni kikwatekesu kyabhindamena ominzangala kala kyejibhanga ojitata ja henda.

  “Sumbala ominzangala ala ni kwijiya, maji okwijiya kwala naku kikwasoko phala kukwatekesa minzangala ni akwa kusola kyambote o ima kumyenyu yâ. Kyoso ominzangala kyakayela o itendelesu yajitata jâ, ene akula kyambote anga akala ni kilunji.”—Nadia.

• Longa kyambote otwana twé.

  O Bibidya yamba: “Woso wenda ni jinjimu, u biluka njimu.”—Jisabhu 13:20.

  Kyoso twana twenu kyaya ni kukula atena kukatula mbote mukubhita kithangana kyasoko ni enu. Mwabhana phangu yambote.

  “Ojitata ene ophangu yambote phala otwana. Kyoso ojitata kyaxila ni kutalatala otwana twâ ni henda, kyandakula ene andakayela ophangu ya jitata jâ.”—Katherine.