Mukanda wa Kibuka kya Utuminu

Muboki wa kazola wa Utuminu:

Xinganeka kwila eye ubhanga mbandu ya jipoxolo ala ku Mulundu wa Midiva. Anga Jezú umoneka bhu pholo yé. Ande dya kubanda kudyulu mwene, wamba: “Kyoso o nzumbi ikôla ki yanda kwiza kuthandu dyenu, mwanda tambula kutena ni kukala mu jimbangi jami mu Jeluzaleme, mu Judeya yoso, mu Samadiya, katé ni ku maxokololo a jixi.” (Ika. 1:8) Kyebhi ki weji divwa?

Nange ukala ni hele, mukonda kiki kikalakalu kya katunda. Nange udibhwidisa: ‘Kyebhi etu tu maxibulu twatolo, twandatena kubhana umbangi katé “ku maxokololo a jixi”?’ Nange ulembalala we o izwelu ya Jezú mu usuku ande dya kufwa: “O mubhika katúndu ngana yê. Se a ngi zukutisa, enu wenu anda mi zukutisa, se abelesela o maka mami, ene anda belesela we o maka m’enu. Maji anda mi bhanga o ima yoso yiyi, mukonda dya dijina dyami, kuma kejiya Yó wa ngi tumikisa.” (Nzw. 15:20, 21) Kuxinganeka mu izwelu yiyi, itena ku kubhangesa kudibhwidisa: ‘Kyebhi ki ngandatena kubhana umbangi wakatunda sumbala ni izukutisu?’

Lelu, tutena kukala we ni jiphata jiji. Kuma tu Jimbangi ja Jihova, o kikalakalu kyetu kya lungu we ni kubhana umbangi katé “ku maxokololo a jixi,” ku athu a “akwá jixi joso.” (Mat. 28:19, 20) Kyebhi ki tutena kubhanga o kikalakalu kiki, sumbala ni izukutisu?

O divulu dya Ikalakalu ditubhana phangu iswinisa ya lungu ni kyebhi o jipoxolo ni jiphange mu kilunga ku hama ya dyanga, akumbidila o kikalakalu kya abhana Jihova. O divulu didi di wamutanga adibhange phala ku kukwatekesa kumona ni kuxinganeka mu izulukutu yala mu divulu dya Ikalakalu. Wandadiwana mu kwijiya kwila ima yavulu yabhiti ni jiselevende ja Nzambi ku hama ya dyanga, yene we yene mu dibhana nayu o jiselevende ja Nzambi lelu. O kusokesa o kikalakalu kyetu ni kya Jikidistá ku hama ya dyanga, kyanda tukwatekesa kumona kwila kitwasoko ngó mu ukexilu wa kuboka, maji ni kyebhi ki twadisokejeka phala kubhanga o kikalakalu kiki. Kudisokesa mu ukexilu yu, sé phata kwanda kolesa o kixikanu kyé kya kwila Jihova wamukwendesa o mundu wê mu ixi.

Twamusamba ni muxima woso phala kyoso ki tuya ni kudilonga o divulu dya Ikalakalu, o kixikanu kyé kikole mu kudyelela mu kikwatekesu kya Jihova ni kya nzumbi ikôla. Twamesena kwila uswina mu kusuluka ‘kubhana umbangi’ walungu ni Utuminu wa Nzambi ni kukwatekesa o athu kubhuluka.—Ika. 28:23; 1 Ti. 4:16.