“Mua kà Ngi Kalela Jimbangi”

1, 2. (a) Nanhi o “mbangi ia fiiele ia kidi”? (b) Ihi i lombolola o dijina dia Jezú, ni ihi ia bhange muéne phala o Jijudé ku kala dingi ni ukamba uambote ni Nzambi?

KIOSO Jezú kia kexile ku mu fundisa, muéne uambe sé uôma kua nguvulu ia Loma Pônsio Pilatu, kuila: “Eme o kuzuela o kidi, kiene kia ngi vualela, kiene ue ki ng’ejila mu ngongo.” (Tanga Nzuá 18:33-37.) Mu ku bhita mivu, o Poxolo Phaulu uambe kuila, Jezú Kristu ‘ua bhanene umbangi uambote, bhu pholo ia Pônsio Pilatu.’ (1 Tim. 6:13) Etu tuala ku mundu uezala ni unguma a mu u tumina kua Satanaji. Phala ku suluka ni ku bhana umbangi, tua tokala ku suína kala kia suínine Jezú, o “mbangi ia fiiele ia kidi.”—Dij. 3:14.

² Mukonda dia ku mu vuala ku muiji ua ji Judé, Jezú uexile mbangi ia Jihova tundé kia mu vualele. (Iza. 43:10) Muéne o mbangi ia Nzambi ia beta dingi kota. Jezú ua bhanene valolo iavulu ku di lomboluelu dia dijina diê. Kioso o anju kia zuela kua Zuze, tata ia Jezú mu ixi kuila, Madiia uemitine bhu kaxi ka nzumbi ikola, o anju ua mu tangela dingi: “Muène uanda kuvuala mona ua diiala, eie u mu luka dijina dia Jezú, mbata muène ua kà bhulula athu’ê ku ituxi iâ.” (Mat. 1:20, 21) O dijina dia Jezú mu dimi dia Hebalaiku, di lombolola “Jihova Muéne o Mubhuludi.” Jihova bhu kaxi ka Jezú ueji bhulula o athu oso ku ituxi ni kufua. (Mat. 10:6; 15:24; Luka 19:10) Muéne ua boko ia lungu ni Utuminu ua Nzambi. Marku ua soneka: “Jezú uiza ku Ngalileia ni kutanga o maka ma Njimbu Iambote ia tundu kua Nzambi, uixi: O thembu ia tenena kiá, Utuminu ua Nzambi ua zukama. Dielenu o ituxi ienu, mu xikane o Njimbu Iambote i mi bhana o kubhuluka.” (Mar. 1:14, 15) Jezú ua kexile mu boka sé uôma ni ku suína kuoso. Muéne ni ku suína, ua fundisa o alongexi a makota a Jijudé, kiki kiene kia bhangesa o ji mesene jiji ja Jijudé o ku mu jibha.—Mar. 11:17, 18; 15:1-15.

“O IMA IA MAKOTA IA NZAMBI”

3. Mu ku bhita izuua itatu kioso Jezú kiafu, ihi ia bhiti?

³ Mu ku bhita izuua itatu kioso kiafu Jezú, kua bhiti kima kia madiuanu! Jihova ka mu fukununa ni mukutu ua xitu, maji ua mu fukununa ni mukutu ua nzumbi. (1 Phe. 3:18) Jezú ua londekesa ku maxibulu mê kuila a mu fukunuine kioso kia tukuluka kua ene ni mukutu ua xitu. Mu ku bhita kizuua kimoxi kioso kia mu fukununa, muéne ua tukuluka bhu maxibulu avulu mu kitanu kia ji veji.—Mat. 28:8-10; Luka 24:13-16, 30-36; Nzuá 20:11-18.

4. Ihi ia bhiti kioso Jezú kia tukuluka bhu kaxi ka maxibulu mê, ni ihi ia tumina o ku bhanga?

⁴ Kioso Jezú kia tukuluka mu veji ia katanu, o jipoxolo jê ni athu a mukuá akexile kumoxi. Muéne ua a kuatekesa ku tendela kuila, o kufua kuê ni difukunukinu diê, a i kanene kiá mu Mak’â Nzambi. Mu disukilu dia kiônge kiki, jezú ua zuela ku maxibulu mê o kima kia tokalele o ku bhanga. Muéne uambe kuila ‘o Njimbu ia ku diela o ituxi, ni ku i tambuila o muloloki, a i fumanese mu dijina diê mu jixi joso, tundé kiá mu Jeluzaleme.’ Muéne uambe dingi: “Enu-phe mu jimbangi ja ima ienhi’ii.”—Luka 24:44-48.

5, 6. (a) Mukonda diahi Jezú uambe kuila, “Mua kà ngi kalela jimbangi”? (b) O maxibulu a Jezú eji bhana umbangi ua lungu ni ihi?

⁵ Mu ku bhita 40 a izuua, kioso Jezú kia tukuluka mu veji ia sukina, o ji poxolo a tendela kiambote o kima kia tumu Jezú o ku bhanga. Muéne uambe: “Mua kà ngi kalela jimbangi, ni mu Jeluzaleme, ni mu Judeia ioso, ni mu Samádia, katé ni ku maxokololo ma jixi.” (Ika. 1:8) Mukonda diahi Jezú uambe kuila: “Mua kà ngi kalela jimbangi,” mu veji dia ku zuela kuila, mua-nda kala Jimbangi ja Jihova? Jezú hinu ua zuela kuila mua-nda kala Jimbangi ja Jihova, maji muéne ka zuele kiki, mukonda o athu a kexile mu zuela nau, exile akua Izalaiele mu kiki, ene exile kiá jimbangi ja Jihova.

⁶ Mu kiki, o maxibulu a Jezú eji mateka o ku boka o njimbu ia kuila, Jihova bhu kaxi ka Jezú ua kexile mu bhulula o athu oso. O ukexilu iú ua ku bhulula, ua betele kota, o ukexilu ua Jihova ua ku bhulula o akua Izalaiele mu ukulu, ndenge. O kufua ni difukunukinu dia Jezú Kristu, kua bhulula o athu ku ituxi ni ku kalunga. Kioso o maxibulu a Jezú kia a undu ni nzumbi Ikola ku Pendekoxi ku muvu ua 33 K.K., ene a mateka ku bhana umbangi ua lungu ni “ima ia makota ia Nzambi.” Athu avulu evu o njimbu íii, a diela o ituxi iâ ni ku xikana mu sata ia Jezú. Jezú kioso kia mu fukununa, Jihova ua mu bhana dingi kutena ku diulu, bhu kaxi kê, ua kexile mu bhulula athu avulu mu ixi.—Ika. 2:5, 11, 37-41.

‘KU SIDIVILA NI KU BHANA O MUENHU UÊ MU KU BHULULA O MUNDU’

7. O izulukutu ia bhiti ku Pendekoxi ia 33 K.K., ia londekesa ihi?

⁷ O izulukutu ia bhiti ku Pendekoxi ku muvu ua 33 K.K., ia londekesa kuila, Jihova ua xikinine o sata ia iuka ia Jezú phala ku bhulula o mundu ku kituxi. (Jihe. 9:11, 12, 24) Jezú ua zuela kuila muéne kejile phala “kukala ni athu a mu bhikila muène, maji muène-ku kubhika, ni kubhana o muenhu uê mu kukula mundu.” (Mat. 20:28) O “mundu” eji katula mbote mu sata ia Jezú, keji kala ngó o Jijudé a diele o ituxi. Mu veji dia kiki, Nzambi ua mesena kuila “athu oso a bhuluka,” mu kuijiia kuila o sata ia ku kula i “katula o ituxi ia mundu!”—1 Tim. 2:4-6; Nzuá 1:29.

8. Kiebhi o maxibulu a Jezú kia tena o ku boka o njimbu, ni ihi ia tenene o ku bhanga?

⁸ O kuila o maxibulu a Jezú eji tena ku suluka ku bhana umbangi ua lungu ni muéne ni ku suína kuoso? Sé-ku phata kuila ene a boko o njimbu ia lungu ni muéne, maji ka ki bhangele mu nguzu iâ. O nzumbi ikola ia Jihova ia bhana nguzu phala ku suluka ni ku bhana umbangi. (Tanga Ikalakalu 5:30-32.) Mu ku bhita 27 a mivu, kioso kia bhiti o Pendekoxi ia 33 K.K., “o ngolokela ia kidi, ia Njimbu Iambote,” a i boka ku Jijudé, mu Ifuxi kejidile Nzambi ni “mu ngongo ioso.”—Kol. 1:5, 23.

9. Kala kia ki kanene, ihi ia bhiti mu kilunga kia Jikidistá?

⁹ Maji mu ku bhita kithangana, o athu mu Kilunga a kexile mu bhana milongi ia makutu. (Ika. 20:29, 30; 2 Phe. 2:2, 3; Juda 3, 4) Kala kia kanene Jezú, o ulongelu iú ua makutu ua bokona mukonda dia “Dimonho,” Satanaji ueji fidisa o athu kuijiia o kidi katé ku “dizubhilu dia mundu.” (Mat. 13:37-43) Mu ku suluka, Jihova ueji tumbika Jezú kala Sobha ia ngongo ioso. Kiki, kia bhiti ku mbeji ia Kamusasadi ka 1914, kioso kia mateka o “izuua isukidila-ku” ia mundu ua Satanaji.—2 Tim. 3:1.

10. (a) O Jikidistá a a undu akexile mu boka ia lungu ni muvu uebhi? (b) Ihi ia bhiti mu mbeji ia Kamusasadi ka 1914, ni kiebhi ki tuejiia o ima íii?

¹⁰ Kioso kia bhiti 30 a mivu, ande dia mbeji ia Kamusasadi ka 1914, o Jikidistá a a undu a mateka o ku boka kuila, o Utuminu ua Nzambi ueji mateka o ku tumina ku muvu iú ua katunda. O kuijiia kuâ, kua lungile ni milongi i tu sanga mu divulu dia Daniiele, ia lungu ni muxi ua dikota a u batuile, maji mu ku bhita “sambuadi dia jithembu” ueji kula dingi. (Dan. 4:16) Jezú uexana o kithangana kiki kala “o thembu ia akua jixi jengi” mu kikanenu kia bhangele kia lungu ni ku tukuluka kuê ni “dizubhilu dia mundu.” Tundé ku muvu ua 1914, o izulukutu i bhita ku mundu i londekesa kuila, Jezú muéne o Sobha. (Mat. 24:3, 7, 14; Luka 21:24) Lelu, “o ima ia makota ia Nzambi,” i tu boka ia lungu ué ni kidi ki londekesa kuila Jihova ua tumbika Jezú kala sobha ia Utuminu ua Nzambi ku muvu ua 1914.

11, 12. (a) Ihi ia bhiti ku muvu ua 1919? (b) Ihi ia mateka o ku bhita ku muvu ua 1935? (Tala o foto ia dianga.)

¹¹ Kioso Jezú Kristu kia mu tumbika ku Usobha, ku muvu ua 1914, muéne ua mateka o ku bhulula o abhezi’ê a fiiele ku ubhika ua “Babilónia ia dikota.” (Dij. 18:2, 4) Ku muvu ua 1919, kia bhiti o Ita ia Dianga ia Bhitile ku Mundu Uoso, o Ji kidistá a a undu a kexile ni ufôlo ua ku boka ku mundu uoso. Ene a bhana umbangi ua lungu ni ku kula kua Jezú ni njimbu iambote ia Utuminu ua Nzambi. Mukonda dia kiki, athu avulu eza mu kuijiia o kidi ni kua unda phala ku tumina kala jisobha ku diulu kumoxi ni Kristu.

¹² Ku muvu ua 1935, Kristu ua mateka o ku ongeka o “jimbudi jamukuá.” Lelu, saí athu avulu a tokala ku jimbudi ja mukuá ku mundu oso. Ene ni Jikidistá a a undu, a kaiela o phangu ia Kristu ia ku bhana umbangi ku akuâ. O jimbudi ja mukuá ejiia kuila, a tena ngó ku bhuluka se a dielela ku sata ia ku kula ia Jezú. Ene ejiia kuila se a kolokota mu ku boka o njimbu iambote, ni ku bhakula o mienhu iâ phala ku sidivila Jihova, a-nda tena ku bhuluka mu “hadi ia dikota” ni ku kala ku muenhu ku mundu ua ubhe ua Nzambi.—Nzuá 10:16; Dij. 7:9, 10, 14.

‘BOKA O NJIMBU IAMBOTE NI KU SUÍNA KUOSO’

13. Mukonda tu Jimbangi ja Jihova, ihi i tua mesena o ku bhanga ni kiebhi ki tu tena o ku kaiela o phangu ia Jikidistá ku hama ia dianga?

¹³ Ujitu ua dikota o ku bhana umbangi ku athu ua lungu ni “ima ia makota” iene mu bhanga Jihova, ni ima ia kanena o ku bhanga ku hádia. Mu kidi, kua bhingi ku kolokota phala ku suluka ku bhanga o kikalakalu kiki. Athu avulu a dituna o njimbu iambote mba a tu zukutisa. Se kiki kia mu bhita n’etu, tua tokala ku kaiela o phangu ia poxolo Phaulu ni makamba mê. Phaulu uambe: “maji etu-phe tu bhua uôma mua Nzambi ietu mu ku mi tangela enu o Njimbu Iambote ia Nzambi ni kubângama kuoso.” (1 Tes. 2:2) Tua tokala ku kolokota mu kikanenu ki tua bhange kioso ki tua di bhakula kua Nzambi. Tua mesena ku kala Jimbangi ja Jihova katé kia-nda buika o mundu iú ua Satanaji. (Iza. 6:11) Etu ki tu mesena ku bhanga kiki mu nguzu ietu. Kala kia bhangele o Jikidistá ku hama ia dianga, tua tokala ku bhinga o kikuatekesu kia nzumbi ia Jihova, phala ku tu bhana “o nguzu i lenda ioso.”—Tanga 2 Kolindu 4:1, 7; Luka 11:13.

14, 15. (a) Ibhidi iahi ia kexile mu bhita na-iu o Jikidistá ku hama ia dianga ni kiebhi Phetele kia a suínisa? (b) Ihi i tua tokala o ku lembalala se a mu tu zukutisa mukonda dia ku kala tu Jimbangi ja Jihova?

¹⁴ Lelu, athu avulu amba kuma Jikidistá, maji a “dituna [Nzambi] mu imbamba iâ ia bhanga. Ala ifusa, a xibhaki, imbamba ioso ia mbote a i tokoka.” (Tito 1:16) Ku hama ia dianga athu avulu ka kexile mu bheza Nzambi mu ukexilu ua tokala. Mu kidi, o Jikidistá ja kidi a a zembele kiavulu ku athu a tungile bhu kaxi kâ. Phala ku suínisa o Jikidistá jiji, o poxolo Phetele uambe: ‘Se a mi bhana malebhu mu kukaiela o dijina dia Kristu, mua zediua. Mukonda o nzumbi ia Nzambi, ia mi tula ku thandu.’—1 Phe. 4:14.

¹⁵ O kuila lelu o Jimbangi ja Jihova a mu a ‘bhana malebhu mu kukaiela o dijina dia Kristu?’ Kiene muéne, mukonda etu ki tu bhana ngó umbangi ua lungu ni Jihova, maji tuene mu tangela ué kuila, Jezú muéne o Sobha ia Utuminu ua Nzambi. Jezú a mu zukutisile ué mukonda dia ku kala mbangi ia Jihova. Muéne uambe ku maxibulu mê: “Eme ngeza mu dijina dia Tata iami, enu-phe ki mu ngi tambulula.” (Nzuá 5:43) Mu kiki, se a ku zukutisa mukonda dia ku bhana umbangi, di lembalale kuila, Nzambi u tena ku ku kuatekesa bhu kaxi ka nzumbi iê ikola.

16, 17. (a) Kiebhi kia divua o mundu ua Jihova ia lungu ni kikalakalu kia ku boka? (b) Ihi i ua tokala o ku bhanga?

¹⁶ Di lembalale ué kuila, athu avulu a mu kuijiia o kidi ku mundu uoso. Kididi kioso-kioso ku tu kala, né muene mu ididi mu tua boko kiá kiavulu, saí athu a bhindamena o kuívua o njimbu iambote ia ku bhuluka. Mu kiki, kioso ki tu sanga athu a mesena kuijiia o kidi, tua tokala ku bhanga ioso phala ku vutuka dingi mu kua kunda ni ku bhanga ioso phala ku mateka kua longa o Bibidia. Mu suluka, tu a kuatekesa kuijiia kiambote Jihova phala ene ku bhakula o mienhu iâ kua muéne ni kua batizala. Kiebhi ki u divuua kioso ki u bhanga o kikalakalu kiki? Sarie mbangi ia Jihova mu 60 a mivu ua tungu ku ixi ia África do Sul uambe: “Ngi sakidila kiavulu, mukonda bhu kaxi ka sata ia kukula kua Jezú, ngi tena ku kala ni ukamba uambote ni Jihova, o Suke-ku ia ngongo ioso, nga sanguluka ué mu ku ijidisa o dijina didi dia dikota.” Muéne ni munumi’ê Martinus, a kuatekesa kitatu kia an’ê ni athu a mukuá ku kala abhezi a Jihova. Muéne uambe dingi: “Ki bhuala kikalakalu ki bhekela dingi o ku zediua kua kidi, mukonda bhu kaxi ka nzumbi iê Jihova u tu bhana o nguzu phala ku suluka ni kikalakalu kiki, ki bhulula mienhu.”

¹⁷ Ki kale a tu batizala kiá mba kana, tua tokala ku bhana valolo ku ujitu ua ku bhanga mbandu ku kibuka a kiexana Jimbangi ja Jihova. Mu kiki, kolokota ku bhana umbangi kumoxi ni mundu ua Nzambi ku mundu uoso ni ku kala muthu ua zele ku mundu iú ua Satanaji. Se u bhanga kiki, ua-nda bhana kijingu kia dikota kua Tata ietu ia diulu, Jihova.