Mbandu 3
Ndolo ku Muxima—Se Tua ‘Dikuata ni Phang’etu’
“Saí phang’etu mu kilunga ua ngi tatela kuila nga nhana o kitadi kiê. O jiphange jamukua kievu o maka enhá, akexile mu ngi longolola. Mu kubhita kithangana o phange ua ngi tangela kuila, a muambela kuma k’eme nga katuile o kitadi. Sumbala muéne ua ngi bhingi muloloki, maji eme nga xinganeka kuila nuka ngeji tena ku mu loloka, mukonda dia jisonhi ja ngi kuatesa.”—Linda.
O kuila ua bhitile kiá mu maka kála a bhiti nau Linda, a mu kuatesa o jisonhi kua phang’etu? Saí jiphange ehela kuila o ima ia a bhange o jiphange i a fidisa kuia mu kilunga. O kuila kia mu bhita ué n’eie?
Nanhi-phe u Tena “ku tu Batukisa ku Henda ia Nzambi?”
Tuejiia kuila kiene mu bhonza kuloloka phang’etu ua tu te kituxi. Maji tuejiia ué kuila o Jikidistá a tokala ku dizola mudiâ. (Nzuá 13:34, 35) Se o ua tu te kituxi phang’etu mu kilunga, o ndolo ietu ivula dingi.—Jisálamu 55:12.
Sé phata, o Bibidia izuela kuila saí ithangana o Jikidista ‘a di kuata mudiâ.’ (Kolose 3:13) Maji kioso kiki ki bhita n’etu, ki tena ku bhonza ku dibhana ni maka enhá. O kuila saí kima ki tena ku tu kuatekesa? Tanga itumu itatu mu Bibidia:
Tat’etu ia diulu uejiia o ima ioso. Jihova u mona o ima ioso i bhita mu ngongo, ni ndolo ijila mu ima ia iibha ia tu bhanga. (Jihebeleu 4:13) Jihova uivua o ndolo i tu kala na-iu. (Izaia 63:9) Muéne kehela kuila “phaxi,” mba kima kia mukuá—mba selevende iê ia mukua—u tu “batukisa ku henda ia Nzambi.” (Loma 8:35, 38, 39) Ki kiene ué ki tua tokala o ku bhanga, o kuila tuehela kima kioso-kioso mba muthu u zanga o ukamba uetu ni Jihova?
O kuloloka ki kulombolola ku xikina o kituxi. Kioso ki tu loloka ió a tu te kituxi, ki kilombolola kuila o kituxi kia tu té, ki ki tu kate, mba tua xikina o kituxi. Ijiia kuila Jihova ka xikina o kituxi, maji muéne u loloka o muthu, se o muthu u diela o ituxi iê. (Jisálamu 103:12, 13; Habakuke 1:13) Kioso muéne kia tu suínisa kuloloka akuetu, muéne ua mu tu bhinga ku kaiela o phangu iê. Muéne kene mu kuila “u ku tatela phonzo.”—Jisálamu 103:9; Matesu 6:14.
Tu divua kiambote se ki tu kala ni unguma ku muxima. Kiki ki bhita kiebhi? Xinganeka mu kifika kiki. Ua kuata ditadi, dia neme bhofele, u di kuata bhu maku ni lukuaku lu ua sununa. Nange ki kieji ku bhonza ku di kuata mu kithangana kiofele. Abha se u di kuata mu ithangana iavulu? Ithangana ikuxi i ueji tena kukuata o ditadi—ola imoxi, anga ji ola javulu? Sé phata, o lukuaku luê lueji suka! O kunema kua ditadi ki kueji lunguluka kana. Maji se u kuata o ditadi mu ithangana iavulu, o ditadi dieji moneka kala dia neme dingi. Kiene ki kala ué o ku kala ni njinda ku muxima. Se tu kala ni njinda ku muxima—né muene se iofele—i tu bhanga kia iibha. Mukonda dia kiki, kiene ki bhangesa Jihova ku tu tendelesa kueha o ku vutula phonzo. Sé phata o kubelesela o kitendelesu kiki, phala o mbote ietu.—Jisabhu 11:17.
Tu divua kiambote se ki tu kala ni unguma ku muxima
“Nga divuile kala Jihova ua kexile mu zuela n’eme”
Ihi ia fidisa Linda kuvutula phonzo ku jiphange jê, akexile ku mu longolola? Muéne ua xinganeka kibatulu kia Bibidia kia mu kuatekesa kuloloka. (Jisálamu 130:3, 4) O kima kia mukuá kia kuatekesa Linda, o kuijiia kuila, kioso ki tu loloka akuetu, Jihova ué u tu loloka. (Efezo 4:32–5:2) Linda u lembalala kiebhi kia kexile mu divua kioso kia kexile ni njinda, muéne uixi: “Nga divuile kala Jihova ua kexile mu zuela n’eme.”
Mu ku bhita kithangana, Linda ua tena kueha o njinda ia kexile na-iu ku muxima. Sé ku mu jijidika, muéne ua loloka phang’etu, lelu o phange íii, dikamba diê dia kazola. Linda ua suluka mu kubheza Jihova. Ijiia kuila Jihova ua mesena ué ku ku kuatekesa.