Atangi a Madivulu Metu Ebhula . . .
O kuila Nzambi u bhana valolo ku kikonda kimoxi kia mukuá kana?
▪ Kana, muéne kene ni kathombo. O Bibidia izuela: “Nzambi kene ni kathombo ka athu. Maji ku akua jixi joso, uoso u mu xila muène, hé u bhanga ioso iaiuka, Muène u mu tambulula.”—Ikalakalu 10:34, 35.
O ibanzelu ia Nzambi mu maka enhá, ia beta-kota, o ia athu akua ituxi, ndenge. Saí athu ene mu banza kuila o kikonda kiá kiene kia beta-kota, o kia akuâ ndenge. O ibanzelu íii ia difu ni ia Charles Darwin, ua soneka: “Ku hádia, . . . o kikonda ki moneka kuila kia beta-kota, kia-nda buika o kikonda kia athu a ukexilu ua iama. Mu kidi athu avulu a tale hadi mu ku a zukutisa ku kikonda kia fika kuila kia beta-kota.
O kuila o ku kala ni kathombo ku valela kima? O kuila o jingijiie ene mu londekesa kuila saí kikonda kia valela dingi, kia mukuá kana? O mulongexi ua genética humana ua Oxford, Bryan Sykes uambe: “Se-ku kima ki bhangesa ku kala ni kathombo, mba ku sola kikonda kia beta-kota. . . . Ene mu ngi ebhudisa se kuene DNA ia Ngeleku, mba gene Italiano, maji se-ku. . . . etu enioso tua soko.”
O Bibidia i tu longa ué kuila etu enioso tua difu. O Bibidia i tu longa kuila Nzambi ua bhange ngó diiala dimoxi, ni muhatu umoxi, a sokolola o athu oso mu ngongo. (Dimatekenu 3:20; Ikalakalu 17:26) Kienhiki bhu pholo ia Nzambi athu oso a difu—ki kuene athu a kikonda kia beta-kota.
Jihova ka mono o kikonda kia muthu, mba o ku fuama kuê. Mu veji dia kiki, Muéne u bhana valolo ku kima kia beta-kota—o muxima uetu, mba ku ukexilu uetu. Muéne uambe: “O athu a fundisa akuâ mu ima ia mona, maji eme ngi fundisa athu mu ku mona o mixima iâ.” (1 Samuuele 16:7, Contemporary English Version) O kuijiia o kidi kiki, ki tu suínisa. Mukonda diahi?
Saí jixi kuene athu ka sanguluka ni kikonda kiâ, ni ku fuama kuâ, maji ki tuala ni kutena kua ku lungulula o ukexilu uetu. Maji tu tena ku lungulula—o ibanzelu ia muxima uetu. (Kolose 3:9-11) Se tu kala tu athu a kidi mudietu, tu tena kuijiia se tuala ni ukexilu ua ku zangeleka o kikonda kietu, mba tu divua kia iibha mu ku kala bhu kaxi ka athu a kikonda kiéngi. Mu kuijiia kuila Nzambi kene mu banza kiki, tua tokala ué ku bhanga ioso phala ku katula o ibanzelu íii ku muxima uetu. Jisálamu 139:23, 24.
Se tu zola o kikonda kietu, ni kia akuetu, tua-nda ku a mona kála kia mona Jihova, muéne ua-nda tu kuatekesa. O Maka mê, a tu zuela: “O Jihova mesu mê ma bhita mu ngongo ioso, phala ku di londekesa o kusuína kuê mu ku kudila ió oso ala ni muxima ua tenena kua muene.” (2 Malunda 16:9) O kidi kiki, phala athu a kikonda kioso.