Kyebhi ki Utena Kusamba Phala Nzambi Akwivwe?

TUSAMBA KWA JIHOVA MUDIJINA DYA JEZÚ

“Se mu bhinga kima kyoso-kyoso kwa Tata yami mu dijina dyami, mwene wa-nda mi bhana-kyu.”—Nzwá 16:23, nwt.

O izwelu yiyi ya Jezú, ilondekesa ni kidi kyoso kwila, Jihova kamesena kwila tusamba kwa mwene bhukaxi ka iteka, ji anju mba bhukaxi kajindandu jetu jafukyá. Mwene wamesena kwila, tusamba kwa mwene mudijina dya Jezú Kidistu. Kyoso kitusamba kwa Nzambi mu dijina dya Jezú, tulondekesa kuma tuxikina kwila Nzambi wivwa omisambu yetu mukonda dya henda yatulondekesa Jezú. “Sé-ku muthu uya kwa Tata, se u kamba kwiza kokwami.”—Nzwá 14:6.

SAMBA NI MUXIMA WOSO

“Lundululenu o mixima yenu kwa mwene.”—Jisálamu 62:8.

Kyoso kitusamba kwa Jihova, twatokala kuzwela kala kizwela omona ni tatayé yahenda. Muveji dya kutanga omisambu mudivulu mba kubhitulula o izwelu, twabhingi kusamba ni muxima woso, mu ukexilu ulondekesa kwila, tumuxila.

TUMBULA O IMA YALA MUVONDADI YA NZAMBI

“Yoso i tu bhinga mu vondadi yê, mwene u twívwa.”—1 Nzwá 5:14.

Mu Bibidya, Jihova Nzambi ututangela o ima yandabhanga phala ombote yetu, ni ima itwakola kubhanga phala mwene. Se twamesena kwila Nzambi wivwa omisambu yetu, twabhingi kusamba kala kya fwama “mu vondadi yê.” Phala kubhanga kiki, twabhingi kudilonga o Bibidya, phala kwijiya kyambote Nzambi. Se tubhanga kiki, Nzambi wandakwivwa omisambu yetu.

IHI I UTENA KUBHINGA MUMUSAMBU?

Bhinga o Ima Iwabhindamena. Tutena kusamba kwa Nzambi phala kumubhinga o ima itwabhindamena mu kizuwa ni kizuwa, kala kudya, izwatu ni kididi kyakukala. Tutenawe kubhinga unjimu phala kusola kyambote o ima ni nguzu phala kukolokota mukudibhana ni ibhidi. Tutena kusamba phala kubhinga okikwatekesu kya Nzambi, kubhinga omuloloki wa ituxi ni kukolesa o kixikanu kyetu.—Luka 11:3, 4, 13; Tiyaku 1:5, 17.

Samba Phala Ombote ya Akwenu. Jitata jahenda jisanguluka se twanatwâ tudizola. Kyene kimoxi we ni Jihova, mwene wamesena kwila, o an’ê mu ixi adizola mudya. Tutena kutumbula mwadi wetu mba muhatu wetu mumusambu, twana twetu, jindandu jetu ni makamba metu. Odixibulu Tiyaku wasoneka: “Disambelyenu mudyenu.”—Tiyaku 5:16.

Samba Phala Kusakidila Muyoso Iwala Nayu. Oyalungu ni Mubhangi wetu, o Bibidya yamba: “Wa mi londekesa o henda yê mu ku mi bhana mvula ku dyulu, ithangana ya kubhongolola kúdya kwavulu, ni mu kwizalesa o mixima yenu ni kusanguluka.” (Ikalakalu 14:17 nwt) Se tuxinganeka mu ima yoso yabhange Nzambi phala etu, twandamesena kumusakidila mumusambu. Mukidi twatokala we kulondekesa okisakidilu kyetu kwa Nzambi, mukumubelesela.—Kolose 3:15.

KALA NI MWANYU KOLOKOTA MUKUSAMBA

Sayi ithangana tuluwala mukonda tumona kwila, katutambwijila omisambu yetu ni lusolo. Okwila kiki, kilombolola kwila, Nzambi katusuwu? Kana! Tala o izwelu yakayela ilondekesa kwila, etu twatokala mwene kusuluka mukusamba.

Xitevá, utwamutange mumilongi yadyanga wambe: “Seko omusambu wangikwatekesa, eme hinu kingisanguluka dingi.” Ihi yakwatekesa Xitevá kulungulula o ibanzeleyê yalungu ni musambu? Mwene wamateka okudilonga o Bibidya yu wadilongo kwila, twabhingi kusamba ni kukolokota mukusamba. Mwene wambe : “Emengisamba kwa Nzambi phala kumusakidila mukikwatekesu kyoso kingene mutambula kumakamba ami akazola.” Yuwambe dingi: “Lelu ngasanguluka dingi m’ukulu ndenge.”

O Jeny, wabanzele kwila katokala kumwivwa kwala Nzambi, wambe: “Kyoso kingatolokele omuxima ngakexile mudyonda kwa Nzambi phala kwijiiya se mukonda dyahi ngexile mudivwa sé valolo.” Kyebhi omusambu kiwamukwatekesa? “Okusamba kwa Nzambi kwangikwatekesa kudimona kala kyangimona mwene. Né mwene muxima wami ungifundisa maji mwene kangifundisa. Omusambu wangikwatekesa we phala kingibhwile.” Mbote yahi yatambula? “Omusambu wangikwatekesa kumona Jihova kala Tata ni Nzambi yahenda; Dikamba dya kidi, wangisuwu. Se ngisuluka mukubhanga ngunzu phala kumusangulukisa, mwene wandangikwatekesa.”

Tala ophangu yamukwa, ya Nzebele. Kyoso mwene kyemita odotolo wamutangela kwila, omonê weji kala kimena. Mwene waluwalele kyavulu. Sayi athu amutangela phala kuselula omona. “Ngafikile kwila, ngejifwa mukonda dya ndolo ingelexile nayu kumuxima.” Ihi yabhange? Mwene wambe: “Ngasambe kwa Nzambi phala kungikwatekesa.” Mwene wavwala mona diyala, wamuluku Gerard, maji wexile mwene kinema. Okwila Nzebele wadivu kwila, Nzambi watambwijile omisambuyê? Kyene mwene kyadivu! Kyebhi mwene kyamono o itambwijilu yamisambuyê? Nzebele wambe: “Monami wala kyá ni 14 kya mivu. Kyoso kingimona monami wasanguluka kumwenyu sumbala ni unemawê, ngimona kwila, mwéne okitambwijilu kyabeta okota kyamisambu yami. Dibesá dya dikota dyangibhana Jihova Nzambi.”

Izwelu itunda kumuxima kala yiyi, itubhangesa kuxinganeka mu izwelu yamukwa jisalamu kyoso kyambe: “Eye-phe Jihova, wevu kyoso kyala kwinda abelesela; eye mwene wa a sungu muxima, mu kuditenda kwâ eye u a evwa.” (Jisálamu 10:17) Twala ni ima yavulu yambote itubhangesa kukolokota mukusamba!

Mu Bibidya, tusangamu misambu yavulu yabhangele Jezú. Omusambu wejiiya dingi o athu, walongo kumaxibulu mê. Ihi itutena kudilonga kumusambuyú?