DISÁ 09
O Musambu, Ukolesa o Ukamba wé ni Nzambi
O kwila wa dibhanene kya ni maka a bhingile kayula mba itendelesu yambote? Eye wala ni ibhwidisu ya lungu ni mwenyu iwabhindamena itambwijilu? O kwila wa bhindamena kikwatekesu mba ku kukonda o malamba? Wa mesena kuzukama dingi kwa Jihova? O kusamba kutena ku kukwatekesa. Maji webhi o ukexilu watokala wa kusamba? O kwila Nzambi wivwa o misambu yoso? Ihi iwatokala o kubhanga phala kwijiya ni kidi kyoso kwila, mwene wandakwivwa o misambu yé? Tumone o itambwijilu.
1. Twatokala kusamba kwa nanyi? Ihi itwatokala kuzwela mu musambu?
Jezú wa longo kwila, twatokala kusamba ngó kwa Tata yetu ya dyulu. Kyene kyexile mubhanga Jezú. Mwene wambe: “Mukusamba kwenu mwila kala kiki: Tata yetu wene mudyulu . . .” (Matesu 6:9) Kyoso kitusamba kwa Jihova, o ukamba wetu ni mwene ukola dingi.
Kabasa kima kitwamesena kuzwela, tutena kukitumbula mu musambu. Maji Nzambi wandatambwijila ngo o misambu yetu, se yene ilunga ni vondadi yé. “Kuma kima kyoso kitumubhinga se kyaxikina muvondadi ye, [kifwa, mu vondadi ya Nzambi] mwene utwivwa.” (1 Nzwá 5:14) Jezú wa tubhana phangu yambote ya lungu ni ima itutena kuzwela mu musambu. (Tanga Matesu 6:9-13.) Mu kidi, tutena kusamba ya lungu ni mak’etu, maji ki twatokala kujimba kusambela we akwetu, ni kusakidila Nzambi mu ima yoso yene mu bhanga phala o mbote yetu.
2. Kyebhi ki twatokala o kusamba?
O misambu yetu yatokala ikala ya kidi. Mukonda dya kiki, o Bibidya ituswinisa ‘kusamba kwa [Nzambi] ni muxima woso.’ (Jisálamu 62:8) Tutena kusamba ni dízwi dya swina mba ku muxima wetu, mu kithangana kyoso kyoso ni mu kididi kyoso kyoso. Mu kusamba, tutena kufukama, kuxikama mba kwimana. Kikwala kijila kya lungu ni maka ya. O kya beta kota, o kusamba mu ukexilu uxila Jihova.
3. Kyebhi Nzambi kya tambwijila o misambu yetu?
Mwene ubhanga kiki mu maukexilu avulu. Mukifika, mu Bibidya tusangamu itambwijilu yavulu ya lungu ni ibhwidisu itwene mu bhanga. Kutanga o maka ma Nzambi, ‘kutena kwijidisa yo wakambe unjimu.’ (Jisálamu 19:7; tanga Tiyaku 1:5.) Jihova utena ku tu tululukisa o muxima kyoso kitwamudibhana ni ibhidi. Bhu kaxi ka jiselevende jê, mwene utena kutukwatekesa kyoso kitubhindama.
DILONGE DINGI
Tala ihi iwatokala o kubhanga phala Nzambi kwivwa o misambu yé, tala we kyebhi o misambu itena ku kukwatekesa.
4. Ihi itwatokala o kubhanga phala Nzambi kwivwa o misambu yetu
Ima yebhi ibhangesa Nzambi kwivwa o misambu yetu? Tala OVIDYU.
Jihova wa mesena kwila tusamba kwa mwene. Tanga Jisálamu 65:2, mukusuluka bhanga o ibhwidisu ya kayela:
Mudyé, o kwila o “Mukwa Kwivwa o misambu” wa mesena kwila eye usamba kwa mwene? Mukonda dyahi ubanza kiki?
Phala Nzambi kwivwa o misambu yetu, twa tokala kubelesela o itumu yê ni ku ikumbidila ku mwenyu wetu. Tanga Mikeya 3:4 ni 1 Phetele 3:12, mukusuluka bhanga o kibhwidisu kya kayela:
Kyebhi kitutena kwijiya kwila, Jihova wandakwivwa o misambu yetu?
Ibuka iyadi ya masoladi amusamba kwa Nzambi phala kutolola o jinguma jâ. O kwila kibhana kuxikina kwila, Nzambi wandatambwijila o misambu yâ?
5. Twatokala kusamba ni muxima woso
Sayi athu a alongo kwila, mu kusamba kwa Nzambi atokala kubhitulula o izwelu imoxi ithangana yoso. Maji o kwila kyene kya mesena Nzambi? Tanga Matesu 6:7, mukusuluka bhanga o kibhwidisu kya kayela:
Mu kusamba, ihi iwatokala o kubhanga phala ‘kubhitulule o izwelu imoxi ithangana yoso?’
Kala kizuwa, xinganeka mu mabesá a kubhana Jihova anga umusakidila mu musambu. Se ubhanga kiki izuwa yoso ku semana, wandamona kwila, wabhingi sambwadi dya ima mu musambu, sé kubhitulula o izwelu.
O tata uwabhela kyoso monê kya zwela ya mukala kumuxima, kyene kimoxi ni Jihova. Mwene usanguluka kyoso kitusamba kwa mwene ni muxima woso
6. O musambu ujitu watubhana Nzambi
Kyebhi o musambu utubhana nguzu, benge benge mu ithangana ya bhonzo? Tala OVIDYU.
O Bibidya itulonga kwila, kusamba kutena ku tukwatekesa kukala ni kutululuka kwa muxima. Tanga Filipe 4:6, 7, mukusuluka bhanga o ibhwidisu ya kayela:
Sumbala o musambu ki uzubha o maka utwamudibhana nawu, kyebhi ki utena ku tukwatekesa?
Ima yebhi iwamesena kutumbula mu musambu?
Eye wakijidile?
O kizwelu “amén” kilombolola “ngaxikina” mba “kyene.” Tundé mukulu, o kizwelu kiki ene mu kitumbula kudisukilu dya misambu.—1 Malunda 16:36.
7. Kana kujimba o kusamba
Sayi bhabha, mukonda dya ima yavulu itwatokala o kubhanga, tulanduka o kusamba. O kwila o kusamba kwexile ni valolo phala Jezú? Tanga Matesu 14:23 ni Máluku 1:35, mukusuluka bhanga o ibhwidisu ya kayela:
Ihi yexile mu bhanga Jezú phala kukala ni kithangana kya kusamba?
Ihi we iwabhingi kubhanga phala kukala ni kithangana kya kusamba?
ATHU AVULU AMBA: “O musambu, ndunge ngó wa kubhangesa o muthu kudivwa kyambote. Maji kiwala ni valolo.”
Ihi i weji zwela?
IHI IWADILONGO
Kusamba ni muxima woso ku tuzukamesa dingi kwa Nzambi, ku tubhana o kutululuka ni nguzu itwabhindamena phala kusangulukisa Jihova.
Kubhitulula
Twatokala kusamba kwa nanyi?
Kyebhi ki twatokala o kusamba?
O musambu utukwatekesa kyebhi?
TOKWESA DINGI
Ijiya dingi ya lungu ni ibhwidisu yene mu bhanga kyavulu o athu ya lungu ni musambu.
Dilonge o valolo ya kusamba ni kyebhi ki utena kufwamesa dingi o misambu yé.
Twatokala kusamba kwa nanyi? Tala ilonga o Bibidya ya lungu ni maka ya.
“O Kuila Nga Tokala ku Samba ku Jisandu?” (Milongi ya jw.org)
O vidyu yiyi, yandakukwatekesa kumona kwila, utena kusamba kabasa ola mba kididi.