Tolola o Jiphata Jiwala Naju

1-2. (a) Maka ebhi ene mudibhana nawu o jiselevende ja Jihova? (b) Ihi i twanda dilonga mu milongi yiyi?

ETU enyoso, kikale se tu ana-ndenge mba tu adyakime, sayi ithangana tudibhwidisa se Jihova watuzolo mba kana. Tudibhwidisa we se twabhange kyambote mu kusola mu kumubheza.a Muboki, wala munzangala sayi bhabha utena kudibhwidisa se Jihova wamuzolo, mukonda dya kiki udibhwidisa, se u dibatizala mba kana. Mba xinganeka ku mwadyakime, mu unzangala wê wadibhakula dingi mu kikalakalu kya Jihova, mu veji dya kukala ni kitadi kyavulu. Kindala wala ngo ni kitadi kyofele phala kudikila o mwiji, mwene wadyela mu kubhanga yabhangele mu unzangala wê. Mba xinganeka ku phange ya muhatu, mu ukulu wexile mubhanga ikalakalu yavulu, maji kindala kuma wakuka kya, kamutena dingi. Mukonda dya kiki mwene uluwala kyavulu. O kwila wadibhwidisa kya se Jihova wakuzolo, se wadyela mu kudibhakula mu ikalakalu ya Jihova mba se utena hanji kukalakala kyavulu mu kilunga kya Jihova?

² Se kitutambwijila o ibhwidisu yiyi, o jiphata jiji jitena kutubhangesa kuzoza mu nzumbi mba jitena mwene kutubhangesa kuxisa o kilunga kya Jihova. Mukonda dya kiki mu milongi yiyi twanda mona kyebhi o Bibidya itena kutukwatekesa se twamubanza se Jihova watuzolo, se twabhange kyambote mu kubhanga dingi mu ikalakalu ya Jihova, mba se twala hanji ni nguzu phala kukalakala kyavulu mu kilunga kya Jihova.

IHI I TENA KUTUKWATEKESA KYOSO KITUKALA NI JIPHATA?

3. Ihi i twatokala kubhanga kyoso kitukala ni jiphata?

³ Ukexilu umoxi utena kutukwatesa, o kusota o itambwijilu ya ibhwidisu yetu mu Bibidya. Se tubhanga kiki twanda kolesa o “kixikanu” kyetu ni kuzama dingi kwa Jihova.—1 Ko. 16:13.

4. Kyebhi kitutena ‘kutongolola o ima yoso’? (1 Tesalonika 5:21)

⁴ Tanga 1 Tesalonika 5:21. O Bibidya itutendelesa ‘kutongolola o ima yoso.’ Kyebhi kitutena kubhanga kiki? Kyoso kitukala ni phata, twatokala kutanga izwela o Bibidya yalungu ni jiphata jitwala naju. Xinganeka ku munzangala ukala ni phata se Jihova wamuzolo mba kana. Ihi yatokala kubhanga mwene? O kwila katokala kubhanga kima? Kana ngana, mwene watokala kutokwesa mu Bibidya yalungu ni maka enyá.

5. Kyebhi kitutena kusota o itwambwijilu ya Jihova ku ibhwidisu i twala nayu?

⁵ Etu twivwa Jihova kyoso kitutanga o Bibidya. Maji se twamesena kwila Jihova utambwijila o ibhwidisu i twala nayu, kitutokala ngo kutanga o Bibidya. Twatokala kusota ni kutanga o jivelusu janda tambwijila o ibhwidisu i twala nayu. Tutena kubhanga kiki mu kutokwesa mu madivulu metu. (Jisa. 2:​3-6) Twatokala we kusamba kwa Jihova ni kumubhinga phala tusange o kitambwijilu kya kibhwidisu kitukala nakyu. Mu kusuluka twabhingi kusota jivelusu mba misoso ya athu otumbulu mu Bibidya, adibhana ni maka utwamudibhana nawu.

6. Kyebhi o yonge itukwatekesa?

⁶ Etu twivwa we Jihova kuzwela n’etu kyoso kituya mu yonge. Mu yonge, tutena kwivwa o kitambwijilu kya kibhwidisu kyetu mu diskulusu mba ku kitambwijilu kya phangyetu. (Jisa. 27:17) Kindala twanda mona se kyebhi kitutena kubhanga kiki.

IHI I WATOKALA KUBHANGA SE WAMUBANZA KWILA JIHOVA KAKUZOLO?

7. Ihi ibanza o athu?

⁷ O kwila wa dibhwidisile kya se Jihova ukubhana valolo? Se umona kwila Jihova kakubhana valolo, nange ubanza kwila ki utena kukala kamba dya Mubhangi wa ngongo yoso. Nange kyene we kya divu Sobha Davidi. Sayi kizuwa mwene wa diwanene ni ibhangelu ya Jihova yu wambe: “Jihova, muthu mwene wa soko kyebhi, phala eye u kale mu ku mu suwa? O mona-muthu u mu tambula kyebhi o konda?” (Jisá. 144:3) Kwebhi ku utena kusanga o kitambwijilu kya kibhwidisu kiki: “O kwila Jihova u suwa o athu?”

8. Kala kyamba 1 Samuwele 16:​6, 7, 10-12 Jihova umona ihi ku athu?

⁸ O Bibidya yamba kwila Jihova ubhana valolo kwa yo kene mwasuwa ku akwa. Mukifika Jihova watumikisa Samuwele ku bhata dya Jesé phala kusola mona umoxi wa Jesé phala kukala Sobha ya Izalayele. Jesé wexana sambwadi dya twana maji kwakambele umoxi, Davidi. Mwene wexile o kasule,b maji ne kiki, Jihova wamu solele. (Tanga 1 Samuwele 16:​6, 7, 10-12.) Jihova wamono o muxima wa Davidi, yu wejidile kwila Davidi wa muzolele kyavulu.

9. Mukonda dyahi u tena kuxikina kwila Jihova wa kuzolo? (Tala we ofoto.)

⁹ Xinganeka mu ima yabhange kya Jihova kokwe ilondekesa kwila wakuzolo. Mwene ubhana itendelesu itena kukukwatekesa ku mwenyu we. (Jisá. 32:8) Kiki kilondekesa kwila Jihova wejiya kyambote o ima i wabhindamena. (Jisá. 139:1) Kyoso ki ukumbidila o itendelesu ya Jihova anga umona kwila ya kukwatekesa ku mwenyu we, wanda xikina kwila Jihova wa kuzolo. (1 Mal. 28:9; Ika. 17:​26, 27) Jihova u mona o nguzu i wene mubhanga phala kumusidivila. Mwene umona o idifwa ye, wamesena we kukala kamba dye. (Jel. 17:10) Mwene wa mesena kwila eye ukala kamba dye.—1 Nz. 4:19.

IHI IWA TOKALA O KUBHANGA SE WA DYELA MU IMA YA MBOTE I WA BHANGELE MU UKULU?

10. Kyoso kitubanza mu ima itwasolo ku dima nange, ibhwidisu yebhi itena kumoneka?

¹⁰ Sayi ithangana, sayi jiphange axinganeka mu ima ya solele kubhanga ku mwenyu. Ya a dibhwidisa se asolele mwene kyambote. Nange ene a solele kuxisa salu kwexile mwafuta kyambote mba kuxisa wenji phala kubhanga dingi musidivisu ya Jihova. Kuma kwabhiti kya mivu yavulu nange a muxinganeka ku athu yo a ejiya kyambote, kindala ala ni salu yambote ni kitadi kya kyavulu. Mukonda dya kiki a dibhwidisa: ‘O kwila ngabhange kyambote kubhanga dingi mu sidivisu ya Jihova? O kwila kota nga sotele salu bhu ngeji tambula kitadi kyavulu?’

11. Ibhidi yebhi yexile mu dibhananayu o musoneki wa Jisálamu 73?

¹¹ Se wadibhangele kya o ibhwidisu yiyi ejiyakyu kwila o musoneki wa Jisálamu 73 wadibhele we ni maka ya. Mwene wexile mumona kwila o athu a ibha exile jimvwama, kexile ni maka ku mwenyu. (Jisá. 73:​3-5, 12) Mukumona o kusanguluka kwa athu ya, mwene wexile mubanza kwila o ima yexile mubhanga mu sidivisu ya Jihova kiyexile ni valolo. Wexile mumona kwila mwene wexile muluwala izuwa yoso. (Jisá. 73:​13, 14) Kyebhi mwene kya tena kubatula o maka ya?

12. Kyebhi o mukwa Jisálamu kya batula o maka me? (Jisálamu 73:​16-18)

¹² Tanga Jisálamu 73:​16-18. O mukwa Jisálamu wabokona mutembulu ya Nzambi. Mutembulu mwene wa mateka kuxinganeka kyambote. Mwene wa tongolola kwila sumbala o athu a ibha exile ni mwenyu wambote, maji kexile ni kidyelelu ku mwenyu. Mu kubhanga kiki, mwene wa mono kwila o kusidivila Jihova kyexile kima kyabeta kota.—Jisá. 73:​23-28.

13. Ihi i wa tokala o kubhanga se wa dyela mu ima ya mbote i wa bhangele mu ukulu? (Tala we ofoto.)

¹³ Kala kyabhangele o mukwa Jisálamu eye we utena kutolola o ixinganeku yayibha ni kukala ni ixinganeku yambote. Kyebhi ki utena kubhanga kiki? Mu ku xinganeka ku mabesa a Jihova kokwe ni ku xinganeka kwila o yo kamubeza Jihova kala ni kikwatekesu kye. O yo kamusidivila Jihova abanza kwila o kitadi kyene o kima kyabeta dingi kota ku mwenyu, mukonda ene kala ni kidyelelu kya kutunga mu Palayiso. Lelu Jihova wene mu kubesowala kya kyavulu, ku hádya wanda kubhana mwenyo wakalelako. (Jisá. 145:16) Kyebhi kyeji kala o mwenyo wami, se kingeji sidivila Jihova? Utena kudyelela kwila, kyoso ki usola ku sidivila Jihova ni kukwatekesa akwenu, wanda kala ni kusanguluka kwa kidi.

IHI I WATOKALA KUBHANGA SE WAMUBANZA KWILA KI WALA NI VALOLO KWA JIHOVA NI MU KILUNGA KYE?

14. Sayi jiselevende ja Jihova ene mu dibhana ni ibhidi yebhi?

¹⁴ Sayi jiselevende ja Jihova amesena kubhanga dingi mu sidivisu ya Jihova, maji mukonda dya kukuka ene katena kubhanga kiki. Kiki kyabhangesa kubanza kwila ene kala ni valolo ku pholo ya Jihova. Ene adibhwidisa, o kwila ngala hanji ni valolo ku pholo ya Jihova ni mu kilunga kye?’

15. Kidyelelu kyahi kyexile nakyu o musoneki wa Jisálamu 71?

¹⁵ O musoneki wa Jisálamu 71 wakexile we mudivwa kiki, mwene wambe: “Kana ku ng’ehelela ki u mona nguzu yí ngi bhwa kyá!” (Jisá. 71:​9, 18) Maji o mukwa Jisálamu wejidile kwila se wasulukile mu kusidivila Jihova, Jihova weji mulanga ni ku mukwatekesa. O mukwa Jisálamu wamono kwila Jihova ubhana valolo ku ima yoso yene mubhanga o jiselevende je ki kale yo akuka kya mba amukata.—Jisá. 37:​23-25.

16. Ihi itena kubhanga o adyakime mu kilunga? (Jisálamu 92:​12-15)

¹⁶ Sumbala wakuka kya ne kiki dyelela kwila Jihova wakuzolo kyavulu. Mwene utena ku kukwatekesa ku musidivila sumbala wakuka dya (Tanga Jisálamu 92:​12-15.) Mu veji dya kubanza mu ima ki utena kubhanga xinganeka mu ima i utena hanji kubhanga. Eye utena kukwatekesa akwenu mu kwalondekesa henda ni mu kwatangela yoso i wabhange kya ku mwenyu. Utena kwa tangela kyebhi Jihova kya ku kwatekesa ku mivu yoso yiyi, ni kikanenu ki wamukingila ni hanji yoso. Kana kujimba kwila o misambu i wene mubhanga phala o mbote ya akwenu yala ni nguzu yavulu. (1 Ph. 3:12) Ki kale se tuminzangala, twadyakimi, se twakate mba kana, etu enyoso tutena kukwatekesa akwetu ni kubheza Jihova ni kixikanu kyoso.

17. Mukonda dyahi ki twatokala kudisokesa ni akwetu?

¹⁷ Se waluwala mukonda kiwamu tena kubhanga dingi kala kyoso ki wexile munzangala, dyelela kwila kima kyoso-kyoso ki ubhanga Jihova ukibhana valolo. Nange wene mu disokesa ni akwenu, maji kana kukibhanga mukonda Jihova kene mu ku sokesa ni akwenu. (Nga. 6:4) Sayi muhatu amwixana Madiya walundulula mu inama ya Jezú máji yatele kitadi kyavulu. (Nzw. 12:​3-5) Maji o mutudi wexile ngadyama watele mu ngonga ya tembulu tumabele tuyadi twakambele valolo yavulu. (Luk. 21:​1-4) Ne kiki Jezú kambe kwila o yabhana Madiya yabeta dingi kota o yabhana o mutudi ndenge. Mu veji dya kiki mwene wambe kwila o yabhana ene yala ni valolo. Jezú wakayela o phangu ya Tate, mu kiki utena kukala ni kidyelelu kya kwila Jihova umona yoso i ubhana mukonda wala ni kixikanu kyakolo, ne mwene se o ima i ubhanga yofele ngo.

18. Ihi yanda tukwatekesa kutolola o jiphata? (Tala we o kaxa “O Bibidya itena kukwatekesa kutolola o jiphata jé.”)

¹⁸ Kala kitwadilongo, etu enyoso sayi bhabha twene mu kala ni jiphata. Maji twamono kwila o Bibidya itukwatekesa kutolola o jiphata. Bhanga yoso ni yoso phala kutolola jiphata jiwala naju. Se ubhanga kiki mu veji dya kuluwala o kixikanu kye kwa Jihova kyanda kola dingi. Ejiya kwila Jihova wakwijiya kyambote. Mwene kajimbi yoso i wabhange kya mu ukulu, mwene wanda kubhana mwenyu wakalelaku.