Lenduka se Wakambe Kwijiya Kima

1. Kutena kwahi kwa tubhana Jihova ni mukonda dyahi?

JIHOVA watubhange ni kutena kwa kuxinganeka, kwa kudilonga ima ya ubhe, ku itendela ni kyebhi ki tutena ku kumbidila o ima itwadilongo. Mukonda dyahi mwene watubhange mu ukexilu yu? Phala tutene ku “d’ijiya kyambote ni Nzambi” ni kumusidivila ni kilungi kyoso.—Jisa. 2:​1-5; Lom. 12:1.

2. (a) Ima yebhi itwatokala kutendela? (Jobe 37:​23, 24) (Tala we ofoto.) (b) Mukonda dyahi kiki kima kyambote phala etu?

² Kidi kwila Jihova watubhange ni kutena kwa kudilonga, maji kitwejiya o ima yoso. (Tanga Jobe 37:​23, 24.) Xinganeka ku musoso wa Jobe. Jihova wamubhangele ibhwidisu yavulu yalondekesa kwila Jobe kejidile o ima yoso. O ibhwidisu yiyi yakwatekesa Jobe kukala muthu walenduka ni kulungulula o ukexilu we wa kubanza. (Jobe 42:​3-6) Kyene we kimoxi netu, kima kyambote kukala tu athu alenduka ni kuxikina kwila kitwejiya o ima yoso. Mu kiki tutena kudyelela kwa Jihova kwila mwene wanda tutangela jinga o ima yoso itwabhindamena kwijiya phala kusola kyambote o ima ku mwenyu wetu.—Jisa. 2:6.

3. Ihi itwanda dilonga mu milongi yiyi?

³ Mu milongi yiyi twanda mona ima itwakambe kwijiya. Twanda mona we se mukonda dyahi sayi ima kima kyambote kukamba ku ijiya. Kudilonga o milongi yiyi, yanda kolesa dingi o kidyelelu kyetu kwa Jihova ‘yo wayuka mu kwijiya’ utubhana o milongi itwabhindamena.—Jobe 37:16.

KI TWEJIYA O KITHANGANA KYANDA BHIXILA O DIZUBHILU

4. Kala kizwela o divulu dya Matesu 24:​36, kima kyebhi ki twakambe ku kijiya?

⁴ Tanga Matesu 24:36. Etu kitwejiya o kithangana kyanda bhixila o dizubhilu. Kate mwene Jezú kyoso kyexile mu ixi kejidile ‘o kizuwa né o ola.’a Mu kusuluka mwene wajimbulula ku jiphoxolo jê kwila Jihova mwene o Ngana wa jithembu, mwene wejiya o kizuwa mukonda yala mu “kutena kwê-mwène”. (Ika. 1:​6, 7) Jihova waxindi kya o kithangana kyanda bhixila o dizubhilu, maji etu kitwala ni kutena kwa kwijiya se kithangana kyebhi kyanda bhixila.

5. Kuma kitwejiya o kizuwa kyanda bhixila o dizubhilu, ihi itena kubhita netu?

⁵ Kala kyazwela Jezú, etu kitwejiya se izuwa ikuxi itwanda bhinga kukingila phala o dizubhilu dya mundu yu kubhixila. Mukonda dya kiki tutena kukamba kukala ni mwanyu ni kuluwala. Bhenge-bhenge se twamukingila kya o kizuwa kya Jihova mu izuwa yavulu. Kitena we kutubhonza kyoso o jindandu jetu ni athu akamukwa atwelela mukonda o dizubhilu kiluwa dibhixila. (2 Ph. 3:​3, 4) Nange tumateka kuxinganeka kwila kikweji tubhonza kudibhana ni kuluwala mukonda dya kutufundisa se twejidile o kizuwa ni kithangana kyeji kwiza o dizubhilu.

6. Mukonda dyahi kima kyambote kukamba kwijiya o kizuwa kyanda bhixila o dizubhilu?

⁶ Mu kidi kuma Jihova katutangela o kizuwa kyanda bhixila o dizubhilu, mwene wamutubhana kithangana phala kulondekesa kwila twamu musidivila mukonda twamuzolo ni kwila twamudyelela. Etu katuxindila kithangana phala kubheza Jihova kala o kixikanu kyetu kyala ni kithangana kya kubhwa. Mu veji dya kudikwatenena kyavulu mu “kizuwa kya Jihova” kwiza ni dizubhilu, o kima kyabeta kota kitwatokala kubhanga o kuxinganeka mu ima yambote yanda bhita kyoso o kizuwa kiki kyanda bhixila. Mu kubhanga kiki twanda zukama dingi kwa Jihova, o kidyelelu kyetu kwa mwene kyanda dibandekesa dingi ni kwila twanda bhanga yoso itutena phala ku musangulukisa.—2 Ph. 3:​11, 12.

7. Ima yebhi itwejiya?

⁷ Kima kyambote kudikwatenena mu ima itwejiya kya kwila o izuwa yasukidilaku yamateka ku muvu wa 1914. Mu Bibidya mwala ikanenu yavulu ilondekesa kwila o izuwa isukidilaku yamateka mwene ku muvu wa 1914, yene we ilondekesa kyebhi kyeji kala o athu mu izuwa yiyi. Kyenyiki tutena kudyelela kwila o “kizuwa kyonéne kya Jihova kya zukama.” (Sof. 1:14) Twejiya we kyebhi o kikalakalu kyamesena Jihova kwila tu kibhanga, o kikalakalu kiki o kuboka “o njimbu yambote ya Utuminu wa Nzambi” ku mundu woso. (Mat. 24:14) O njimbu yiyi amu ibokela ku 240 a jixi mu 1.000 ya madimi ndenge. Etu kitwabhingi kwijiya o kizuwa ni kithangana kyanda bhixila o dizubhilu phala kubhanga yoso itutena mu kikalakalu kiki kyabeta kota.

ETU KITWEJIYA O IKALAKALU YOSO YA JIHOVA

8. O izwelu “ikalakalu ya Nzambi” ilombolola ihi? (Ndongixi 11:5)

⁸ Sayi bhabha etu kitwejiya ‘o ikalakalu yoso ya Nzambi, Mubhangi a ima yoso’. (Tanga Ndongixi 11:5.) O kizwelu kiki kilombolola o ima ibhanga Jihova ni ukexilu we wakubhanga o ima phala kukumbidila o ikanenu yê. Etu kitwejiya o ima yoso ibhangesa Jihova kwehela kwila o kima kyayibha kibhita netu ni kyebhi mwene kyatukwatekesa. (Jisá. 37:5) O Bibidya isokesa o kukamba kwijiya ‘o ikalakalu yoso ya Nzambi’ ni kukamba kwijiya kyoso kyakala o mona mu vumu dya muhatu wemita. Ne mwene o jingijiye katendela kyambote se o ima yiyi ibhita kyebhi. Kyene we kimoxi netu, etu kitutendela o ima yoso ibhanga Jihova.

9. Ihi itena kubhita mukonda dya kukamba kwijiya o ima yanda bhanga Jihova?

⁹ O kukamba kwijiya o ima yoso ibhanga Jihova kokwetu, itena kutubhangesa kutandanganya. Nange tutena kukala ni woma wa kubhanga dingi mu sidivisu ya Jihova, mu kifika o kukamba kukala ni jimbote ku mwenyu, mba kusidivila mu ididi mwabhindamena dingi aboki. Nange tumateka kubanza kwila Jihova kamutubesowala mukonda ki twakumbidila o mbambe itwaxindi mba kitwaditundu kyambote mu ukunji mba twamudibhana ni ibhidi mu sidivisu yetu.

10. Kidifwa kyebhi ki tutena kukala nakyu mukonda dya kukamba kwijiya o ima yanda bhanga Jihova?

¹⁰ O kukamba kwijiya kyebhi Jihova kyanda bhanga o ima, mu kidi kitukwatekesa kukala ni kidifwa kala o kulenduka. Tutena kumona we kwila Jihova wamesena ngo o mbote yetu. (Iza. 55:​8, 9) Tutena kubandekesa o kidyelelu kyetu kwa Jihova, kyoso kitudilonga kudyelela ngo kwa mwene phala kuditunda kyambote. Kyoso kituditunda kyambote mu ukunji mba mu kikalakalu kyoso-kyoso kitubhanga kwa Jihova, tubhana o kijingu kyoso kwa Jihova mukonda kyamutokala. (Jisá. 127:1; 1 Ko. 3:7) Kyoso o ima kiyatundu kala kitwamesena, twatokala kulembalala kwila Jihova wejiya o ima yoso. (Iza. 26:12) Etu tubhanga o mbandu yetu, twadyelela we kwila Jihova wanda bhanga o mbandu yê. Twadyelela kwila mwene wanda twendesa ne mwene se kabhange madiwanu kala kyexile mu bhanga mu ukulu.—Ika. 16:​6-10.

11. Ima yebhi yabeta kota itwejiya yalungu ni Jihova?

¹¹ Etu twejiya kwila Jihova Nzambi ya henda, wayuka ni kwila njimu. O kima kyengi kitwejiya kya kwila Jihova ubhana valolo yavulu mu ima itubhanga kwa mwene ni ku jiphangi jetu. Seku phata ya kwila Jihova ubesowala jinga yo ala fiyele kwa mwene.—Jih. 11:6.

ETU KITWEJIYA O IMA YANDA BHITA MUNGU

12. Ihi itwadilongo mu divulu dya Tiyaku 4:​13, 14?

¹² Tanga Tiyaku 4:​13, 14. Etu tuxikina ni kidi kyoso kwila kitwejiya o ima yanda bhita mungu mba mungu dina. Ku mundu ku twatungu, etu enyoso tutena kudibhana ni “ibatu ni jithembu”. (Ndo. 9:11) Mukonda dya kiki kitutena kwijiya se o mbambe itwaxindi twanda tena ku ikumbidila ne mwene se twanda kala hanji kumwenyu phala kusuwa o mbambe yetu mba kana.

13. O kukamba kwijiya o ima yoso yanda bhita ku hadya itubhangesa kudivwa kyebhi?

¹³ Sayi bhabha kutubhonza kukolokota mukonda kitwejiya o ima yoso yanda bhita ku hadya. Kiki kibhita kyebhi? Nange tutandangaya kyavulu mukonda kitwejiya o ima yanda bhita mungu mba mungu dina, kiki kitena kutuluwalesa. O mwenyu wetu utena kulunguluka mu kithangana ni mbandu, o kwijiya o maka enya kitena we kutuluwalesa. Kyoso o ima ki ibhita kala ki twamesena, tutena we kuluwala.—Jisa. 13:12.

14. O kusanguluka kwetu kwijila mu ihi? (Tala we o jifoto.)

¹⁴ Kyoso ki tukolokota mu ibhidi, tulondekesa kwila kabasa kima kibhita tusidivila Jihova mukonda twamuzolo. O Bibidya ilonga kwila kitwatokala ku kingila kuma Jihova utulanga mu ibhidi yoso itubhita nayu ni kwila mwene kaxindi o ima yoso yanda bhita netu. Jihova wejiya kwila o kusanguluka kwetu ki kwijila mukonda dya kwijiya yoso yanda bhita ku hadya. Mu kidi o kusanguluka kwetu, kwijila mu kwijiya o itendelesu ya Jihova ni ku ibelesela. (Jel. 10:23) Ande dya kusola kima se tusota o kitendelesu kya Jihova, ki twanda tandanganya kyavulu ni ima yanda bhita ku hadya, mu veji dya kiki twanda banza kala kyazwela Tiyaku kyoso kyambe: “Se Jihova wa kyandala, twanda kala ku mwenyu, twanda bhanga kiki, ni kyokyo.”—Tiy. 4:15.

15. Ihi itwejiya yalungu ni hadya?

¹⁵ Kidi kwila kitwejiya o ima yoso yanda bhita ku hadya, maji twejiya we kwila Jihova wakanena kutubhana o mwenyu wakalelaku. Sayi athu anda itambula ku dyulu o amukwa mu ixi. Twejiya we kwila Jihova katanga makutu ni kwila seku kima kimufidisa kukumbidila o ikanenu yê. (Tit. 1:2) Mwene ngo utanga o dizubhilu ‘tunde kudimatekenu, utena we kutanga o ima kiluwa izaku’. Yoso yazwela Jihova kwila yeji dikumbidila, yadikumbidila mwene. Yoso yazwela kuma yanda dikumbidila ku hadya, yanda dikumbidila mwene. (Iza. 46:10) Twejiya we ni kidi kyoso kwila seku kima kitena kufidisa Jihova kutuzola. (Lom. 8:​35-39) Kabasa kima kibhita netu, Jihova wanda tubhana o unjimu, wanda tukolokotesa we. Kitwala ni phata ya kwila Jihova wanda tukwatekesa ni kutubesowala.—Jel. 17:​7, 8.

ETU KITUTENA KUTENDELA NI KIDI KYOSO SE KATE BHWEBHI JIHOVA WATWIJIYA

16. Ihi yejiya Jihova yalungu netu, maji kitutena ku itendela? (Jisálamu 139:​1-6)

¹⁶ Tanga Jisálamu 139:​1-6. Jihova o Mubhangi wetu, wejiya o maukexilu oso a mwenyu wetu. Mu ithangana yoso, mwene ututonginina yoso ituzwela kate mwene utendela o ima itwamesenene kuzwela. Jihova umona o ima yoso itubhanga ni kwila wejiya se mukonda dyahi twabhange mu ukexilu yu. Sobha Davidi walondekesa kwila Jihova wala polondo phala kutukwatekesa kabasa kibhidi kitudibhana nakyu. Kyebhi ki udivwa mu kwijiya kwila Jihova o Mubhangi wa yoso, utusuwa kala muthu mudyetu? Tudiwana kyavulu mu kwijiya kwila Jihova ubhanga kiki. Sobha Davidi wambe: “Nga diwana kwijiya ku kala kiki! Kwa ngi tundu, ki ngi tena-bhu.”—Jisá. 139:6.

17. Mukonda dyahi kutena kutubhonza kuxikina kwila Jihova watwijiya kyambote?

¹⁷ Mukonda dya ukexilu atusase, o kididi bhu twakudila, o ima itwaxikinine ande dya kwijiya o kidi, kitena kutubhonza kumona Jihova kala tata ya henda ni kwila utusuwa. Nange tutena we kubanza kwila, Jihova nuka wanda xikina kukala kamba dyetu mukonda dya ituxi itwatele mu ukulu. Sayi ithangana kate mwene Sobha Davidi wexile mu divwa kiki. (Jisá. 38:​18, 21) Se muthu wamubhanga nguzu phala kubhanga ima isangulukisa Jihova, mwene utena kudibwidisa: ‘Se Nzambi wa ngijiya kyambote mukonda dyahi mwene wamesena kwila ngilungulula kima ku mwenyu wami se phala eme ki kima kyayibha?’

18. Mukonda dyahi kima kyambote kuxikina kwila Jihova watwijiya dingi kyambote etu ndenge? (Tala we o jifoto.)

¹⁸ Kima kyambote kuxikina kwila Jihova watwijiya kyambote etu ndenge ni kwila mwene umona idifwa yambote kokwetu etu kitutena ku imona. Ne mwene ni itondalu yetu, Jihova wene mumona o nguzu itwene mubhanga phala kumubelesela ni kwila mwene watuzolo. (Lom. 7:15) Kyoso ki tutendela kwila Jihova umona o nguzu yetu, kutubhana o kiswinisu kitwabhindamena phala kusuluka mu kusidivila Jihova ni ufiyele woso ni kusanguluka kwoso.

19. Ihi itwejiya yalungu ni Jihova?

¹⁹ Twejiya kwila Jihova henda. Ki twala ni phata yalungu ni maka ya. (1 Nz. 4:8) Twejiya kwila o ima yoso yatubhinga mwene, utubhinga-yu mukonda watuzolo, mwene wamesena o mbote yetu. Twejiya we kwila Jihova wamesena kuma tutambula o mwenyu wakalelaku. Mwene walondekesa o kidi kiki bhu kaxi ka sata ya kukula. O ujitu yu utubhana kidyelelu kya kwila sumbala twa akwa ituxi, tutena kusangulukisa Jihova. (Lom. 7:​24, 25) Twejiya we kwila “Nzambi wala kota o muxima wetu ndenge.” (1 Nz. 3:​19, 20) Jihova wejiya o ima yoso yalungu netu, wadyelela we kwila twanda tena kubhanga o ima itubhinga.

20. Mukonda dyahi ki twatokala kutandanganya kyavulu ni ima itwakambe kwijiya?

²⁰ Jihova ututangela yoso itwa bhingi kwijiya. Kyoso ki tuxikina ku maka ya ni kulenduka kwoso, ki twanda tandanganya ni ima itwakambe kwijiya. Mu kubhanga kiki, twanda londekesa kwila tudyelela ni muxima woso kwa Jihova, ‘yo wejiya o ima yoso’. (Jobe 36:4) Kidi kwila kitwatendela ima yoso kindala, maji twejiya kwila Jihova wanda suluka jinga mu kutulonga. Kiki kima kyambote mukonda, twanda suluka mu kudilonga ima ya ubhe yalungu ni Nzambi yetu Jihova.—Ndo. 3:11.