O Dijina Dya Jihova Dyala ni Valolo Yavulu Phala Jezú!

1-2. (a) Ihi ya bhange Jezú mu usuku ande dya kufwa kwê? (b) Ibhwidisu yebhi itwanda tambwijila mu milongi yiyi?

MU KIZUWA kya 14 kya Kinda mu mbeji ya Niza mu muvu wa 33 K.K., kuma kwexile muvunda kya, kwakambele ngo bhofele Jezú eji kumusumbisa, kumufundisa, kumubalakala, kumubeta ni kumujibha. Mwene ni jipoxolo je ja fiyele a zubhile kubhanga o Seyalu ya Ngana ku dixilu dya dikota mu inzo yathandu. Kyoso kya zubha o kubhanga o Seyalu Jezú wa bhana itendelesu phala kuswinisa o jipoxolo je. Kwakambele ngo bhofele phala kuya, Jezú wemana mu tu ithangana yu wasambe ni muxima woso. O poxolo Nzwá wasoneka o musambu yu, tutena ku usanga mu divulu dya Nzwá kibatulu 17.

² Kyoso Jezú kya bhange o musambu yu wa tandanganyele ni ihi? Kyebhi o musambu yu utukwatekesa kutendela o kima kya betele dingi kota kumwenyu wa Jezú kyoso mwene kyexile mu ixi? O milongi yiyi yanda tambwijila o ibhwidisu yiyi.

“EME NGEJIDISA O DIJINA DYÉ”

3. Ihi yazwela Jezú yalungu ni dijina dya Jihova ni ihi yamesenene kuzwela mwene? (Nzwá 17:​6, 26)

³ Mu musambu wê Jezú wambe: “Eme ngejidisa o dijina dyé.” Phala Jezú kiki kyexile o kima kyabetele kota, mukonda mwene wazwela o ima yiyi mu luyadi. (Tanga Nzwá 17:​6, 26.) Ihi ya mesenene kuzwela Jezú? O kwila mwene walongo ku maxibulu mê se o dijina dya Nzambi, nanyi? O maxibulu a Jezú exile Jijudé, mu kiki ene ejidile kya kwila o dijina dya Nzambi, Jihova. O dijina didi dimoneka lwavulu mu Mikanda ya Hebalayiku. Mu kiki o kima kyabhange Jezú ki kulonga o dijina dya Nzambi. Mukidi mwene walongo se o dijina didi dilombolola ihi. Jezú wakwatekesa o maxibulu mê kwijiya kyambote Jihova ni vondadi yê yalungu ni ixi ni athu. O kulonga o ima yabhangele kya Jihova, o ima yeji bhanga ni yebhi o idifwa yê. Jezú ngo weji tena kulonga kyambote o ima yiyi mukonda mwene wejiya kyambote Jihova, muthu woso-woso ndenge.

4-5. (a) Kyebhi o dijina dya muthu ditena kukala ni valolo phala etu? Bhana kifika. (b) Mukonda dyahi o dijina dya Jihova dya mateka kukala dingi ni valolo yavulu phala o maxibulu a Jezú?

⁴ Xinganeka kwila mu kilunga kyé mwala kafunga wala ni ufunu wa kubhanga pelasá. Eye wa mwijiya mu mivu yavulu, kupholo dya kwenda eye ukala ni uhaxi, ya akwambata ni lusolo mu kididi kya kusaka mwene mukalakala o phange yu, mwene ubhulula o mwenyu wê. Kindala eye uzola dingi kyavulu o phange yu. Kyoso kiwivwa o dijina dyê eye udilembalala o ima yoso ya kubhangele. Sumbala eye wejiya o phange yu kala kafunga, maji kindala mu kumumona, ki umumona ngo kala kafunga, maji umumona we kala o mubhuludi wa mwenyu wé.

⁵ Kyene we kimoxi, o maxibulu a Jezú ejidile kya o dijina dya Jihova. Mukonda dya ukunji wa Jezú o dijina didi dyamateka kukala dingi ni valolo yavulu phala ene. Mukonda dyahi? Mukonda Jezú wexile mu kayela o idifwa ya Tat’ê kikale mu ima yexile muzwela ni mu ibhangelu yê. Mu kiki kyoso o maxibulu kyexile mu kwivwa o ima yexile mulonga Jezú ni kumona kyebhi mwene kyexile mutalatala o athu, ene atena kwijiya kyambote Jihova.—Nzw. 14:9; 17:3.

“DIJINA DYÉ, O DIJINA DI WA NGIBHANA”

6. Ihi yamesenene kuzwela Jezú kyoso kyambe kwila amubhele o dijina dya Jihova? (Nzwá 17:​11, 12)

⁶ Ku musambu wê, Jezú wabhingi: “Langa-wu mukonda dya dijina dyé, o dijina di wa ngibhana.” (Tanga Nzwá 17:​11, 12.) O kwila kiki kilombolola kuma o dijina dya Jezú dyeji kala Jihova? Kana. Jezú walombolola o dijina dya Jihova kala “dijina” dyê. Kiki ki kilombolola kwila Jezú exile mumwixana Jihova. Mukiki, mukonda dyahi Jezú wambe kwila amubhele o dijina dya Nzambi? Kyadyanga Jihova watumikisa Jezú phala kuzwela bhukididi kye. Mwene weza mu dijina dya Tat’ê yu wa bhange madiwanu mu dijina dya Tat’ê. (Nzw. 5:43; 10:25) Ku mbandu yengi, o dijina Jezú, dilombolola “Jihova mubhuludi.” Mu dilombolwelu dya dijina dya Jezú mwala we o dijina dya Jihova.

7. Bhana kifika kilondekesa se mukonda dyahi Jezú watokalele kuzwela mu dijina dya Jihova.

⁷ Phala kutendela kyambote o maka enya, xinganeka mu kifika kiki: O mukunji muthu uya mu kididi kya Sobha anga uzwela mu dijina dya Sobha. Mukonda dya kiki o izwelu ya mukunji yala ni kutena, kyedi kala o Sobha mwene wa muzwela. Kyene we kimoxi, Jezú wexile mukunji wa Jihova yu wexile muzwela mu dijina dya Jihova.—Mat. 21:9; Luk. 13:35.

8. Mu ukexilu webhi o dijina Jihova dyexile mwa Jezú? (Makatukilu 23:​20, 21)

⁸ O Bibidya ixana Jezú kala “Dyambu” mukonda Jihova wamutumikisa phala kutudila o njimbu ni itendelesu ye ku ji-anju ni ku athu. (Nzw. 1:​1-3) Jezú nange o anju amutumikisile kwa Jihova phala kulanga o akwa Izalayele kyoso kyexile mu kikangalakata. Kyoso Jihova kyatendelesa akwa Izalayele kubelesela o anju yoyo, mwene we wajimbulula se mukonda dyahi. Mwene wambe: “Mukonda o dijina dyami dyala mwa mwene.”a (Tanga Makatukilu 23:​20, 21.) Jihova wambe kiki mukonda Jezú wexile o mukunji, wexile o muthu wabetele kota mu kuzokela ni kuzelesa o dijina dya Tat’ê.

“TATA, JINGISA O DIJINA DYÉ”

9. Phala Jezú o dijina dya Jihova dyexile ni valolo yebhi?

⁹ Kala kitwamono o dijina Jihova kyexile kya o kima kyabeta kota phala mwene ande dya kwiza mu ixi. Kyoso kyexile mu ixi o ima yoso yabhange Jezú yalondekesa o valolo yexile nayu o dijina dya Jihova phala mwene! Kudisukilu dya ukunji we, Jezú wabhingi kwa Jihova: “Tata, jingisa o dijina dyé.” Mukithangana kyenyokyo Jihova wamutambwijila ni dizwi dya swina, kyedile kala nzaji. Jihova wambe: “Eme nga dijingisa kyá, nganda dijingisa dingi.”—Nzw. 12:28.

10-11. (a) Kyebhi Jezú kya jingisa o dijina dya Jihova ? (Tala we ofoto.) (b) Mukonda dyahi o dijina dya Jihova dyabhingi kudijingisa ni kudizelesa?

¹⁰ Jezú wajingisa we o dijina dya Tat’ê. Kyebhi? Ukexilu umoxi o kuzwela yalungu ni idifwa yakatunda ya Tat’e, ni ima yambote yene mubhanga. Maji kikyene ngo. Jezú wabhingile kulondekesa kwila kyoso Jihova kya bhangele o ima, yoso ya yukile ni kwila o dijina dye dijina dikola.b Jezú wa londekesa o valolo yala nayu o dijina didi kyoso kyalongo o maxibulu mê o kusamba. Mwene wambe: “Tat’etu wene mu dyulu dijina dyé adizelese.”—Mat. 6:9.

¹¹ Mukonda dyahi o dijina dya Jihova dyabhingile ku dijingisa ni kudizelesa? Jezú wabhingile kulondekesa kwila o ima yoso yabhange Jihova Nzambi, ya yuka ni kwila o dijina dyê dijina dikola. Satanaji wambe kwila Jihova mukwa makutu yu waditunu kubhana kima kya valolo kwa Adá ni Eva. (Dim. 3:​1-5) Satanaji walondekesa we kwila Jihova kejiye kutumina kyambote. Mukonda dya Satanaji kutanga makutu, athu avulu abanza kwila Jihova Nzambi muthu wa ibha. Ku pholo dya kwenda Satanaji wa tatela o jiselevende ja Jihova a tungile mu izuwa ya Jobe kwila exile ngo musidivila Jihova mukonda dya jimbote. Mwene we watatela o athu kwila keji londekesa henda yakidi kwa Jihova, ni kusuluka muku mu sidivila mu ithangana ya bhonzo. (Jobe 1:​9-11; 2:4) Twanda mona se nanyi o mukwa makutu, Jihova inga Satanaji.

“NGIBHANA O MWENYU WAMI”

12. Mukonda dya dijina dya Jihova, Jezú wexile polondo phala kubhanga ihi?

¹² Mukonda dya henda ye kwa Jihova, Jezú wamesenene kubhanga yoso ya tenene phala kuzelesa ni kujingisa o dijina dya Jihova. Mwene wa kexile polondo phala kufwa, ni kulondekesa kwila Jihova muthu wa yuka ni kwila o ukexilu we wa kubhanga o ima, ukexilu wambote. Mukonda dya kiki Jezú wambe: “Ngibhana o mwenyu wami”. (Nzw. 10:​17, 18) Adá ni Eva a yukile, ene adyangele kubhana dikunda kwa Jihova ni kukala bhu mbandu ya Satanaji.c Jezú kadifwile ni ene, Jezú wexile polondo phala kwiza mu ixi ni kulondekesa o henda yexile nayu kwa Tat’e. Mwene wa bhange kiki mu kubelesela Jihova ku mwenyu we woso. (Jih. 4:15; 5:​7-10) Jezú wexile mukunji wa yuka wa Jihova, mwene wexile fiyele kwa Jihova kate mu ufwilu we. (Jih. 12:2) Mu kubhanga kiki, walondekesa kwila wazolo Jihova ni dijina dya Jihova.

13. Mukonda dyahi Jezú, o muthu wa fwamene kulondekesa kwila Satanaji mukwa makutu? (Tala we ofoto.)

¹³ Yoso yabhange Jezú yalondekesa kwila Satanaji mwene o mukwa makutu, Jihova kana! (Nzw. 8:44) Jezú wejidile kyambote Jihova, muthu woso-woso ndenge. Mukiki, se o makutu atele Satanaji kyexile kidi, Jezú weji kwijiya. Maji o ima yoso yazwela Satanaji, makutu. Mukonda dya kiki, Jezú wa musuluka mu kuzokela o dijina dya Jihova. Kate mwene kyoso kyedile kala Jihova kexile ni mwene, Jezú wa solele kufwa muveji dya kubhana dikunda kwa Tat’e ya henda.—Mat. 27:46.d

“NGAZUBHA O KIKALAKALU KI WA NGIBHANA”

14. Mukonda dya Jezú kukala fiyele, Jihova wa mubesowala kyebhi?

¹⁴ Mu musambu wabhange Jezú ande dya kufwa kwe, mwene wambe: “Ngazubha o kikalakalu ki wa ngibhana phala ku kibhanga.” (Nzw. 17:4) Jezú wa dyelele kwila se wa kolokotele mu ufiyele we, Jihova weji mubesowala. Mwene wa lungile mu kubanza kiki. Jihova ka mwehela kunangenena mu mbila. (Ika. 2:​23, 24) Jihova wa fukununa Jezú yu wa muzangeleka mu kididi kya katunda ku dyulu. (Fil. 2:​8, 9) Ku pholo dya kwenda Jezú wa kituka Sobha ya Utuminu wa Nzambi. O Utuminu yu wanda bhanga ihi? Jezú utubhana o kitambwijilu ku mbandu ya kayadi wa musambu we: “O Utuminu wé wize. Vondadi yé [kifwa o vondadi ya Jihova] a ibhange we mu ixi kala kyene mu ibhanga ku dyulu.”—Mat. 6:10.

15. Ihi dingi yanda bhanga Jezú?

¹⁵ Kwa kambe ngo bhofele, Jezú wanda bhânga ni jinguma ja Nzambi yu wanda bwika o athu a ibha mu Alumajedone. (Dij. 16:​14, 16; 19:​11-16) Mukusuluka Jezú wanda takula Satanaji ku “dikungu dyazongo,” kwenyoko Satanaji kanda tena kubhanga kima. Mwene kanda tena kusuluka mu kunganala o athu. (Dij. 20:​1-3) Jezú wanda bheka o kutululuka mu ixi. Wanda kwatekesa o athu kukituka athu a yuka ku Utuminu we wa midi ya mivu, ni kufukununa o athu afu kya. Mwene we wanda bhangesa o ixi yoso kukala palayizu. Ku disukilu o vondadi ya Jihova yanda dikumbidila!—Dij. 21:​1-4.

16. Kyebhi kyanda kala o mwenyu kyoso kyanda bhita o Utuminu wa midi ya mivu?

¹⁶ Kyebhi kyanda kala o mwenyu kyoso kyanda bhita o Utuminu wa midi ya mivu? Kikwanda kala dingi kituxi. O athu kanda bhinga dingi muloloki mukonda dya ituxi ya, ene wa kanda bhindamena dingi o 144.000 phala kukala o akunji’â, né Jezú phala kukala o mukunji wâ wadikota, n’atene kukala makamba a Jihova. Ku disukilu, “o nguma isukidilaku o ku ibhwisa, o kufwa.” O athu afu kya anda kwa fukununa. oso mu ixi anda kala athu ayuka.—1 Ko. 15:​25, 26.

17-18. (a) Ihi yanda bhita ku disukilu dya Utuminu wa midi ya mivu? (b) Ihi yanda bhanga Jezú ku disukilu dya Utuminu we? (1 Kolindu 15:​24, 28) (Tala we ofoto.)

¹⁷ O kima kyengi kyala ni valolo yavulu, yanda bhita kudisukilu dya Utuminu wa midi ya mivu. Kima kyebhi? Seku muthu wanda kala ni phata ya kwila Jihova Nzambi ya yuka, Ukola. Mukonda dyahi? Mu njaludi ya Edene Satanaji wa tatela Jihova kwila, mwene kexile mutumina ni henda ni kwila mukwa makutu. Tunde o kithangana kyenyokyo o dijina dya Jihova ene mudizelesa mu ithangana yavulu kwa yo ene mu mujingisa ni ku muxila. Ku disukilu dya Utuminu wa midi ya mivu, o athu oso anda xila Jihova. Enyoso anda mona kwila, sé phata Mwéne o Tata ya ya henda.

¹⁸ Sé phata, o ima yoso yiyi yanda londekesa kwila Satanaji mukwa makutu. Ihi yanda bhanga Jezú ku disukilu dya Utuminu we? O kwila mwene wanda kayela o phangu ya Satanaji ni kubhukumukina Jihova? Kana! (Tanga 1 Kolindu 15:​24, 28.) Jezú wanda vutwila o Utuminu kwa Tat’e, yu wanda suluka ni kubelesela Tat’e. Jezú kadifu ni Satanaji. Mwene wala polondo phala kubhana o ungana wê woso kwa Jihova, mukonda wazolo Tat’ê.

19. O dijina dya Jihova dilombolola ihi phala Jezú?

¹⁹ Mu yoso i twadilongo mu milongi yiyi, tutendela se mukonda dyahi Jihova wabhana o Dijina dyê kwa Jezú! Jezú walondekesa ni kuyuka kwoso o idifwa ya Tat’e. Mu kiki o dijina dya Jihova, dilombolola ihi phala Jezú? Dilombolola o ima yoso. Mukonda dya dijina dya Jihova, Jezú wabhana o mwenyu we. Mukonda dya dijina dya Jihova, kudisukilu dya midi ya mivu mwene wanda vutwila yoso kwa Tat’e. Kyebhi kitutena ku kayela o phangu ya Jezú? Twanda tambwijila o kibhwidisu kiki mu milongi ya kayela.