O Dijina Dya Jihova Dyala ni Valolo Yavulu Phal’etu!

1-2. Kyebhi kitwejiiya kwila o dijina dya Jihova, kyene o kima kyabeta dingi kota phala Jezú?

O DIJINA dya Jihova, o kima kyabeta dingi kota phala Jezú. Mwene o muthu wabeta dingi kota mu kuzokela o dijina dya Jihova. Kala kitwamono mu milongi yatundumu, Jezú wakexile polondo phala kufwa phala kulondekesa kwila Jihova, Nzambi yazele ni kwila yoso yabhange Tat’ê, yayuka. (Mál. 14:36; Jih. 10:​7-9) Kyoso kyanda bhita o Utuminu wê wa midi ya mivu, Jezú wanda vutwila o utuminu wê kwa Tat’ê, mukonda wamesena kwila Jihova utambula o kijingu kyoso. (1 Ko. 15:​26-28) O valolo ibhana Jezú mu dijina dya Jihova ilondekesa kwila mwene wazolo kyavulu Tat’ê.

² Jezú weza mu ixi phala kuzwela mu dijina dya Tat’ê. (Nzw. 5:43; 12:13) Mwene wejidisa o dijina dya Tat’ê ku maxibulu mê. (Nzw. 17:​6, 26) Mwene wabhange madiwanu yu walongo mu dijina dya Tat’ê. (Nzw. 10:25) Mu kuzwela yalungu ni maxibulu mê, Jezú wabhingi kwa Jihova: “Tata Ukôla, langa-wu mukonda dya dijina dyé.” (Nzw. 17:11) Kiki kilondekesa kwila phala Jezú, o dijina dya Jihova, kyene o kima kyabeta dingi kota. Xinganeka ngo: Kyebhi o muthu kyatena kuzwela kwila Kidistá, se kejiya o dijina dya Jihova, né kuditumbula?

3. Ihi itwanda dilonga mu milongi yiyi?

³ Kuma tu Jikidistá ja kidi tukayela o phangu ya Jezú mu kulondekesa o henda ni kuxila o dijina dya Jihova. (1 Ph. 2:21) Mu milongi yiyi twanda mona se mukonda dyahi o yo aboka o “njimbu . . . yambote ya Utuminu”, Jihova wa exana kwila jimbangi jê. (Mat. 24:14) Twanda dilonga we se mukonda dyahi o dijina dya Jihova dyala ni valolo yavulu phal’etu.

“ATHU PHALA KWAMBATA O DIJINA DYÊ”

4. (a) Ihi yambe Jezú ku maxibulu mê ande dya kuvutuka ku dyulu? (b) Kibhwidisu kyebhi ki twanda tambwijila?

⁴ Ande dya kuvutuka ku dyulu, Jezú wambela o maxibulu mê: “Kyoso o nzumbi ikôla ki yanda kwiza kuthandu dyenu, mwanda tambula kutena ni kukala mu jimbangi jami mu Jeluzaleme, mu Judeya yoso, mu Samadiya, katé ni ku maxokololo a jixi.” (Ika. 1:8) Kiki kilombolola kwila o maxibulu a Jezú eji boka o njimbu yambote mu ididi yoso, kana ngo mu Izalayele. Mu kubhita kithangana athu akwa jixi jengi eji tena we kukala maxibulu a Jezú. (Mat. 28:​19, 20) Maji Jezú wambe: ‘Mwanda kala mu jimbangi jami.’ O kwila o maxibulu ya eji kala ngo jimbangi ja Jezú inga atokalele we kwijiya o dijina dya Jihova? O kibatulu kya 15 kya divulu dya Ikalakalu kyanda tukwatekesa kutambwijila o kibhwidisu kiki.

5. Kyebhi o jipoxolo ni tufunga mu Jeluzaleme kyalondekesa kwila athu oso abhingi kwijiya o dijina dya Jihova? (Tala we ofoto.)

⁵ Ku muvu wa 49 K.K., o jipoxolo ni tufunga adyongeka ku Jeluzaleme phala kumona se o athu akwa jixi jengi akambele kwa asaya, atokalele kubhanga ihi phala kukituka jikidistá. Kudisukilu dya kyonge kiki, Tiyaku ndenge ya Jezú, wambe: “[Phetele] wa tutangela kyambote kyebhi Nzambi kya lembalala o athu akwa jixi jengi, yu wasolo mwaxaxi kâ athu phala kwambata o dijina dyê.” Tiyaku wakexile muzwela yalungu ni dijina dya nanyi? Mu kutumbula o izwelu ya Polofeta Amoji, mwene wambe: “Phala athu amukwá ni akwa jixi jengi asote Jihova ni mwanyu woso, athu a exana mu dijina dyami, kyene kyambe Jihova.” (Ika. 15:​14-18) O maxibulu a ubhe ya, keji dilonga ngo yalungu ni Jihova, maji eji kwa exana we mu dijina dyê. Kiki kilombolola kwila ene eji kwijidisa o dijina dya Jihova ku akwa ni kwila eji kwa ejiya kuma jimbangi jê.

6-7. (a) Mukonda dyahi Jezú weza mu ixi? (b) Kyebhi o kima kya beta dingi kota kyabhangesa Jezú kwiza mu ixi?

⁶ O dijina dya Jezú dilombolola “Jihova u bhulula.” Kiki kidi mukonda bhukaxi ka Jezú, Jihova ubhulula yo ala ni kixikanu. Jezú weza mu ixi phala kubhana o mwenyu wê phala kubhulula o athu. (Mat. 20:28) Mu kubhanga kiki, mwene wabhangesa kwila o ituxi ya athu a iloloka ni kwila atene kukala ni mwenyu wakalelaku.—Nzw. 3:16.

⁷ Maji mukonda dyahi o athu abhingile kwa abhulula? Mukonda dya ima yabhiti mu njaludi ya Edene. Kala kitwamono mu milongi yatundu-mu, Adá ni Eva abhukumukina Jihova. Mu kiki ene atexi o ujitu wa kukala ni mwenyu wakalelaku. (Dim. 3:​6, 24) Jezú keza ngo mu ixi phala kubhulula o athu, maji weza we phala kubhanga dingi o kima kyabeta kota. Satanaji wambe kwila Jihova mukwa makutu. (Dim. 3:​4, 5) Kyenyiki o athu atokalele kwijiya kwila Jihova kabhange kima kya yibha ni kwila o dijina dyê dikola. Jezú wexile o mukunji wa Jihova, mwene wabhange o vondadi ya Tat’ê ni kuyuka kwoso. Mukonda dya kiki, Jezú wexile o muthu wabeta kota phala kuzelesa o dijina dya Jihova.

8. O maxibulu oso a Jezú atokala kubhanga ihi?

⁸ Athu oso amesenene kukala maxibulu a Jezú, kikale o Jijudé mba akwa jixi jengi, atokalele kwijiya kwila Jihova, o Tata ya Jezú, mwéne watubhana o mwenyu. (Nzw. 17:3) Kala Jezú, ene eji kwa exana mu dijina dya Jihova. Ene we atokalele kutendela o valolo ya kuzelesa o dijina didi. Kiki kyene o kima kyeji kwa abhangesa kubhuluka. (Ika. 2:​21, 22) Kyenyiki o maxibulu oso a fiyele a Jezú, atokala kudilonga yalungu ni Jihova, ni Jezú. Tutena kutendela se mukonda dyahi Jezú watumbula o izwelu yiyi mu musambu wê: “Eme nga ejidisa o dijina dyé, nganda dijidisa dingi, phala o henda i wa ngi londekesa ikale we ni ene, eme ni ngikale kumoxi ni ene.” —Nzw. 17:26.

“ENU WENU MU JIMBANGI JAMI”

9. Kyebhi kitutena kulondekesa kwila o dijina dya Jihova, kyene o kima kyabeta kota phala etu?

⁹ Kate bhabha twamono kwila o maxibulu oso a Jezú atokala kuzelesa o dijina dya Jihova. (Mat. 6:​9, 10) O dijina dya Jihova, kyene o kima kyabeta kota ku mwenyu wetu. Etu twatokala kulondekesa kiki bhukaxi ka ibhangelu yetu. Kyenyiki ihi itwatokala kubhanga phala kuzelesa o dijina dya Jihova ni kulondekesa kwila Satanaji mukwa makutu?

10. O divulu dya Izaya kibatulu 42 ndu ku kibatulu 44 dizwela yalungu ni ihi? (Izaya 43:9; 44:​7-9) (Tala we ofoto.)

¹⁰ Mu divulu dya Izaya kibatulu 42 ndu kibatulu 44 tudilonga se ihi itwatokala kubhanga phala kuzelesa o dijina dya Jihova. Mu ibatulu yiyi, Jihova uzwela kwa yo kamu musividila phala nalondekese se o jinzambi jâ ja kidi mwene. Kala kyene mubhita mu jinzo ja kufundisa, Jihova ubhinga se kwala muthu utena kulondekesa kwila kiki kidi. Maji ki kwamoneka muthu!—Tanga Izaya 43:9; 44:​7-9.

11. Ihi yambe Jihova ku mundu wê mu divulu dya Izaya 43:​10-12?

¹¹ Tanga Izaya 43:​10-12. Mu kuzwela ni mundu wê, Jihova wa ambela wixi: “Enu wenu mu jimbangi jami, . . . eme ngi Nzambi.” Mwene wa abhange we o kibhwidisu kiki: ‘O kwila kwala Nzambi yengi, katuku eme?’ (Iza. 44:8) Twala ni ujitu wadikota wa kutambwijila o kibhwidisu kiki, mukonda bhukaxi ka izwelu ni ibhangelu yetu, tulondekesa kwila Jihova mwéne o Nzambi ya kidi. O dijina Dyê dyene o dijina dya beta dingi kota. Mu kiki, né mwene se Satanaji ututendala, bhukaxi ka wendelu wetu tulondekesa kwila, twazolo Jihova ni kwila twala fiyele kwa mwene. Mu kubhanga kiki twamukwatekesa kuzelesa o dijina dya Jihova.

12. Kyebhi o kikanenu kyala mu divulu dya Izaya 40:​3, 5 kya dikumbidila?

¹² Kyoso kituzelesa o dijina dya Jihova, twamukayela o phangu ya Jezú Kidistu. Polofeta Izaya wambe kwila sayi muthu weji ‘yudika o njila phala Jihova.’ (Iza. 40:3) Kyebhi o kikanenu kiki kyadikumbidila? Nzwá dya Batizu wayudika o njila phala Jezú. Jezú Kidistu weza mu dijina dya Jihova, wazwela we mu dijina dya Jihova. (Mat. 3:3; Mál. 1:​2-4; Luk. 3:​3-6) Polofeta Izaya wambe dingi: “O fuma ya Jihova anga i tukuluka.” (Iza. 40:5) O kikanenu kiki kyadikumbidila kyebhi? Kyoso Jezú kyexile mu ixi, wakayela ni kuyuka kwoso o idifwa ya Jihova. Kyedile kala Jihova, mwéne wexile mu ixi.—Nzw. 12:45.

13. Kyebhi kitutena kukayela o phangu ya Jezú?

¹³ Kala Jezú, etu we tu jimbangi ja Jihova. Twambata o dijina dyê, tuzwela ku athu o ima yoso ibhanga mwene. Maji phala kukala jimbangi jambote ja Jihova, twatokala kutangela we o athu o ima yabhange kya Jezú phala kuzelesa dijina dya Jihova. (Ika. 1:8) Seku muthu wazokela dingi o dijina dya Jihova, Jezú ndenge. (Dij. 1:5) Maji, ihi dingi itutena kubhanga phala kulondekesa kwila o dijina dya Jihova dyala ni valolo phal’etu?

KYEBHI KITULONDEKESA KWILA O DIJINA DYA JIHOVA DYALA NI VALOLO PHAL’ETU?

14. Kyebhi kitudivwa yalungu ni dijina dya Jihova? (Jisálamu 105:3)

¹⁴ Tudizangeleka mukonda dya dijina dya Jihova. (Tanga Jisálamu 105:3.) Jihova usanguluka kyavulu kyoso ki tudizangeleka mukonda dya dijina dyê. (Jel. 9:​23, 24; 1 Ko. 1:31; 2 Ko. 10:17) Ujitu wadikota kubhana kijingu kwa Jihova ni kuzokela o ungana wê. Kitutokala kukala ni jisonyi ja kutangela o jivizinyu jetu, o jikolela jetu ku salu ni ku xikola kwila tu jimbangi ja Jihova. O Dyabhu kamesena kwila tusuluka mu kuzwela yalungu ni dijina dya Jihova ku athu. (Jel. 11:21; Dij. 12:17) Mu kidi, Satanaji ni oso ene mumwanga makutu alungu ni Jihova, amesena kwila tujimba o dijina dya Jihova. (Jel. 23:​26, 27) Maji mukonda dya henda yetu ku dijina dya Jihova, twatokala kusuluka mu ku mubhana kijingu mu “kumbi dyoso dya kambàmba.”—Jisá. 5:11; 89:16.

15. Ihi ilombolola kudikola mu dijina dya Jihova?

¹⁵ Tusuluka mu kudikola mu dijina dya Jihova. (Jowe. 2:32; Lom. 10:​13, 14) O kudikola mu dijina dya Jihova, kikwalungu ngo ni kwijiya o dijina dyê ni kuditumbula. Kwalungu we ni kumwijiya, kumudyelela ni kumubhinga o kikwatekesu kyê ni itendelesu yê. (Jisá. 20:7; 99:6; 116:4; 145:18) Tuzwela we ku akwetu yalungu ni dijina dya Jihova, o idifwa yê, mu kwakwatekesa kulungulula o mwenyu yâ, n’atene kusangulukisa Nzambi ni kubhuluka.—Iza. 12:4; Ika. 2:​21, 38.

16. Kyebhi kitutena kulondekesa kwila Satanaji mukwa makutu?

¹⁶ Twala polondo phala kutala hadi mukonda dya dijina dya Jihova. (Tiy. 5:​10, 11) Kyoso kitudibhana ni ibhidi, maji tukolokota fiyele kwa Jihova, tulondekesa kwila Satanaji mukwa makutu. Mu izuwa ya Jobe, Satanaji wambe kiki yalungu ni jiselevende ja Jihova: “O muthu yoso yala na-yu u i bhana mu ku kula o mwenhu wê.” (Jobe 2:4) Satanaji wambe kwila o athu eji bheza ngo Jihova kyoso o ima yeji kala kyambote, maji mu ithangana ya ibhidi, eji bhana dikunda kwa Jihova. Jobe walondekesa kwila o izwelu yiyi ya Satanaji, makutu. Etu we tutena kulondekesa kwila kabasa kima kibhanga Satanaji, nuka twanda bhana dikunda kwa Jihova. Tutena kudyelela kwila Jihova wanda suluka mu kutulanga mukonda dya dijina dyê.—Nzw. 17:11.

17. Kala kyamba o mukanda wa 1 Phetele 2:​12, mu ukexilu webhi mututena kubhana kijingu kwa Jihova?

¹⁷ Tuxila o dijina dya Jihova. (Jisa. 30:9; Jel. 7:​8-11) Kuma tu akunji a Jihova ni kwila twambata o dijina dyê, o ibhangelu yetu itena kujingisa o dijina dyê mba kudixidisa. (Tanga 1 Phetele 2:12.) Mu kiki, twamesena kubhanga yoso ni yoso phala kuximana Jihova bhukaxi ka izwelu yetu ni ibhangelu yetu. Sumbala tu akwa ituxi, maji mu kubhanga kiki tutena kubhana kijingu ku dijina dya Jihova.

18. Webhi o ukexilu wa mukwa mututena kulondekesa kwila o dijina dya Jihova dyala ni valolo yavulu phal’etu? (Tala we kulwiji.)

¹⁸ Tutandanganya dingi ni dijina dya Jihova, o ima ibanza o athu yalungu n’etu, ndenge. (Jisá. 138:2) Mukonda dyahi? Mukonda, kyoso kitusangulukisa Jihova, athu avulu aluwala, mu kiki-phe, atuzwela kyayibha.a Kyoso Jezú kyamuphaphela ku taka, o athu amumono kala kifumbe, ya amusebhulula. Maji mwene wexile polondo phala kufwa mu ukexilu yú, n’atene kubhana kijingu ku dijina dya Jihova. “Mwene kakexile ni jisonyi” mukonda katandanganyele ni ima yeji banza o athu yalungu ni mwene. (Jih. 12:​2-4) Mwene wamesenene ngo kubhanga o vondadi ya Nzambi.—Mat. 26:39.

19. Kyebhi ki udivwa yalungu ni dijina dya Jihova ni mukonda dyahi?

¹⁹ Tudizangeleka mukonda twambata o dijina dya Jihova ni kwila tu Jimbangi Jê. Mukonda dya kiki, twala polondo phala kutusebhulula ku athu. Phal’etu o dijina dya Jihova dyabeta dingi kota, o ima izwela o athu yalungu n’etu, ndenge. Kabasa kima kibhanga Satanaji, twala polondo phala kusuluka mu kubhana kijingu mu dijina dya Jihova. Se tubhanga kiki, mu kukayela o phangu Jezú, twanda londekesa kwila o dijina dya Jihova, kyene o kima kyabeta kota phal’etu.