Kyebhi Jihova Kyatukwatekesa Kukolokota?

1. Mukonda dyahi twabhingi kukolokota ni kikwatekesu kyebhi kitwala nakyu? (1 Phetele 5:10)

MU IZUWA isukidilaku, o mundu wa Jihova abhingi kukolokota. Sayi ya akate kya mu mivu yavulu, amukwa amudibhana ni ndolo ya kufunda ndandu mba Kamba dya kazola. Amukwa amukwazukutisa ku jindandu jâ mba ku jinguvulu. (Mat. 10:​18, 36, 37) Dyelela kwila kibhidi kyoso-kyoso ki udibhana nakyu, Jihova wanda suluka mu ku kukwatekesa kukolokota.—Tanga 1 Phetele 5:10.

2. Ihi yanda tukwatekesa kukolokota?

² Phala kukolokota twatokala kukala fiyele kwa Jihova ni ku musidivila ni kusanguluka, ne mwene kyoso kitwamu dibhana ni ibhidi, amutuzukutisa mba twamudibhana ni tendasá. O kukolokota kikwijila mu nguzu yetu kana, maji kwijila kwa Jihova yo utubhana “o kutena kusomboka o kutena kwa athu.” (2 Ko. 4:7) Mu milongi yiyi, twanda dilonga ima iwana itubhana Jihova phala kutukwatekesa.

O MUSAMBU

3. Mukonda dyahi twamba kwila o musambu, madiwanu?

³ Jihova watubhana kima kyala ni valolo yavulu kitukwatekesa kukolokota. Sumbala tu akwa ituxi, mwene watubhana o ujitu wa kuzwela ni mwene. (Jih. 4:16) Xinganeka, tutena kuzwela ni Jihova maka oso-oso kabasa kithangana. Mwene utena ku twivwa mu dimi dyoso-dyoso, bhu kididi kyoso-kyoso, nemwene se twala ubheka mba mu kaleya. (Jona 2:​1, 2; Ika. 16:​25, 26) Sayi bhabha mukonda dya ibhidi yavulu itwamudibhana nayu, kitutena kutumbula ne ngo kizwelu kimoxi, ne kiki o ima itwamesenene kuzwela Jihova wayijiya. (Lom. 8:​26, 27) Mu kidi o musambu, madiwanu!

4. Kyebhi ki twejiya kwila kyoso kitusamba kwa Jihova mu kumubhinga kikwatekesu phala kukolokota, kiki kyalungu ni vondadi yê?

⁴ O maka a Jihova atuxikinisa kwila “ima yoso i tubhinga mu vondadi yê, mwene u twívwa.” (1 Nz. 5:14) O kwila tutena kubhinga kikwatekesu kwa Jihova phala kukolokota? Xê tutena! Kubhanga kiki kwalungu ni vondadi yê. Mukonda dyahi tuzwela kiki? Kyoso kitukolokota tulondekesa kwila Jihova Nzambi ya henda ni kwila Satanaji mukwa makutu. (Jisa. 27:11) O Bibidya yamba we kwila Jihova wala polondo “phala kulondekesa o kutena kwê mu kukwatekesa yó a mubheza ni muxima woso.” (2 Mal. 16:9) Mu kiki tutena kudyelela kwila Jihova wala ni kutena ni hanji ya kutukwatekesa kukolokota.—Iza. 30:18; 41:10; Luk. 11:13.

5. Kyebhi o musambu utena kutukwatekesa kutululuka? (Izaya 26:3)

⁵ O Bibidya yamba kwila kyoso ki tusamba kwa Jihova mu kumubhinga kikwatekesu, “o kutululuka kwa Nzambi kusomboka o kitongolwelu kyoso, kwanda langa o mixima ni ilunji” yetu. (Fil. 4:7) Etu tusanguluka kyavulu mu kukala ni kikwatekesu kiki. O athu ku mundu adibhana we ni maka, ene abhanga ima yavulu phala kutululuka, mba phala kujimba o maka mâ. O kubhanga kiki kitena kukala kilwezu, mukonda o muthu atena ku mufwinyisa ku madimonyo. (Sokesa ni Matesu 12:​43-45) Ne mwene se o muthu utululuka mu kubhanga kiki, maji kanda kala ni kutululuka kwa kidi, o kutululuka kwa Jihova. Kyoso kitusamba kwa Jihova, tulondekesa kwila twamudyelela. Mwene wanda tubhana o “kutululuka kwa kidi.” (Tanga Izaya 26:3.) Ukexilu umoxi wa Jihova kututululukisa o kutukwatekesa kulembalala jivelusu ji tuswinisa, o jivelusu jiji jilondekesa kwila Jihova watuzolo ni kwila wamesena kutukwatekesa. Kiki kitukwatekesa kutululuka.—Jisá. 62:​1, 2.

6. Mu misambu yé, kiwatokala kujimba ihi? (Tala we ofoto.)

⁶ Ihi i utena kubhanga? Se wala ni maka, tangela kwa Jihova kyebhi ki wamudivwa. ‘Kimbamba kyoso-kyoso kya ku xina, iza na-kyu kwa Jihova.’ (Jisá. 55:22) Bhinga kwa Jihova phala kukubhana unjimu ni utene kudibhana ni maka uwala nawu. (Jisa. 2:​10, 11) Kana kujimba we kusakidila Jihova mu misambu yê. (Fil. 4:6) Izuwa yoso xinganeka kyebhi Jihova kyene mu ku kukwatekesa phala kukolokota, anga musakidile mu yoso. Kana kwehela o ibhidi yé kukufidisa kumona o mabesá a Jihova.—Jisá. 16:​5, 6.

O MAK’Â NZAMBI

7. Kyebhi o kudilonga o Bibidya itena kutukwatekesa kukolokota?

⁷ Jihova watubhana o maka mê phala kutukwatekesa kukolokota. Mu Bibidya tusanga-mu jivelusu javulu jilondekesa kwila Jihova wamesena mwene kutukwatekesa. Mu kifika, o divulu dya Matesu 6:8 yamba: “Tat’enu wejiya kyá o ima i mwa bhindamena ande mwene dya ku mu bhinga.” Jezú watumbula o izwelu yiyi, mwene wejiya dingi kyambote Jihova muthu woso-woso ndenge. Kyenyiki twadyelela kwila Jihova wanda tukwatekesa se tudibhana ni ibhidi. Mu Bibidya tusangamu izwelu yavulu ilondekesa kwila Jihova wanda tukwatekesa kyoso kitudibhana ni ibhidi.—Jisá. 94:19.

8. (a) Kitendelesu kyebhi kitubhana o Bibidya? (b) Kyebhi o kitendelesu kiki kitukwatekesa kukolokota?

⁸ O itendelesu ya Bibidya itena kutukwatekesa kukolokota, yene itukwatekesa we kusola kyambote o ima ku mwenyu wetu. (Jisa. 2:​6, 7) Mu kifika o Bibidya itutendelesa phala ki tutandanganye ni kizuwa kya mungu, maji twatokala kudyelela kwila Jihova wanda tukwatekesa jinga kabasa kizuwa. (Mat. 6:34) Kyoso kitukala ni ukexilu wa kutanga o Bibidya ni ku ixinganeka, ki kyanda tubhonza kulembalala o itendelesu yê.

9. Kyebhi o misoso ya Bibidya itukwatekesa kudyelela dingi kwa Jihova?

⁹ Mu Bibidya tusanga-mu misoso yavulu ya athu kala etu adyelele kwa Jihova, Jihova wa akwatekesa. (Jih. 11:​32-34; Tiy. 5:17) Kyoso kituxinganeka mu misoso yiyi o kidyelelu kyetu kwa Jihova kidibhandekesa dingi. Tumona kwila “Nzambi dilengelu dyetu, nguzu jetu, kota dya dikwatekesu dya zukama mu jiphaxi.” (Jisá. 46:1) Kyoso kitudilonga o phangu ya jiselevende jafiyele ja Jihova mu ukulu, tukolokota kala ene ni kukala ni kixikanu kyakolo.—Tiy. 5:​10, 11.

10. Ihi i utena kubhanga phala kukatula dingi mbote mu milongi ya Bibidya?

¹⁰ Ihi i utena kubhanga? Tanga o Bibidya izuwa yoso, anga soneka o jivelusu jiwejiya kwila jene mu kukwatekesa. Avulu ene mutanga o kibatulu kya kizuwa mu kamene, kiki kyene mwaswinisa mu kizuwa kya muvwimba. Phange amwixana Madiya,a wamono kwila kiki kidi, kyoso kyamutangela kwila o jitata jê exile ni uhaxi ki wivu milongo. Ihi yamukwatekesa kukolokota? Ande dya kufwa kwâ, mwene wambe: “Izuwa yoso ngexile mutanga kibatulu kya kizuwa mu kamene ni ku ixinganeka, kiki kya ngikwatekesa kudikwatenena kwa Jihova ni ku maka mê ni mu ima itulonga mwene bhukaxi ka maka mê o Bibidya, mu veji dya kudikwatenena ngo mu maka ungakexile nawu.”—Jisá. 61:2.

O JIPHANGE JETU

11. O kwijiya kwila o jiphange jetu akolokota mu ibhidi, kitukwatekesa kudivwa kyebhi?

¹¹ Ku mundu woso, Jihova utubhana jiphange atukwatekesa kukolokota. O kwijiya kwila o jiphaxi itwamudibhana naju, jene jimoxi jamudibhana naju o jiphange jetu, kitudyelelesa kwila kyetu ngo twamutala hadi. (1 Ph. 5:9) Kiki kilombolola kwila kibhidi kyoso-kyoso kitudibhana nakyu, sayi kya muthu wadibhanene nakyu yu wakolokota. Mu kiki tutena kudyelela kwila twanda tena we kukolokota!—Ika. 14:22.

12. Kyebhi o jiphange jetu kyatukwatekesa ni kyebhi kitutena kwa akwatekesa? (2 Kolindu 1:​3, 4)

¹² Kyoso kitukolokota o jiphange jetu atuswinisa. Kiki kyene kyabhiti ni poxolo Phawulu. Mu mikanda yê, mwene wexile mutumbula o majina a jiphange exile mu mukwatekesa ni kwa asakidila kyoso mwene kyexile mu kaleya mu inzo yê. Ene amuswinisa ni izwelu ya henda ni kumukwatekesa ni ima yabhindamene. (Fil. 2:​25, 29, 30; Kol. 4:​10, 11) Lelu o jiphange jetu atukwatekesa we kyoso kitudibhana ni ibhidi. Etu twa akwatekesa ni ima yabhindamena ene, ene we atukwatekesa ni ima itwabhindamena.—Tanga 2 Kolindu 1:​3, 4.

13. Ihi yakwatekesa phange Maya kukolokota?

¹³ O jiphange ene muswinisa kyavulu phange ya muhatu amwixana Maya watungu mu ixi ya Rússia. Mu muvu wa 2020, o masoladi abokona mu inzo yé ya akexile mutokwesa mu imbamba yoso, mu kusuluka amufundisa mukonda dya kuzwela ni athu yalungu ni Bibidya. Mwene wambe: “Mu kithangana kyenyokyo ngatohokele kyavulu, ngatandanganyele, ngaluwalele we kyavulu, maji o jiphange exile mu ngi xinda, mu ngisonekena mikanda ni jinjimbu. Ene exile mu ngizwela jinga kwila a ngizolo kyavulu.” Mwene wambe dingi: “ Eme ngejidile kya kwila o jiphange angizolo, maji tunde ku muvu wa 2020 ngamono kwila kiki kidi mwene.”

14. Kyebhi ki utena kukatula mbote mu kikwatekesu kya jiphange? (Tala we ofoto.)

¹⁴ Ihi i utena kubhanga? Kyoso kiwamudibhana ni ibhidi zukama ku jiphange. Bhinga kikwatekesu ku tufunga. Ene anda kala “kala diswamenu kiza o kitembu, dilengelu kiza o kalêmba.” (Iza. 32:2) Lembalala kwila o jiphange amudibhana we ni ibhidi. Kyoso ki ubhanga mbote ku akwenu, yanda kukwatekesa kusanguluka ni kukolokota.—Ika. 20:35.

O KIDYELELU KYETU

15. Kyebhi o kidyelelu kyakwatekesa Jezú kukolokota fiyele ni kyebhi o kidyelelu kitukwatekesa we kukolokota fiyele? (Jihebelewu 12:2)

¹⁵ Jihova watubhana kidyelelu kitukwatekesa kukolokota. (Lom. 15:13) Lembalala kwila Jezú watenene kukolokota mu ibhidi yoso mu kizuwa kye kyasukina mu ixi mukonda dya kidyelelu kyexile nakyu. (Tanga Jihebelewu 12:2.) Jezú wejidile kwila se wakolokotele fiyele kwa Jihova wexi bhana kijingu kwa Jihova. Jezú wexile muxinganeka o kithangana kyeji kala dingi ni Tat’ê ni kithangana kyeji tumina ni jikidistá ja a undu, o 144.000. Kyene we kimoxi, o kidyelelu kyetu kya kutunga ku mundu wa ubhe kitukwatekesa kukolokota mu ibhidi itudibhana nayu ku mundu yu wa Satanaji.

16. Kyebhi o kidyelelu kyakwatekesa mana Ana kukolokota ni ihi i utena kudilonga ku izwelu yê?

¹⁶ Tala kyebhi o kidyelelu kyakwatekesa phange Ana watungu mu ixi ya Rússia. O axiku dya ngoji akwata mwadi wé, amukutu ya amute mu kaleya, kyoso kyayi ni kukingila o kithangana kya kumufundisa. Kyoso kyabhiti o kima kiki mana Ana wambe: “Ngexile muxinganeka kyavulu mu Palayizu, ngexile musamba we yalungu ni maka enya, kiki kyexile mungikwatekesa phala ki ngiluwale kyavulu, kyexile mungikwatekesa we kumona kwila o ibhidi yanda bhita ni kwila o ima yanda kala kyambote. Jihova wanda tolola o jinguma jê ni kutubhana o kikowe kyê.”

17. Kyebhi ki tutena kulondekesa kwila tubhana valolo mu kidyelelu kyetu? (Tala we ofoto.)

¹⁷ Ihi i utena kubhanga? Xinganeka jinga mu Palayizu yanda tubhana Jihova kuhadya. Xinganeka kutunga ni makamba mê, o jindandu jê joso jasanguluka. O hadi itwamutala lelu, kuhadya mu Palayizu twanda mona kwila ki ya ‘nangenena, ya bhebhulukile.’ (2 Ko. 4:17) Zwela we ni akwenu yalungu ni Palayizu. Xinganeka kyebhi ene kyamudibhana ni ibhidi ya bhonzo ku mundu yu wa Satanaji. Ne mwene se uzwela nawu bhofele yalungu ni utuminu wa Nzambi, ene anda sanguluka ni kwila anda mesena kwijiya dingi yalungu ni utuminu wa Nzambi.

18. Mukonda kyahi tutena kudyelela mu ikanenu ya Jihova?

¹⁸ Kyoso Jobe kyabhiti mu ibhidi yavulu, anga wakolokota fiyele kwa Jihova, mwene wambe: “Nga k’ijiya mwene kyambote kwila, eye yoso wa soko na-yu; ki bhwala kima ki u xinganeka kubhanga anga a ku lembwesa na-kyu.” (Jobe 42:2) Jobe wamono kwila seku kima kifidisa Jihova kukumbidila o kikanenu kyê. O kwijiya o kidi kiki kitena kutukwatekesa kukolokota. Xinganeka ku muhatu wala ni uhaxi wabhonzo, maji seku dotolo watenene kumusaka, anga kumoneka dotolo amuxila kyavulu ni kwila umukanena kumusaka. Mwene wamba se uhaxi webhi wala nawu umujimbulula se kyebhi kyanda tena kusaka o uhaxi we, mwene usanguluka kyavulu sumbala wejiya kwila kwanda bhita izuwa yavulu phala kumusaka. Mwene utululuka mukonda mwene wejiya kwila kwakambe ngo wanda disanza. Kyene we kimoxi netu, o kidyelelu kyetu kyalungu ni Palayizu kitukwatekesa kukolokota.

19. Ihi itwatokala kubhanga phala kukolokota?

¹⁹ Kala kitwamono, Jihova utukwatekesa bhu kaxi ka maka mê, bhukaxi ka musambu, bhukaxi ka jiphange ni bhukaxi ka kidyelelu kyetu. Se tukatula mbote mu ima yoso itubhana Jihova, mwene wanda tukwatekesa kudibhana ni kibhidi kyoso-kyoso. Se tubhanga kiki, twanda kukolokota kate kyanda bwika o mundu wa Satanaji.—Fil. 4:13.