O Kwila o Ifuxi Itena Kudibunda Phala Kufidisa Mavuwa Onene mba Kalolo Kavulu?—Ihi Izwela o Bibidya?

Kya Lumingu mu kizuwa kya 20 ya mbeji ya Kamoxi, ka muvu wa 2022, o kyônge kya COP27 Conferência das Nações Unidas Sobre as Mudanças Climáticas kyabhu. Sumbala axikina kukwatekesa ni kitadi o jixi mwene mubhita mavuwa avulu, phala natene kudibhana ni maka enyá, maji avulu abanza kwila kiki ki kyanda batula o maka.

• António Guterres o seketa ya kisangela kya Nações Unidas, mu kizuwa kya 19 ya mbeji ya Kamoxi ka 2022, wambe: “Nga sanguluka mu kwijiya kwila twa popeka kitadi phala kukwatekesa yó abhita mu mavuwa,” wambe we: “Maji twejiya ni kidi kyoso kwila kiki ki kisoko, kwabhingi dingi kubhanga ima yengi . . . O ngongo yetu yala mu kilwezu, se ki tuikwatekesa, yanda zanganya.”

• Mary Robinson, mwenexi wokulu wa ixi ya Irlanda, ni Komisályu yokulu ya Nações Unidas, mu kizuwa kya 20 ya Kamoxi ka 2022, wambe: “O ngongo yamusuluka mukukamba ngo bhofele phala kubhitamu divuwa dya dikota.”

O minzangala ene dingi a thandanganya ni ima yandabhita ni ixi yetu ku hádya. Maji o kwila o ifuxi atena kukalakala kumoxi ni kubatula o maka alungu ni mavuwa mu ngongo mba kalolo kavulu? Ihi izwela o Bibidya?

O kwila o ifuxi anda dibunda ni kuditunda kyambote?

O Bibidya itwambela kwila né mwene se o jinguvulu a sota ndunge ya kusosolola o maka alungu ni mavuwa mba o kalolo kavulu, ene kanda ditunda kyambote, kanda tena kubatula o maka oso. Tala ima iyadi ilondekesa se mukonda dyahi:

• “O kya bhengalala, kya bhengalala kya mwene, kene ku ki yukisa dingi.”—Ndongixi 1:15.

  Kilombolwelu: O jinguvulu katena kubhanga o ima yoso yamesena, mukonda o athu ka abhange phala kuditumina mudyâ. (Jelemiya 10:23) Né se o ifuxi adibunda, né kiki kanda tena kubatula o maka a ngongo yoso, sumbala ni nguzu yoso yabhanga.

• “Mukonda o athu anda dizola ngó ene mudyâ, anda zola o kitadi, . . . kanda kumbidila o ima yabakana.”—2 Timote 3:2, 3.

  Kilombolwelu: O Bibidya yakanena kwila mu izuwa yetu o athu ejikala akwa ukumbu ni kwila kejixikina kukalakala ni akwâ, phala o mbote ya mundu wavulu.

Kima kitubhangesa kudyelela

O kubhuluka kwa ixi yetu, ki kwala bhumaku a jinguvulu mba mu ikanenu yâ. Nzambi watubhana Nguvulu wala ni kutena kwa kutumina o Ngongo, Jezú Kidistu. Yalungu ni mwene o Bibidya yamba:

• “O kutumina a mu twika-ku bhu isuxi yê. O dijina dyê a kà mu luka: Kidiwanu, Ndongixi, Nzambi ya Nguzu, Tata Inangenena, Kilamba kya Paze.”—Izaya 9:6.

Jezú mwéne o Sobha ya Utuminu wa Nzambi, mba unguvulu wadyulu. (Matesu 6:10) Mwene wala ni kutena, unjimu ni hanji ya kulanga o ixi yetu ni athu atungumu. (Sálamu 72:12, 16) Kyoso mwene kyanda tumina, o utuminu yú wadyulu, wanda bwika yó “ene mu bwikisa o ixi,” wanda bhangesa we o ixi kukala dingi kididi kyayuka.—Dijingunwinu 11:18; Izaya 35:1, 7.

Phala kwijiya dingi ihi yanda zubha o kudibandekesa kwa kalolo kavulu ni mavuwa, tanga o milongi ni dyambu: “Mudanças climáticas e o futuro da humanidade — O que a Bíblia diz?.”