Nvula Yadikota—Ihi Izwela o Bibidya?

Ku mundu woso o athu ene mu dibhana ni nvula yadikota. Tala o jilelatodyu jiji:

• Tuizuwa kudima, o mbonge ya ixi ya China ya dibhana ni nvula yabeta dingi kota mu kukala ni nguzu, o yabhiti mu 140 a mivu kudima ndenge, o nvula yiyi yabobesa o mbonge kate mu kitala kya 29,3 a jimetulu ja menya, yamateka kya Sabhalu iyasuluka kate kya Kwalata.”— AP News, August 2, 2023.

• O kithembu a kixana Tufão Khanun, kya bhekela nvula ni kithembu kya dikota ku mbandu kufwila o dikumbi ku ixi ya Japão, mu kizuwa kya kayadi kya Telesa, kyene kya jibha athu ayadi. . . . O kithembu kiki kya dikota kyanda bhangesa o nvula kunoka kate kyanda bobesa o mbanza yabeta kota mu kukala ni milundu ku Taiwan.”—Deutsche Welle, 3 kya Kakwinyi ka 2023.

• O nvula ya bhiti ku disukilu dya semana ku Nova Escocia, ya beta kota mu kubobesa o ixi, o nvula yoso yazange o mbandu ya kalunga ku ixi ya Canada, mu 50 a mivu kudima ndenge.”—BBC News, 24 ya mbeji ya Kavwa ka 2023.

Ihi izwela o Bibidya yalungu ni maka enya?

Kijimbwete kimoxi kya “izuwa isukidilaku”

O Bibidya yamba kwila twala mu “izuwa isukidilaku.” (2 Timote 3:1) Jezú wakanena kwila mu izuwa yetu tweji mona ijimbwete yamakota kudyulu mba “ima ikwatesa woma.” (Luka 21:11) O nvula mba kalolo kavulu mu ithangana yavulu yene mu bhangesa o kuma kulunguluka ni nguzu mu kithangana ki twakifikile.

Sayi kima kitubhangesa kukala ni kidyelelu

O Bibidya yamba kwila o ima yayibha yene mubhita mu ixi lelu, itubhangesa kukala ni kidyelelu. Mukonda dyahi? Jezú wambe: “Kyoso ki mu mona o ima yiyi kubhita, ijiyenu-kyu kwila, o Utuminu wa Nzambi wa zukama.”—Luka 21:31; Matesu 24:3.

O ima i twamumona lelu, ilondekesa kwila kwakambe ngo, o Utuminu wa Nzambi wanda bhangesa kwila o mabhuku a menya madixibha, wanda langa we o ima kala: o menya, mukengeji, kithembu ni ima yakamukwa dingi.—Jobe 36:27, 28; Jisálamu 107:29.

Phala kwijiya dingi kyebhi o Utuminu wa Nzambi wanda bhangesa o ixi kuyaka, tala o milongi “Quem salvará a Terra?”