O Muvu wa 2023 Wabhangesa Athu Avulu Kukala ni Hele—Ihi Izwela o Bibidya?

Ku muvu wa 2023, o ima yabhiti ku mundu woso yatudyelelesa ni kidi kyoso kwila twala mwene mu izuwa a ixana mu Bibidya kwila “izuwa isukidilaku.” (2Timote 3:1) Tala kyebhi o ima yene mubhita lelu yene o ima yatangele kya o Bibidya kwila yeji bhita mu izuwa yetu.

Ima yatangele kya o Bibidya, itwamumona kubhita ku mundu woso

“Ita ni jingolokela ja ita.”—Matesu 24:6.

• “O usweya wa mudibandekesa kyavulu mu ididi yavulu ku mundu.”a

“Kutunguta kwa ixi mu ididi yavulu.”—Máluku 13:8.

• “Tunde ku dimatekenu dya muvu wa 2023, kwabhiti kya 13 a itungutu ya makota a ixi ku mundu woso (itungutu ya magnitude 7), o itungutu yiyi yala mu axaxi ka itungutu ya makota tunde kyamateka kukondala o itungutu yene mubhita mu ngongo.”b

“Ima ikwatesa wôma.”—Luka 21:11.

• “O kithangana kya kutema ku mundu woso kyabhu; maji o kithangana kya kufuluka ku mundu kyabhixila.”—António Guterres, Secretário-geral da ONU.c

“Nzala.”—Matesu 24:7.

• “O muvu wa 2023: muvu wabhonzo phala yo abhanga yoso ni yoso phala kudikila o miji yâ.”d

“Ithangana yanda bhonza kudibhana nayu.”—2 Timote 3:1.

• “Ku dinake dya athu ku mundu mu ididi yoso umoxiku wamudibhana ni uhaxi mba kilunji kya mubhengalala.”e

Ihi itutena kukingila kubhita ku muvu wa 2024?

Seku muthu utena kuzwela ni kidi kyoso o ima yanda bhita ku muvu wa 2024. Maji o ima yene mubhita ku mundu lelu ilondekesa kwila kwakambe ngo bhofele phala o Utuminu wa Nzambi, mba o utuminu wa dyulu kubhinganesa o mautuminu a ngongo ni kuzubha o hadi ni hele yoso yene mudibhana nayu o athu lelu.—Daniyele 2:44; Dijingunwinu 21:4.

Maji kyoso kituya ni kukingila o kithangana kiki, se tu kala ni hele tutena kubhinga kikwatekesu kwa Nzambi. O Bibidya yamba:

“Mu kithangana kyosokyoso phe ki ngiza o woma, ngi dyelela kulengela kokwé, u Sukeku.”—Jisálamu 56:3.

Kyebhi kitutena kulondekesa kwila tudyelela kwa Nzambi? Twa kwixana phala kwijiya dingi yalungu ni ikanenu ya Bibidya yalungu ni kithangana kyanda bhwa o hadi yoso ku hadya. Dilonge o Bibidya n’etu se kufuta kitadi phala kumona kyebhi eye ni mwiji wé mutena kukatula mbote ku ikanenu itusanga mu Bibidya.