Bhanga Makamba Phala Kudivwe Ubheka—⁠Kyebhi o Bibidya Itena Kukukwatekesa

O uhaxi wa kudivwa ubheka kima kimoxi kyalalamesa kyavulu mu muvo wa 2023. Ihi itwatokala o kubhanga phala kuzubha o uhaxi yu?

• O Dotolo Vivek Murthy, mukwa kubhanga pelasa mu ixi ya Estados Unidos, wambe kiki: “Kyoso kitudivwa ubheka mba tu disandula mukaxi ka akwetu, tutena kuluwala.” Mwene wambe dingi: “Maji kwala kima kitutena o kubhanga phala kudivwa kyambote.” Kima kyahi? “Tutena kubhanga ima yofele mu kizuwa ni kizuwa phala kukolesa o ukamba wetu ni akwetu.”a

O kudivwa ubheka ki kwijila ngo kyoso kitukala ubheka wetu. Sayi athu adivwa ubheka nemwene mukaxi ka athu avulu. Nemwene se ki twejiya o kima kitubhangesa kudivwa ubheka, o Bibidya itena kutukwatekesa. Tusangamu itendelesu itukwatekesa yalungu ni kyebhi kitutena kukolesa o ukamba wetu ni akwetu, kiki kitena kutukwatekesa phala kitudivwe ubheka.

Itumu ya Bibidya itena kutukwatekesa

Kala ni ukexilu wambote wakudizwelesa. Kubhanga kiki ki kulombolola ngo kuzwela se kyebhi ki wamudivwa maji kulombolola we kwivwa kyambote akwenu kyoso kyamuzwela. Kyoso ki uya ni kulondekesa kwila wamuswa akwenu, o ukamba we ni ene wanda kola dingi.

• Ihi izwela o Bibidya: “Kanenu kusota ngó o mbote yenu, maji musota we o mbote ya akwenu.”—Filipe 2:4.

Kala pholondo phala kubhanga makamba a ubhe. Kala pholondo phala kubhanga ukamba ni athu a itala yoso, athu a idifwa ni ixi yengi.

• Ihi izwela o Bibidya: “Jikulenu o mixima yenu.”—2 Kolindu 6:13.

Phala kwijiya dingi se kyebhi ki utena kukolesa o ukamba we ni akwenu, twakudyondo tanga o milongi ni dyambu “Satisfazer a sede de amizades.”