Kukwatekesa yó Abhita Mumavuwa Mukithangana Kya “Ita ni Jingolokela ja Ita”

Etu twala mwizwa isukindilaku. Mukiki, kitudiwana kyoso kitwivwa “ita ni jingolokela ja ita.” (Matesu 24:6) Maji kyoso o jiphange jetu kyatala hadi mukonda dya ita ene atambula o kikwatekesu kyabhindamena. Kyexile kiswinisu kyadikota kyoso kitwamono o Jihundu jaubhe ja Kibuka kya Utuminu #3 ya 2022. Mu kwijiya yalungu ni kikalakalu kya kukwatekesa o jiphange abhita kumavuwa yamubhita ku Europa Oriental phala kukwatekesa o yó adibhana ni ita mu Ucrânia. Kyebhi o jiphange jetu amudikwatekesa mudyâ né mwene ni ita bhu kaxi? Ihi yene mubhita mukonda dya kikalakalu kiki kya kukwatekesa o jiphange jetu ku Ucrânia?

Ima Yahi Yabhindamena o Jiphange? Kyebhi Kitutena ku Itumikisa?

Kyoso kyamateka o ita mu ixi ya Ucrânia, mu kizuwa kya 24 ya Kawana ka 2022, Kibuka Kya Tufunga Twala ku Pholo adizwelesa ya axindi o kitadi kyeji katula phala kukwatekesa o jiphange ku Ucrânia. O Betele ya Ucrânia sé kulaleka amateka kusumba o ima ya a iwanena ku 27 a Ibuka asokejekele phala Kukwatekesa o Jiphange Abhiti mu mavuwa.

Phala kutenesa o kikwatekesu kya bhana ku Betele ya Ucrânia, o jiphange atokala ku Mbongi ya Jimbangi ya Jihova ni lusolo lwoso amateka kuxinganeka kyebhi kyeji kwatekesa o jiphange jiji mu ukexilu watokala. O Kibuka Kya Tufunga Twala ku Pholo ni Kibuka kya Edika kya Kibuka kya Utuminu abhingi ku Kibuka Kisumba o Ima Kumundu Woso phala akalakale kumoxi ni jiphange ala ku pholo ya Betele ya Ucrânia ni Polônia phala kukwatekesa mu ibhindamu ya jiphange ni kukala pholondo se kumoneka dingi kibhindamu kyengi. O jiphange ja kibuka kya Kusumba, kya Espedisa, ni kibuka kya Jurídico ya Jibetele jiyadi. Phange imoxi watokala mu kibuka kya filiyale ya Ucrânia ni jiphange atokala mu Kibuka kya Kusumba o ima Kumundu Woso exile mu dyôngeka izuwa yoso phala kusokejeka o ima phala kukwatekesa o jiphange.

Phange Jayi Swinney, watokala Kukibuka kya Kusumba Kumundu Woso wambe: “Kya dyanga twabhingi kwijiya ihi yejibhindamena o jiphange. Twamesenene kusokejeka kudya ni imbamba yakuzelesa o inzo yejidile kya o jiphange kukalakala naju. Maji o kwijiya ihi yejibhindamena o jiphange yexile mbandu imoxi ngó hanji yamaka. Twatokalele kwijiya kyebhi kitwejitumikisa o ima mu Ucrãnia ni lusolo, se kudita mu kilwezu mukonda dya ita.”

Mu kizwa kya 9 ya mbeji ya Katanu ka 2022, o jiphange ejidile o ima yatokalele kusumba. Eji sumba jikaxa ja kudya, kala xitu, ni mbiji ya jilata, cereais, loso ni feja, katuku o imbamba yengi kala, sabonete ni papel higiênico. Mu kithangana kyokyo, o ima yoso itwasumbu phala o jisemana jiwana jate kala muthu 65 ajidolali (27.492,4 ajikwanza ndenge). Kuma nange mazunda a jiphange ejibhindamena o ima, o Kibuka Kya Tufunga Twala ku Pholo adizwelesa ya axindi kukatula kitadi kyasoko phala kusumba o ima yiyi. Kyebhi kitwejibhixidisa o ima sé kuta o jiphange jetu mukilwezu?

Mu kizuwa kya 13 ya Katanu, jiphange jiyadi afikisa kwambata o ima ku armazém yazukamene ku mbanza ya Lviv ku Ucrânia. Tu izuwa ande dya ene kutunda, o jiphange ya Betele ya Polônia ni ya Ucrânia akwatekesa o jiphange jiyadi jiji kudisokejeka phala kwenda njila. O Betele yasokejeka madukumendu ya makalu mâ ni madukumendu alondekesa kwila exile bhobho phala kukwatekesa o athu abhita mu mavuwa ni kwabhangesa kubokona mu ixi ya Ucrânia. Ni kisokejeku kyambote ni mabesá a Jihova ima yoso yabhixila ku jiphange kya Kibuka Kikwatekesa o Jiphange Abhita mu Mavuwa mu mbanza ya Lviv mu kizuwa kimoxi, o jiphange jetu avutuka kyambote ku Polônia.

Mu ndunge yiyi yadyanga twaditundu kyambote, maji jiphange jiji atena ngó kubhixidisa tutonelada twa ima. O mbambe yexile ya kutumikisa 200 ya jitonelada ndenge! Majiphe kyebhi kitwejitena kututa ni kuwanena o ima yoso yiyi ni luso lwoso?

“Makwenze mé Makàdibheka Mwene mu Vondadi yâ”

Kyoso kyatange o jihundu mu jw.org yalungu ni jiphange jexile mutala hadi mukonda dya ita mu Ucrânia, athu oso kumundu amesenene kukwatekesa. Kuma avulu exile dingi dikanga, asangela kitadi phala o kikalakalu kumundu woso ya Jimbangi ya Jihova, mu kwijiya kwila ejikalakala kyambote ni kitadi kiki. O yó azukamene ku ixi ya Ucrânia, atena kukwatekesa ni kithangana kyá, ni nguzu yá ni imbamba yexile nayu. Tutale ifika ya jiphange jadibhakula.

Ku Polônia, o athu adibhakula abhana jimidi ni jimidi ja ima phala kukwatekesa o jiphange jibhita mu ibhindamu, o twana tundenge abhange tukalata. O phange Bartosz Kościelniak watokala mu Kibuka Kya Kusumba o ima Kubetele ya Polônia wambe: “‘Eme ngatange kya o divulu dya Jisálamu 110:3 mu veji javulu. Koko kwamba kuma o mundu wa Jihova wejidibhakula mu vondadi yâ.’ Maji ngatena kumona ni mesu mami o kikwatekesu kyoso kyabhana o jiphange. Ngamono athu exile pholondo phala kudibhakula ni kwiza mukukalakala. Kiki kyangilondekesa o kilombolwelu kya kidi dya divulu dya Jisálamu.”

Phange wexile ni ditenda mu ixi yengi, wasobhesa o jikaminyonji, yu wabhana dingi kombustivel yabhindamene. O phange mwenyu wambe: “Mudyami kiki kyexile kithangana kyakulondekesa o henda yami ku jiphange ni kwa Jihova. Ngasangulukile kyavulu mu kubhana o kikwatekesu kiki.” Mu kubhanga jikonda wabhana 7.700 ajilitulu ndenge ajikumbustivel, ni kwila o jiphange endesa 48 a jimidi ajikilometu, angastala o kithangana kya ni nguzu ya phala kubhixidisa o ima!

O jiphange jetu jiji akalakala ni henda ni nguzu yoso. Mukonda dya kiki mu kubhita 15 kya izuwa tunde kitwafikisele kutumikisa o ima, mu kizuwa kya 28 ya mbeji ya Katanu, twatena kutumikisa hama ajitonelada, ya imbamba ya inzo ni milongo! Tusakidila o ukexilu wakubhana wa athu oso adibhakula, mukonda kyabhana phala kusosolola o jingastu mu kusokejeka o ima yoso phala kukwatekesa yó abhita mu mavuwa. Kate o kithangana kiki o Jimbangi ja Jihova atumikisa kya 190 ajitonelada phala o ixi ya Ucrânia. Kyebhi o ima yiyi yakwatekesa o jiphange jetu?

“Ni Ene we Amizolele!”

Kyoso o imbamba yoso ki yabhixila mu mbanza ya Lviv o Ibuka ya Jiphange Akwatekesa yó Abhita mu Amavuwa mu ixi ya Ucrânia awanena o ima kwa yó abhindamenene. O imbamba a itumikisa mu jimbanza javulu, sayi jimbanza jexile dikanga dya 1.300 ya jikilometu ya mbanza ya Lviv. Asoto kubhanga o kikalakalu mu ukexilu watokala, maji né kiki kyabhange kithangana kyavulu.a

Phange Markus Reinhardt watokala mu Kibuka kya Filiyale ya Ucrânia, wambe: “Mu kithangana kiki kyabhonzo jiphange javulu ene mumona ni mesu mâ kwila Jihova watuzolo ni kwila kima kyambote kukayela o itendelesy yê bhukaxi ka kilunga, ande mwene dya kubhita o mavuwa. Mu kifika etwenyoso ene mutuswinisa kukala ni mbwenga kubhata ya kulengela nayu, mukala tumenya ni kudya kwasoko phala tusemana. Sayi kafunga amwixana Anton, wamusidivila mu Kiev, wambe kiki yalungu itendelesu: O kilunga kya Jihova kyene mutuphelephala phala kudibhana ni ithangana ya bhonzo etu tusakidila kyavulu ni ima yiyi. Kukala ni ima kala kudya ni menya ni mutelembe yaminangu yabhulula o mwenyu wetu.’ Kyexile kima kyambote kumona kwila o jiphange jetu abhana matwi mu itendelesu yiyi, mukonda mu ukexilu yu o Betele yexile ni kithangana kya kusokejeka o kikwatekesa kya yó abhita mu mavuwa.”

Kyebhi o jiphange kyadivu kyoso kyabhixila o kikwatekesu? Phange Mykoa ni Zinaida atungu mu Kharkiv, ajimbulula se kyebhi kyexile mudivwa: “O henda ya jiphange yatutula kumuxima. Twasakidila kyavulu mwene mukonda dyakutubhana kudya ni milongo! Etu twamono ni kidi kyoso o maku a Jihova mu ima yoso yiyi.” Phange Valentyna, watungu kumbandu yenyoyo, wambe: “Tunde kyamateka o ita o munonono phala kusumba o kudya kwene mudibandekesa. Sayi ithangana kitwene mutena kusumba o ima itwamesena. Maji Jihova wamono yoso itwexile mubhita. Mwene wasolo jiphange phala kuwanena o kudya mu jinzo jetu. Mu jikaxa mwexile o ima itwabhindamene! Mu kithanana kiki kyabhonzo kyoso kitukamba kumona o ditundilu, kyene kitutena kumona o kilangidilu kyakatunda kya Jihova ni kya kilunga kyê. . . . Kima kyambote kumona Jihova kutubhana o kikwatekesu kitwabhindamena mu kithangana kyatokala.”

Yevhen, Iryna ni Mykyta, alenge ku Mariupol, ambe: “Twasakidila kyavulu mu kilangidilu ni kikwatekesu kimwabhana ku mwiji wetu. Mutena kuxikina kwila kyabhixila mu kithangana kyatokala. Kyoso kitwamono o jikaxa twaxinganeka kwila mwexile imbamba ya kukomba, maji kyoso kitwajijikula, twamono kwila mwexilemu we o henda yenu!”

Mu kidi eye utena kumona kyebhi Jihova kyene mukwendesa o mundu wê bhukaxi ka nzumbi yê ikôla phala kubhana o kikwatekesu kya henda kitwabhindamena mu kaxi ka “ita ni jingolokela ja ita.” O kitadi kiwene musangela phala o kikalakalau kumundu woso ni kitadi kyene musangela bhukaxi ka sayite donate.jw.org, kyakwatekesa we kyavulu phala etu kulanga kyambote o jiphange jetu. Etu tusakidila kyavulu mu ukexilu wenu wakubhana ni muxima woso!

Kukwatekesa yó Abhita mu Mavuwa ni Luso Lwoso ni Kudilanga Kwoso

1. 

   Mu kizuwa kya 24 ya Kawana ka 2022: O Kibuka Kya Tufunga Twala ku Pholo, axikina kukatula kitadi phala kukwatekesa o jiphange mu Ucrânia. Kiki kyabhangesa o Betele kumateka kubhana o kikwatekesu kwa yó abhita mu mavuwa

2. 

   Mu kizuwa kya 24 ya Kawana–8 ya Katanu ka 2022: O Betele ya Ucrânia asumba ima kwenyoko anga amateka ku iwanena bhukaxi ka Ibuka Ikwatekesa yó abhita mu mavuwa. O filiyale idisokejeka phala kutambula ni kuwanena o ima yatundu ku Polônia

3. 

   Mu kizuwa kya 9 ya Katanu ka 2022: O Kibuka Kya Tufunga Twala ku Pholo kixikina kutumikisa imbamba ku athu abhita mu mavuwa mu ixi ya Ucrânia

4. 

   Mu kizuwa kya 10–12 ya Katanu ka 2022: Afikisa ndunge phala kumona se kyejibhana kutumikisa ima tundé ku Polônia phala o mbanza ya Lviv mu Ucrãnia

5. 

   Mu kizuwa kya 13 ya Katanu ka 2022: Afikisa kutumikisa o imbamba tundé ku Polônia katé mu mbanza ya Lviv mu Ucrânia

6. 

   Mu kizuwa kya 14–16 ya Katanu ka 2022: Sayi Kididi kya Yônge Yamakota, kyazukama Ponznank ku Polônia, athu adibhakula Kibuka kya Local de Projecto/Construção, abhongolola phala kusokejeka o imbamba ya kukwatekesa nayu o athu, kala kudya ni ima yengi

7. 

   Mu kizuwa kya 17 ya Katanu ka 2022: Kuma o ndunge ya ndyanga yanditundu kyambote, mu kubhita izuwa iwana, amateka kututa 13 ajitonelanda ya imbamba katé mumbambe ya Ucrânia

8. 

   Mu kizuwa kya 21–27 ya Katanu ka 2022: Mu kukayela o jitunge jadyanga o jitonelanda jakambeleko ajilongela ku Polônia phala kujambata mu ixi ya Ucrânia. Kwenyoko kwene kwa jiwanena mu ididi yabhindamena, mu 24 ajiola

9. 

   Mu kizuwa kya 28 ya Katanu ka 2022: Mukubhita 20 ya izuwa kyoso kyatuxikina, hama ya jitonelada jakudya, milongo ni ima yakamukwa ajitumikisa ku Ucrânia

Katé bhabha, o Jimbangi ja Jihova atumikisa kyá 190 ajitonelada ndenge ya imbamba phala kukwatekesa yó abhita mu mavuwa.