Kulanga o Ididi ya Ubhezelu Mukithangana Kya Uhaxi wa COVID-19

“O Kibuka Kya Utuminu, kyambele kwila twamuswinisa oso phala kuvutuka kudyôngeka kumoxi mu kididi kya ubhezelu, tundé mu kizuwa 1 ya mbeji ya Kasamanu, katuku ngó se o kitumu kya ixi kifidisa kudibunda.” O ngolokela yiyi a ibhange mu sayite jw.org kudimatekenu dya mbeji ya Katanu ka 2022, kiki kyabhangesa o Jimbangi ja Jihova ku mundu woso kusanguluka kyavulu. Maji o uhaxi wa COVID-19 kiyabwile hanji.a Kyenyikiphe ihi itwabhange phala kukwatekesa ni kulanga yó ejiya mutala o kyônge, ku uhaxi wa COVID-19? Mukubhita mivu iyadi sé kudyôngeka kumoxi, o kwila o Ididi ya Ubhezelu yala hanji kyambote?

Mu kidi o jiphange jetu jexile kya polondo mu jimbeji javulu kudima phala kuvutuka kudyôngeka dingi mu Kididi Kya Ubhezelu.

O Ibhindamu ni Ukexilu Wakubatula o Maka Kiwadifwile

Mukubhita mbeji imoxi kyoso kitweha kudyôngeka mu kididi kya ubhezelu ku muvu wa 2020, o Departamento de Dezenho/Construção da Sede Mundial (WDC), ku Warwick, Nova York, amateka kuxinganeka kyebhi kyejikala o Kididi kyetu Kya Ubhezelu mukonda dya COVID-19 ni ihi itwatokalele kubhanga phala kulanga kyambote o kididi kyetu kya kudyôngeka?

O ima yabhindamene mu ixi imoxi muveji javulu kiyadifwile ni ibhindamu ya jixi jengi. Phange Matthew De Sanctis, wamukalakala ku WDC, wambe: “Sayi jixi, o kibhidi o kusanga kididi phala kusukula o maku. Kyoso mu Kididi kya Ubhezelu mukamba kutunda menya, twene mututa mba kutakana mu ngiji mba mu ixina ya menya. Mu jixi jengi, sayi jinguvulu abhinganesa o ibhindamu yâ, yamunza watalala wa ar-kondisionado ni munza wabhange Nzambi, ni kuta ijimbwete yalungu ni kulanga o sawidi ni kudizelesa.”

Ihi yabhange o jiphange jetu phala kudibhana ni ibhidi yiyi? Ene amono kwila phala Ididi yavulu ya Ubhezelu: “O ukexilu wê kiwatele kitadi kyavulu phala kulanga o ibhindamu ya Kididi kya Ubhezelu,” kyene kyambe phange Matthew. Mukifika, mu ixi ya Papua Nova Guiné, asange ndunge yakuta menya mu balde ya 20 ajilitulu ni kutamu jitorneira phala kukwatekesa kusukula o maku. O jiphange jetu atulondekesa se ima yebhi itwabhindamene phala kusukula o maku mu Ididi ya Ubhezelu yexile mu jisanzala, mu kuta ngó 40 ajidolale (17.134 ajikwanza). 6.000 ya imbamba yakatunda ya kusukula o maku mu Ididi ya Ubhezelu mu África, a isumbu kumusumbixi ya Asia.

Kima kyamukwa kyabhange o jiphange, o kubhinganesa o ji ar-kondisionado ni jivintowinya, phala mu Kididi kya Ubhezelu mubhuse munza watalala. Ilunga yavulu asumbu jifelu jalebha phala kutamu o ilaka, phala kijibhite mu maku ni maku a jiphange. Abhange nguzu yakusosolola o ilwezu ya kusambukisa o uhaxi, mukuta ijimbwete mu ididi mutena kukwata o athu, kala ku mabhitu ni jitorneira. Sayi Ilunga, mu maxidixilu mâ, ate jitornera jakusukula o maku, o menya atunda ubheka wê, kabasa uzukamesa ngó o maku mé. Mu ixi ya Chile, o ibhindamu yakulungulula o ima yate 1,400 ajidolale (593.202 ajikwanza.) phala Kididi kimoxi kya Ubhezelu.

Kyoso kyexile mubhanga yoso phala kulanga o Ididi ya Ubhezelu, o jiphange jetu exile mubhaka kitadi phala kusangela. Mukifika, sayi jixi akatula mbote mu kikwatekesu kyabhana o jinguvulu yalungu ni kusukula o maku phala kudilanga ku uhaxi, ni jifelu jalebha jadilaka. O jifiliyale jakwatekesa we kuphopheka kitadi, mukusumba ndumba ya makudya, o yexile musumba m’ukulu ndunge. O Jifiliyale ni Departamento de Compra Mundial mu ithangana yavulu asumba mwene kya o ima mu jifábrika, o kubhanga kiki ki isosoloka ngo o jipelesu, maji we ni kithangana kya kutumikisa.

“Yangibhana o Kukondama Kungabhindamene”

O jindunge jiji jakulanga o Ididi ya Ubhezelu, jene mukwatekesa ni kubhangesa yó aya mu kididi kya ubhezelu kudivwa kyambote. Phange Dulcine, ya ixi ya Perú, wambe kwila mwene wakexile ni wôma kyoso kyevu kwila tutena kya kuvutuka kudyongeka mu Kididi kya Ubhezelu. Mwene wambe: “Ngakwatele o uhaxi wa COVID-19 kyoso kyamateka o dibhebhu didi.” “Kyenyiki kingadivwile kyambote ni njimbu yiyi yakuya mu Kididi kya Ubhezelu, mukonda ngejidile kwila ngejitena kukwata dingi o uhaxi yú. Maji kyoso kingabhixila mu Kididi kya Ubhezelu, ngamono kwila o tufunga abhangele ima yavulu phala kutulanga, kala ididi yakusukula o maku, jifelu jadilaka, ni kuzelesa o kididi kya ubhezelu kudimatekenu ni kudisukilu. Ima yoso yiyi yangibhana o kukondama kungabhindamene.”b

Phange Sara, mukwa ixi ya Zambia, wadibhana ni kibhidi kyengi. Mwene ujimbulula: “Jimbeji javulu kudima, mwadiwami wafu ni uhaxi wa COVID-19. Ngathandanganyele yalungu ni kyebhi ki ngeji divwa mu kuvutuka kutala o yônge mu Kididi kya Ubhezelu sé mwadiwami.” Kyebhi kyamudivwa kindala mu kuya mu Kididi kya Ubhezelu? Mwene ujimbulula: “O kutala o kyônge pholo ni pholo, kwene mungikwatekesa kumona kwila Jihova wala n’etu mu izuwa yiyi isukidilaku. Kindala ngidivwa kwila ngaximbakata, angizolo dingi, ngamumona dingi o kikwatekesu kingabhindamene bhukaxi ka tufunga ni jiphange jamukwa jamala ni ja ahatu, m’ukulu ndenge.”

O jiphange jetu ku mundu woso asakidila kyavulu mukuvutuka kutala dingi o yônge mu Ididi ya Ubhezelu. Twamisakidila mu kitadi kimwene musangela, avulu mudyenu mwene musangela bhukaxi ka donate.jw.org. O kitadi kiki kyene mutukwatekesa kulanga kyambote o Ididi ya Ubhezelu phala ikale ididi yakondama, yafwama kudyôngekamu.