Dya Kayadi Dya Malunda
1 O kutena kwa Solomá mon’a Davidi, kwexile mu dibandekesa. Jihova Nzambi yê, wexile mu mukwatekesa ni ku muzangeleka kyavulu.
2 Solomá wongeka o Izalayele yoso: O atwameni a jimidi, ni atwameni a jihama, o afundixi, o adyakime oso a Izalayele ni atwameni a miji. 3 Mukusuluka, Solomá ni mundu oso ayi bhu kididi kya kubhezela kyakexile ku Ngibiyone, mukonda o balaka ya Nzambi yakidi yakexile kwenyoko. Mozé o selevende ya Jihova wabhangele o balaka yiyi mu kikangalakata. 4 Davidi wambatele o Álaka ya Nzambi yakidi ku Kidyate-Jadimi mu kididi kyayudikile mwene. Davidi watungile balaka mu Jeluzaleme phala kutula-mu o Álaka. 5 O kalatódyu ka ngondo kayudikile Bezalele mon’a Udi, mon’a Hule, akatudile mu balaka ya Jihova. Solomá ni mundu woso exile mu samba bhenyobho.* 6 Solomá wabhakula bhenyobho jisata kwa Jihova. Wabhakula midi ya jisata jakwoha bhu kalatódyu ka ngondo kexile mu balaka ya kudyongekela.
7 Mu usuku wenyó, Nzambi watukulukila Solomá yu wa mwambela, wixi: “Bhinga o kima ki wamesena kwila ngi kubhana-kyu.” 8 Kyenyiki, Solomá wambela Nzambi, wixi: “Eye ngana, tat’etu Davidi wa mukwatela henda yadikota, eye wa ngisolo phala kukala sobha bhu kididi kyê. 9 Mukiki-phe, Jihova Nzambi, kumbidila o kikanenu ki wabhange kwa tat’etu Davidi, mukonda wa ngisolo phala kukala sobha ya mundu wavulu, wedi kala museke. 10 Ngibhane unjimu ni kwijiya phala ngitene kwendesa o mundu yú. Nanyi weji tena kufundisa o mundu wé wavulu kiki sé o kikwatekesu kyé?”
11 Nzambi wambela Solomá, wixi: “Kuma wabhingi o kima kiki, muveji dya kubhinga umvwama, mba jimbote, mba kijingu, mba o kufwa kwa jinguma jé, mba kunangenena ku mwenyu, maji wabhingi unjimu ni kwijiya phala kufundisa o mundu wami, u ngakubhana phala ku utumina, 12 nganda kubhana unjimu ni kwijiya, maji nganda kubhana we kijingu, jimbote ni umvwama ki nga ubhele luwa ku muthu wengi, ku pholo dya kwenda kikwanda kala we muthu wengi nganda mubhana o ima yiyi.”
13 Kyenyiki, Solomá watundu bhu kididi kya kubhezela kyexile ku Ngibiyone mu balaka ya kudyongekela, yu wayi mu Jeluzaleme. Mwene wexile mutumina akwa Izalayele. 14 O makalu a ita ni jikabalu* ja Solomá jexile mu dibandekesa dingi. Mwene wexile ni midi ni hama jiwana ja makalu a ita, wexile we ni dikwinyi ni kiyadi kya midi kya jikabalu. Jene jexile mu jimbanza ja kubhakela o makalu a ita, ni mu Jeluzaleme bhwa zukama o inzo ya sobha. 15 Sobha Solomá wabhangesa kwila mu Jeluzaleme o phalata ivula kala matadi. O mabaya a mixi ya sédulu avula kala mixi ya mifiku ya Sefelá. 16 O jikabalu ja sobha Solomá, exile mu jisumba ku Ijitu. O kibuka kya jingenji jexile mu kalakela o sobha exile musumba o jikabalu,* exile mufuta o jikabalu mu valolo yexile mu sumbisa o asumbixi. 17 Dikalu dimoxi dya ita, exile mu disumba ku Ijitu mu hama jisamanu ja mabele a phalata. Kabalu kamoxi, exile mu kasumba mu hama ni makwinyi atanu a mabele a phalata. Ene exile musumbisa o jikabalu jiji, ku jisobha joso ja akwa Hiti ni ja akwa Sídya.