Dya Kayadi Dya Malunda
7 Kyoso Solomá kyazubha kusamba, ku dyulu kwalawuka túbhya twoha o sata. O kubhenya kwa Jihova kwamwikina o inzo. 2 O akunji katenene kubokona mu inzo ya Jihova, mukonda o kubhenya kwa Jihova kwamwikina o inzo ya Jihova. 3 O mundu woso wa Izalayele wexile mutala o túbhya twa lawukile ni kubhenya kwa Jihova kwamwikina o inzo. Ene afukama ni pholo bhoxi, ya asakidila Jihova, “kuma o henda yê inangenena kate ku hádya ni hádya.”
4 Kyenyiki, o sobha ni mundu woso abhakula jisata phala Jihova. 5 Sobha Solomá wabhana makwinyi ayadi ni kiyadi kya midi ya jingombe ni hama ni makwinyi ayadi a midi a jimbudi, phala ku jisatela. Kyenyiki, o sobha ni mundu woso abhakula o inzo kwa Nzambi yakidi. 6 O akunji emanene mu ididi yâ. O Jilevita emanene we ni iselekete ya kuxika yexile muxika-nayu mu kwimbila Jihova. (Sobha Davidi wabhangele o iselekete yiyi phala kusakidila Jihova, kyoso mwene kyexile muximana Nzambi kumoxi ni ene,* “kuma o henda yê inangenena kate ku hádya ni hádya.)” O akunji emanene ku pholo ya Jilevita, akexile muxika o jikoloneta ni nguzu yoso. O mundu woso wa Izalayele wemanene we bhenyobho.
7 Mukusuluka, Solomá wazelesa o kididi kyakexile bhukaxi ka kithádi, ku pholo ya inzo ya Jihova, kuma mwene wabhakula bhenyobho o jisata ja kwoha, ni banya ya jisata ja paze. Mukonda o kalatódyu ka ngondo kabhangele Solomá, katolele phala kubhakula-ku o jisata ja kwoha ni jisata ja jimbutu ni banya. 8 Mu kithangana kyenyokyo, Solomá ni mundu woso wa Izalayele wabhange fesa ya sambwadi dya izuwa. Kwa dibhongolola kifuxi kyadikota, ene atundu tunde ku Lebo-Hamati* ndu ku honga ya Ijitu. 9 Mu kizuwa kya kanake* abhange kyônge kyonene, kyoso kyazubha kubhakula o kalatódyu mu sambwadi dya izuwa ni kubhanga o fesa mu sambwadi dya izuwa. 10 Mu kizuwa kya makwinyi ayadi ni kitatu kya mbeji ya kasambwadi, mwene wasulu o mundu. O mundu anga uya mu jinzo jâ ni muxima wasanguluka, mukonda dyambote yoso yabhange Jihova kwa Davidi, kwa Solomá ni ku mundu wê Izalayele.
11 Kyenyiki, Solomá wazubha kutunga o inzo ya Jihova ni inzo ya sobha. Mwene watena kutunga o inzo ya Jihova ni inzo yê, kala kyamesenene mwene. 12 Mukusuluka, Jihova watukulukila Solomá mu usuku, yu wambe: “Ngevu o musambu wé, éme ngasolo o kididi kiki kala inzo ya kubhakula-mu jisata. 13 Se ngijika o dyulu anga kukamba kunoka mvula, mba se ngituma kihoho kizanga o idima, se ngitumikisa dibhebhu ku mundu wami, 14 maji o mundu wambata o dijina dyami, uditulula, asamba, a ngisota anga eha o jinjila jâ jayibha, nganda kwa evwa tunde ku dyulu, nganda loloka o ituxi yâ, nganda bhangesa kwila o ixi yâ ibhana dingi idima. 15 Kyenyiki, o mesu ami anda tona, o mátwi mami anda kwivwa o misambu yanda bhanga mu kididi kiki. 16 Eme ngasolo o inzo yiyi, eme nga ikôlesa phala o dijina dyami adifumanese mwenyomo kate kuhádya ni hádya. O mesu ami ni muxima wami, wanda kala jinga mu kididi kiki.
17 “Se wenda jinga mu jinjila jami kala kyendele tat’é Davidi, mu kubhanga yoso i nga kutumu anga ubelesela o itumu yami ni jingonge jami, 18 eme-phe, nganda bhangesa o ungana wé kunangenena kala ki ngakanena kwa tat’é Davidi, ngixi: ‘Ku mbutu yé, kwanda kala jinga muthu wanda xikama ku kyandu kya ungana kya Izalayele.’ 19 Maji-phe, se mweha ku ngibheza ni kubelesela o itumu ni jingonge ji nga mibhana, anga muya mubheza jinzambi jengi ni ku jifukamena, 20 nganda bwikisa Izalayele mu ixi i nga abhana. Nganda dituna o inzo yiyi i ngaxikina phala kufumanesa o dijina dyami. O ifuxi yoso yanda xongwena ni kusebhulula Izalayele. 21 O inzo yiyi yanda xala kiphulungunzu kyahatu. Woso ubhita, mu ku imona wanda diwana, wanda xika mwixi,* ni kudibhwidisa: ‘Mukonda dyahi Jihova wabhange o kima kiki ku ixi yiyi, ni ku inzo yiyi?’ 22 Kyenyiki, anda tambwijila: ‘Kiki kyabhiti mukonda ene abhana dikunda kwa Jihova Nzambi yâ, wakatula o jikuku jâ ku ixi ya Ijitu, ya adikwatenena ku jinzambi jengi, mu ku jifukamena phala ku jibheza. Kiki kyene kya mubhangesa kwabhekela o divuwa dyoso didi.’”