Dya Kayadi Dya Malunda
11 Kyoso Lobowamu kyabhixila mu Jeluzaleme, wongeka akwa Judá ni akwa Bejamí, kifwa, hama ni makwinyi anake a midi a mazonda a alongo kulwa ita, phala kubhânga ni akwa Izalayele n’a vutwile o ungana kwa Lobowamu. 2 Maji Jihova wambela Semaya o diyala dya Nzambi yakidi, wixi: 3 “Tangela Lobowamu mon’a Solomá sobha ya Judá ni mundu woso wa akwa Izalayele ala ku Judá ni ku Bejamí. 4 ‘Jihova wambe kiki: “Kanenu kuya mulwa ita ni jiphange jenu. Kala muthu avutuke kubhata dyê, mukonda éme ngabhangesa o ima yiyi kubhita.”’” Kyenyiki, abelesela o kizwelu kya Jihova ya avutuka, ene kayi dingi mulwa ita ni Jelobowamu.
5 Lobowamu anga utunga mu Jeluzaleme, yu wafikidila o jimbanza ja Judá. 6 Kyenyiki, mwene wafikidila o mbanza ya Beleme, Etamu, Tekowa, 7 Betezule, Soko, Adulamu, 8 Ngate, Malesá, Zife, 9 Adayime, Lakiji, Azeka, 10 Zola, Ajalone ni Hebolone. O jimbanza jiji jofikidile, jexile ku Judá ni ku Bejamí. 11 Mu jimbanza jiji jofikidile wate-mu jikabhitangu, yu wakexile we mutumikisa-mu kudya, máji ni vinyu. 12 Mu jimbonge joso mwene anga utula-mu jingubu jamakota ni jisosa, o jimbanza wa jifikidila kyambote. Lobowamu anga ukala mutumina mu mbanza yoso ya Judá ni ya Bejamí.
13 O akunji ni Jilevita joso atungile mu Izalayele, axisa o jimbanza jâ ya adibundu kumoxi ni Lobowamu. 14 O Jilevita axisa o ididi yâ ya kwingila o ibhaku ni ima yoso ya atokala, ya ayi ku Judá ni ku Jeluzaleme mukonda Jelobowamu ni an’ê ka ehela dingi kusidivila kala akunji a Jihova. 15 Jelobowamu wasolo akunji phala kusidivila mu ididi ya kubhezela, kifwa, kubheza o madimonyo edile kala jihombo* ni iteka ya tungombe twabhangele mwene. 16 Ku miji yoso ya Izalayele, o yó amesenene kubheza Jihova o Nzambi ya Izalayele ni muxima woso, akayela o akunji ni Jilevita, ya ayi mu Jeluzaleme mubhakula jisata kwa Jihova, o Nzambi ya jikuku jâ. 17 Mu mivu itatu, ene akolesa o utuminu wa Judá, akwatekesa Lobowamu mon’a Solomá mukonda ene abelesela Nzambi kala kyabhangele Davidi ni Solomá.
18 Ku pholo dya kwenda, Lobowamu wakazala ni Mahatata mon’a Jedimote mon’a Davidi, o mam’ê wexile Abiyale mon’a Eliyaba mon’a Jesé. 19 Mu kubhita thembu, Mahatata wa muvwalela ana: Jewuji, Semadiya ni Zahama. 20 Mukusuluka, mwene wakazala ni Mahaka mulawula wa Abisalone. Mu kubhita thembu, mwene wa muvwalela o ana yá: Abiya, Atayi, Ziza ni Selomite. 21 Lobowamu wazolele dingi Mahaka, o mulawula wa Abisalone o ahatu akamukwa ni jisayi ndenge. Mwene wakexile ni dikwinyi ni dinake dya ahatu, ni makwinyi asamanu a jisayi. Mwene wavwala makwinyi ayadi ni dinake dya an’a mala ni makwinyi asamanu a ana ahatu. 22 Kyenyiki, Lobowamu wasolo Abiya mon’a Mahaka phala kukala mutwameni mwaxaxi ka jiphange jê mukonda wamesenene ku mu tumbika ku usobha. 23 Lobowamu-phe walondekesa unjimu mu kutumikisa amoxi ku an’ê mu jimbanza joso ja Judá ni ja Bejamí, mu jimbanza joso jofikidile, wa abhana kudya, wa abhana we ahatu avulu.