Dya Kayadi Dya Malunda
16 Ku muvu wa makwinyi atatu ni kasamanu wa utuminu wa Aza, Bahasa, sobha ya Izalayele weza mulwa ita ni akwa Judá, yu wamateka kutungulula o mbanza ya Lamá, phala kikukale muthu utunda mba ubokona mu jimbanza ja Aza, sobha ya Judá. 2 Kyenyiki, Aza wakatula o phalata ni ulu mu inzo ya Jihova ni mu inzo ya sobha, yu wa itumikisa kwa Bene-Hadade, sobha ya Sídya, watungile ku Damasku. Mwene wambe we wixi: 3 “Sayi-ku kikutu bhukaxi kami n’eye ni bhukaxi ka tata yami ni tat’é. Nga mu kutumikisa ujitu wa phalata ni ulu. Batula o ukamba ni Bahasa sobha ya Izalayele phala mwene atunde mu ixi yami.”
4 Bene-Hadade wabhange o kima kya mubhingi sobha Aza, yu watumikisa o jikabhitangu ja masoladi phala kulwa ita ni akwa Izalayele. Ene alwu ita ni akwa Ijone, akwa Dane, akwa Abele-Mayíno ni ixi yoso ya Nafitali. 5 Kyoso Bahasa kyevu o ima yiyi, weha kutungulula o mbanza ya Lamá, yu wayé. 6 Kyenyiki, sobha Aza wexana akwa Judá, ene akatula o matadi ni mabaya exile mutungulula-nawu sobha Bahasa o mbanza ya Lamá. Ni mabaya yá, sobha Aza watungulula o mbanza ya Jeba ni Mixipa.
7 Mu izuwa yenyoyo, Hanani, mukwa kumona o isumwa,* wayi kwa Aza sobha ya Judá, yu wa mwambela wixi: “Eye kiwatena kutolola o masoladi a sobha ya Sídya, mukonda kiwadyelela kwa Jihova Nzambi yé, maji wadyelela kwa sobha ya Sídya. 8 Manyi, o kifuxi kya masoladi kya akwa Itiyopya ni kya akwa Líbya ni makalu mâ a ita ni akwa kwendela mu jikabalu, kavudile dingi? Maji kuma wadyelele kwa Jihova, mwene wa abhakula bhu maku mé. 9 O mesu a Jihova atonginina o ngongo yoso, phala kulondekesa o kutena kwê mu kukwatekesa yó a mubheza ni muxima woso. Maji-phe eye ngana, wabhange kima kya wowa. Tunde lelu, o jinguma janda kwiza mubhânga n’eye.”
10 Kyenyiki, Aza wafutuluka ni mukwa kumona o isumwa, yu wamute mu kaleya, mukonda dya ima yazwela. Tunde mu kithangana kyenyokyo, Aza wamateka kutatesa amoxi ku kifuxi. 11 O musoso wa Aza, tunde ku dimatekenu ndu ku disukilu, a usoneka mu Divulu dya Jisobha ja Judá ni ja Izalayele.
12 Ku muvu wa makwinyi atatu ni kavwa wa utuminu wê, Aza wakatele o inama, mwene wakatele kyavulu. Né mwene kyoso kyakatele, mwene kasoto o kikwatekesu kya Jihova, maji wayi musota o kikwatekesu kya asaki. 13 Mu kusuka-ku Aza wafu. Mwene wafu mu muvu wa makwinyi awana ni kamoxi ka utuminu wê. 14 Kyenyiki, a mufundu mu mbila yadikota, yakandele phala mwene mu Mbanza ya Davidi. Amutula mu kipoya kyezalele ni máji a mazumba, o fungise ni ima inuha kyambote. Ya oha o ima yoso yiyi.