Dya Kayadi Dya Malunda

18 Jozafate wexile ni umvwama ni fuma yavulu, maji mwene wehela ndandu yê kukazala ku mwiji wa Akabe. 2 Mukubhita mivu, Jozafate wayi mukunda Akabe ku Samadiya. Akabe wajibha jimbudi ni jingombe javulu phala mwene ni yó ejile-nê kumoxi. Akabe wajijidika Jozafate kuya-nê mulwa ita ni akwa Lamote-Ngiliyade. 3 Kyenyiki, Akabe sobha ya Izalayele webhwidisa Jozafate, sobha ya Judá, wixi: “O kwila wandaya n’eme mulwa ita ni akwa Lamote-Ngiliyade?” Mwene watambwijila, wixi: “Ngandaya n’eye. O mundu wami wanda kala ni mundu wé, wanda kukwatekesa mu ita.”

4 Maji Jozafate wambela o sobha ya Izalayele, wixi: “Ngakudyondo, sota kwijiya hanji o kizwelu kya Jihova.” 5 Bhenyobho, o sobha ya Izalayele wongeka o jipolofeta. Ene exile hama jiwana ja mala, yu wa ebhwidisa: “O kwila tutena kuya mubhânga ni akwa Lamote-Ngiliyade, inga kana?” Ene a mutambwijila, exi: “Ndé sobha, o Nzambi yakidi wanda bhakula o mbanza bhu maku mé.”

6 Maji, Jozafate webhwidisa: “O kwila bhabha kibhwala polofeta ya Jihova ni tu mwibhule we?” 7 Kyenyiki, o sobha ya Izalayele watambwijila Jozafate, wixi: “Sayi-ku dingi diyala dimoxi, utena kututangela o kizwelu kya Jihova. Maji eme nga muzembe. Mukonda mwene kene muzwela ima yambote yalungu n’eme, uzwela ngo ima yayibha. Dijina dyê Mikaya mon’a Imila.” Maji Jozafate wa mwambela, wixi: “Sobha, eye kutokala kuzwela kiki.”

8 Mukiki, o sobha ya Izalayele wambela o selevende yê, wixi: “Lenguluka, tubhekele Mikaya mon’a Imila.” 9 O sobha ya Izalayele ni Jozafate sobha ya Judá, axikamene kala muthu bhu kyandu kyê kya ungana, azwatele o izwatu yâ ya ungana, axikamene bhu kididi bhwene mu bhyatela o idima, bhu mwelu wa Samadiya. O jipolofeta joso anga akala muzwela o maka a upolofeta. 10 Kyenyiki, Zedekiya mon’a Kenahana, wabhange jingela ja felu, yu wambe: “Jihova wambe kiki: ‘Ni jingela jiji, wanda tolola akwa Sídya, wanda abwika.’” 11 O jipolofeta joso exile muzwela kima kimoxi ngo, mukwamba: “Banda ku Lamote-Ngiliyade wanda kwatolola. Jihova wanda bhakula o mbanza bhu maku mé, sobha.”

12 Kyenyiki, o mukunji wayi mutakana Mikaya wambe, wixi: “Ejiya kwila o jipolofeta joso ja muzwela ngo ima yambote kwa sobha. Ngakudyondo, eye watokala uzwela we kala kya muzwela ene. Uzwela ngo ima yambote.” 13 Mikaya-phe wa mwambela, wixi: “Kala Jihova kyene ku mwenyu, yoso yanda ngitangela Nzambi yami, yene i nganda zwela.” 14 Kyenyiki, mwene wayi kwa sobha, o sobha yu wa mwibhwidisa, wixi: “Mikaya, o kwila tutena kuya mulwa ita ni akwa Lamote-Ngiliyade, inga kana?” Mwene wa mutambwijila, wixi: “Ndenu! Anda mibhakwila o jinguma bhu maku menu, enu mwanda ku atolola.” 15 Maji o sobha wa mwambela, wixi: “Lukuxi lunganda kubhangesa kuloka kwila, u ngitangela ngo o kidi mu dijina dya Jihova?” 16 Mwene watambwijila, wixi: “Ngamumona Izalayele yoso yadimwange ku milundu, kala jimbudi jakambe mubhidi. Jihova yu wambe: ‘Ene kala ni ngana. Kala muthu avutuke ku bhata dyê ni kutululuka.’”

17 O sobha ya Izalayele wambela Jozafate, wixi: “Kingikwambela kwila, mwene kanda ngitangela ima yambote, maji ima ngo yayibha?”

18 Mikaya wasuluka mu kuzwela: “Ivwenu o kizwelu kya Jihova! Ngamono Jihova waxikama ku kyandu kyê ni kifuxi kyoso kya dyulu kyemana bhu mbandu yê ya kadilu ni ya kyasu. 19 Bhenyobho Jihova webhwidisa: ‘Nanyi wanda nganala Akabe sobha ya Izalayele, phala abande ku Lamote-Ngiliyade, n’a fwile kwenyoko?’ Anga kibhita kwila, yú uzwela kiki, mukwa uzwela kyokyo. 20 Kyenyiki, anju imoxi yeza, yemana ku pholo ya Jihova, i yambe: ‘Eme nganda munganala.’ Jihova webhwidisa, wixi: ‘Wanda mu nganala kyebhi?’ 21 O anju yatambwijila: ‘Ngandaya-ku, nganda bhangesa o jipolofeta jê kuzwela makutu.’ Kyenyiki, mwene wambe: ‘Eye wanda tena. Wanda munganala mwene. Ndé, bhanga kala ki wambe.’ 22 Mukiki-phe, Jihova wehela o anju kubhangesa o jipolofeta jé, kukutangela makutu. Maji ejiya-nakyukuma, Jihova wambe kwila kokwé kwanda kwiza divuwa.”

23 Zedekiya mon’a Kenahana, wazukama kwa Mikaya wa mubhana huxi, yu wambe: “Eye wa muzwela kwila o nzumbi ya Jihova, ya ngixisa, i yazwela bhukaxi ké?” 24 Mikaya wa mutambwijila: “Kingila ngo! Wanda xikina mu izwelu yiyi, mu kizuwa ki wanda bokona mu xilu phala kusota bhwoso bhu udiswekela.” 25 Kyenyiki, o sobha ya Izalayele wambe: “Ambatenu Mikaya, mu mubhana kwa Amone o mutwameni wa mbanza ni kwa Jowaji, mon’a sobha. 26 Mwa atangela, ‘kiki kyene kyambe o sobha: “O diyala didi, mu mujikila mukaleya. Mu mudikila ngo ni kambolo ni tumenya kate kinganda vutuka ni kutululuka.”’” 27 Maji Mikaya wambe, wixi: “Ngana, se uvutuka ni kutululuka, Jihova kazwele n’eme.” Mwene wambe dingi: “Enu mu mundu woso lembalalenu o maka yá.”

28 Kyenyiki, o sobha ya Izalayele ni Jozafate sobha ya Judá, abande ku Lamote-Ngiliyade. 29 O sobha ya Izalayele wambela Jozafate, wixi: “Eme nganda zwata izwatu yengi phala kangitungunune ni ngiye mubhânga mu ita, maji eye watokala kuzwata o izwatu yé ya usobha.” O sobha ya Izalayele wazwata izwatu yengi, phala kamumone kwila mwene, yu wayi mubhânga mu ita. 30 O sobha ya Sídya wabhanene o kitumu ku atwameni a makalu mê a ita, kyambele: “Kanenu kubhânga ni disoladi mba kabhitangu ka masoladi. Mukwata ngo o sobha ya Izalayele.” 31 Kyenyiki, kyoso o atwameni a makalu a ita, kyamono Jozafate, ene abanze: “Yú mwéne o sobha ya Izalayele.” A muzukama phala kubhânga-nê. Bhenyobho, Jozafate wamateka kudikola mu kubhinga kikwatekesu. Jihova wa mukwatekesa, yu wabhangesa o masoladi kuditela kwengi. 32 Kyoso o atwameni a makalu a ita, kyamono kwila ki mwene o sobha ya Izalayele, ene eha ku mubhana o kikayu.

33 Sayi disoladi wakwata o mufula, o kyatakula o sosa, yene yatula kwa sobha ya Izalayele bhwa ditakanesene o kivungathulu. Sobha anga wambela o mwendexi wa dikalu dyê dya ita, wixi: “Lunguluka ni dikalu, ngikatule bhwala o ita, mukonda a ngikwama kyavulu.” 34 Mu kizuwa kyenyokyo, o ita ya dibandekesa, o sobha ya Izalayele a mwimanesa mu dikalu dyê dya ita kate mu ngoloxi. O kifuxi kya masoladi kya akwa Sídya kyakexile ku pholo yê. Kyoso o dikumbi ki dyakexile muboba kya, mwene wafu.