Dya Kayadi Dya Malunda
25 Kyoso Amaziya kyamateka kutumina, mwene wakexile ni makwinyi ayadi ni kitanu kya mivu, watumina mu Jeluzaleme mu makwinyi ayadi ni divwa dya mivu. O dijina dya manyâ dyexile Nzwanadane, mukwa Jeluzaleme. 2 Amaziya wakexile mubhanga ima yambote bhu pholo ya Jihova, maji kexile mu ibhanga ni muxima woso. 3 Kyoso mwene kyexile ni kutena kwa kutumina o ixi yoso, wajibha o jiselevende jê jajibhile tat’ê, o sobha. 4 Maji-phe mwene kajibha o twana twâ, mukonda wabhange kala kyatendelesele o kitumu kya Jihova kyosoneke mu divulu dya Mozé, kyambe: “O jitata katokala ku ajibha mukonda dya ituxi ya twana twâ, o twana we katokala ku ajibha mukonda dya ituxi ya jitata jâ. Maji kala muthu watokala kufwa mukonda dya kituxi kyê.”
5 Amaziya wongeka o mayala a Judá, yu wa asokejeka kala kyatokala ku mabhata a jitata jâ. Wasokejeka atwameni a midi ni atwameni a hama phala akwa Judá ni akwa Bejamí. Mwene wasoneka o majina a mayala oso exile ni makwinyi ayadi a mivu ni yó abhitile kya mu kitala kiki, yu wamono kwila, kwexile hama jitatu ja midi a mayala a alongele* kulwa o ita, atokalele kubhanga mbandu ya kifuxi kya masoladi. Ene exile ni uhete wa kukalakala ni jingumba ni jingubu jamakota. 6 Mwene wafutu hama ya jitalendu* ja phalata ku akwa Izalayele, phala ku mubhana hama ya midi a mazonda a ita. 7 Maji sayi diyala dya Nzambi yakidi, wayi mudisanga ni Amaziya yu wa mwambela: “Sobha tata, kana kwehela o kifuxi kya masoladi kya akwa Izalayele kuya kumoxi n’eye, mukonda Jihova kala ni akwa Izalayele, kala we ni akwa Ifalayime. 8 Ngana, ndé ngo eye mwene, swina mu kulwa o ita, se kukibhange, o Nzambi yakidi, wanda bhangesa o nguma yé ku kutolola. Mukonda Nzambi wala ni kutena kwa ku kwatekesa ni kwa kubhangesa o muthu ku mutolola.” 9 Kyenyiki-phe Amaziya webhwidisa o diyala dya Nzambi yakidi, wixi: “Abha-phe o hama ya jitalendu ji ngabhana ku masoladi a Izalayele?” O diyala dya Nzambi yakidi wa mutambwijila: “Jihova wala ni kutena kwa ku kubhana dingi, o kiki ki wabhana ndenge.” 10 Mukiki, Amaziya watumu o masoladi atundile ku Efalayíme kuvutuka mu ixi yâ. Maji o masoladi athathamene kyavulu mukonda dya akwa Judá, ya avutuka mu ixi yâ ni njinda yavulu.
11 Amaziya anga uswina, yu wayi kumoxi ni kifuxi kyê kya masoladi kate ku Honga ya Môngwa, mwene wajibha-ku dikwinyi dya midi a mayala akwa Seyile. 12 O mayala akwa Judá akutu dikwinyi dya midi dya masoladi ni mwenyu. Kyenyiki, a ambata ku thandu a ditadi dya dikota dya dileka, ya a alundula bhoxi. Enyoso anga a sasujuka. 13 Maji-phe o masoladi a avwitile kwa Amaziya ejiya-nê mu ita, ayi mu mbonge ya Judá ajibha-mu midi jitatu ja athu, tunde ku Samadiya ndu ku Betolone, ya ambata ima yavulu.
14 Anga kibhita kwila, kyoso Amaziya kyavutuka kwayile mujibha akwa Idomo, weza ni jinzambi ja akwa Seyile, yu wajibhange jinzambi jê. Mwene wamateka ku jifukamena ni kubhakula jisata* ku jinzambi jiji. 15 Kyenyiki, Jihova wakwatela njinda kwa Amaziya yu watumikisa polofeta phala ku mwambela: “Mukonda dyahi wa mubheza o jinzambi ja mundu yú jakambe kubhulula o mundu wê bhu maku mé?” 16 Kyoso mwene kyexile hanji muzwela, o sobha wa mwambela, wixi: “O kwila akusolo phala kubhana kayula kwa sobha? Dixibhe! Wamesena kufwa?” Kyenyiki, o polofeta wadixibha, maji wambe dingi wixi: “Ngejiya kwila Nzambi wamesena ku kubwika mukonda dya kima kiki ki wabhange ni mukonda dya kukamba kwivwa o kayula kami.”
17 Kyazubha ku dizwelesa ni akwa ku mubhana o jindunge, Amaziya sobha ya Judá watumikisa akunji kwa Jowaji, mon’a Jowakaji mon’a Jehú, sobha ya Izalayele, ni njimbu yambele: “Zá, tubhânge mu ita.” 18 Jowaji sobha ya Izalayele watumina kutangela Amaziya sobha ya Judá, wixi: “Kwexile muxi wa minya wa Libanu, watumu kutangela o muxi wa sédulu wa Libanu: ‘Bhana mon’ê phala n’a kale muhatu wa monami.’ Maji sayi kyama kya muxitu wa Libanu kyabhitila bhwexile o muxi wa minya, yu wa udyota. 19 Eye wambe, wixi: ‘Eme ngatolola Idomo.’ Mukyenyiki, eye wadizangeleka, wamesena fuma. Maji kala kubhata* dyé. Mukonda dyahi weji dibhekela o divuwa didi ni kubheka we divuwa mu Judá?”
20 Maji Amaziya kabhana mátwi, kiki kyabhiti mukonda kyene kyamesenene o Nzambi yakidi. Mwene wamesenene ku mubhakula bhu maku a jinguma, mukonda dya kubheza o jinzambi ja Idomo. 21 Kyenyiki, Jowaji sobha ya Izalayele wayi. Mwene walwu ita ni Amaziya sobha ya Judá ku Beteseme, o mbanza yatokala mu Judá. 22 Akwa Judá a atolola ku akwa Izalayele, kala muthu walengela kubhata dyê. 23 Jowaji sobha ya Izalayele wakutu Amaziya sobha ya Judá mon’a Jowaji mon’a Jowakaji* mu Beteseme. Mukusuluka, Jowaji wa mwambata mu Jeluzaleme, yu wabhange dibhululu dyexile ni hama jiwana ja jikovadu* ku ilumbu, tunde bhu Mwelu wa Efalayime, kate bhu Mwelu wa Atungi. 24 Mwene wakatula o ulu yoso ni phalata ni ima yamukwa yexile mu inzo ya Nzambi yakidi ni ima yexile ni Obede-Edomo ni mu inzo ya sobha, yu wambata we athu. Mukusuluka, wavutuka ku Samadiya.
25 Amaziya mon’a Jowaji sobha ya Judá wexile hanji ku mwenyu mu dikwinyi ni kitanu kya mivu, kyoso kyafu Jowaji mon’a Jowakaji sobha ya Izalayele. 26 Yalungu ni ima yamukwa ya musoso wa Amaziya, tunde ku dimatekenu ndu ku disukilu, a isoneka mu Divulu dya Jisobha ja Judá ni ja Izalayele. 27 Tunde Amaziya kyeha kubheza Jihova, amute kikutu kya ku mujibha mu Jeluzaleme. Kyenyiki mwene walengela ku Lakiji, maji atumikisa mayala phala ku mu kayela ku Lakiji, ya a mujibhila kwenyoko. 28 O kimbi kyê, a kyambatela ku kabalu, eza na-kyu mu Judá, ya a mufundu bhwa fundile o jikuku jê, mu mbanza ya Judá.