Dya Kayadi Dya Malunda

27 Jotamu wexile ni makwinyi ayadi ni kitanu kya mivu kyoso kyakituka sobha, watumina mu dikwinyi ni samanu a mivu mu Jeluzaleme. O dijina dya manyâ, dyexile Jeluza, mon’a Zadoke. 2 Mwene wexile mubhanga ima yayuka bhu pholo ya Jihova, kala kyabhangele tat’ê Uziya. Maji mwene kabokona mu kididi kyofidise kya tembulu ya Jihova, kala kyabhangele tat’ê. O mundu wexile hanji mubhanga ima yayibha. 3 Mwene watungu o mwelu ku mbandu ya thunda ya inzo ya Jihova, yu wabhange ikalakalu yavulu ku ilumbu ya Ofele. 4 Watungu we jimbanza ku milundu ya Judá, jimbonge ni jinzo jamatala ku mixitu. 5 Walwu ita ni sobha ya akwa Amone yu wa mutolola. Mukyenyiki, mu muvu wenyó, akwa Amone a mufutu hama ya jitalendu* ja phalata, dikwinyi dya midi dya kolu* ya tiliku ni dikwinyi dya midi dya kolu ya Sevada. Ene asuluka ni ku mufuta o ima yenyiyi mu muvu wa kayadi ni wa katatu. 6 Kyenyiki, Jotamu ukala ni kutena kwavulu, mukonda wexile mukwenda mu jinjila ja Jihova Nzambi yê.

7 O ima yamukwa ya musoso wa Jotamu, o ita yoso yalwu ni ima yabhange, a isoneka mu Divulu dya Jisobha ja Izalayele ni ja Judá. 8 Kyoso kyakituka sobha mwene wexile ni makwinyi ayadi ni kitanu kya mivu. Mwene watumina mu Jeluzaleme mu dikwinyi ni samanu dya mivu. 9 Mukusuka-ku Jotamu wafu, ya a mufundu mu Mbanza ya Davidi. Mon’ê Akaji mwéne wa mubhingana bhu kididi kyê kya usobha.