Amoji
7 O Ngana Jihova, Sukeku, wa ngibhangesa kumona kisumwa, mu kisumwa ngamono kwila, mwene wabheka kihoho* mu kithangana* kyamateka kusabhuka o idima yasukina. Yexile o idima yasukina mu kithangana kyabatwile o yangu phala o ibhaku ya sobha. 2 Kyoso o kihoho ki kyazubha kudya o idima mu ixi, eme ngambe: “Ngana Jihova tata, u Sukeku, ngakudyondo, muloloke! Kyebhi Jakobo kyanda tena kubhuluka?* Mwene kala ni nguzu.”
3 Mukyenyiki, Jihova walungulula o kibanzelu kyê. Jihova wambe: “O kima kiki, kikyanda bhita dingi.
4 Yiyi yene o ima ya ngilondekesa Ngana Jihova, Sukeku, mu kisumwa: Mu kisumwa kiki, o Ngana Jihova, Sukeku watumina kubwika o ixi ni túbhya. O túbhya twa kukutisa o menya a kalunga, twabwika we mbandu ya ixi. 5 Bhenyobho, eme ngambe: “Ngana Jihova tata, u Sukeku, ngakudyondo, kana kubhanga kiki. Kyebhi Jakobo kyanda tena kubhuluka? Mwene kala ni nguzu!”
6 Mukyenyiki, Jihova walungulula o kibanzelu kyê. O Ngana Jihova, Sukeku, wambe, wixi: “O kima kiki, ki kyanda bhita we.”
7 Kiki kyene kya ngilondekesa mwene: Ngamono Jihova wemana ku thandu a kilumbu, kyosokelese ni mukolo wa kutunga-nawu jinzo. Mwene wakwatele mukolo wa kutunga-nawu jinzo.* 8 Mukusuluka, Jihova wa ngibhula, wixi: “Amoji, ihi i wa mumona?” Nga mutambwijila: “Nga mumona mukolo wa kutunga-nawu jinzo. Mukyenyiki, Jihova wambe, wixi: Nga muta mukolo wa kutunga-nawu jinzo mukaxi ka mundu wami wa Izalayele. Kinganda kwaloloka dingi. 9 Nganda bwika o ididi ya kubhezela ya Izake. Nganda bwika we o ididi ikôla ya Izalayele. Nganda kwiza mubwika o dibhata dya Jelobowamu ni xibhata.”
10 O mukunji Amaziya, mukwa Betele, watumikisa o njimbu yiyi kwa Jelobowamu, sobha ya Izalayele. O njimbu yambe kiki: “Ngana yami, Amoji wa mu kulungulukila mwaxaxi ka mundu wa Izalayele. O athu mu ixi, kamutena dingi kwivwa o izwelu yê. 11 Mukonda Amoji wa muzwela, wixi: ‘Jelobowamu anda mujibha ni xibhata, akwa Izalayele anda ku akatula mu ixi yâ phala ku abalakala mu ixi yengi.’”
12 Amaziya wambela Amoji, wixi: “Tunda bhabha eye u mukwa kumona o isumwa! Ndé mu ixi ya Judá utunge mwenyomo,* uzwele o maka a upolofeta mwenyomo.” 13 Kana kuta dingi o maka a upolofeta ku Betele, mukonda Betele kyene o kididi mwene mukwiza o sobha phala kubheza, kyene we o kididi mwene mu dyongekela o kifuxi kyoso phala kubheza.”
14 Mukyenyiki, Amoji watambwijila Amaziya, wixi: “Eme kingexile ngi polofeta, kana, tat’etu kexile we polofeta. Maji ngexile ngi mubhidi, ngexile we mukalakadi wa jifiku.* 15 Maji Jihova wa ngikatula mu kikalakalu kyami kya kwinga o ibhaku, Jihova wa ngambela, wixi: “Nde utange o maka a upolofeta ku mundu wami wa Izalayele. 16 Ivwa o izwelu ya Jihova: “Eye wa muzwela, wixi: “Kana kukanena ima yayibha ku akwa Izalayele. Dibhata dya Izake kana kudibokela ima yayibha.” 17 Jihova wambe kiki: “O muhatu wé wanda kituka kiwaya mu mbanza. O twana twé twa mala, anda kwa jibha ni xibhata. O ixi yé anda ku iwana-wana ni mukolo wa kuzonga. Eye wanda fwila mu ixi yakasana. Akwa Izalayele, anda kwakatula mu ixi yâ, anda ku abalakala mu ixi yengi.”’”