Zakadiya
11 “Jikula o mabhitu mê eye u Libanu,
Phala o túbhya tujokotese o mixi ya misedulu.
2 Ditende eye u muxi wa junipelu, mukonda o mixi ya misedulu yabu,
O mixi yamakota yafwama a ibwika!
Ditendyenu, enu mu mixi ya kaluvadyu ya Basane,
Mukonda o muxitu wadikota a ubwika.
3 Ivwenu! O abhidi a muditenda,
Mukonda o kutena kwâ a akatula-naku.
Ivwenu! O an’a jihoji a muzuma,
Mukonda o mixitu yamakota yala ku mbandu a ngiji ya Njolodá a ibwika.
4 “Jihova Nzambi yami, wambe kiki: ‘Inga o jimbudi jiji mukonda anda jijibha. 5 O yó a jisumba, a jijibha, maji kene mu afundisa. O yó a jisumbisa amba: “Jihova ataneku, mukonda twanda kala tu jimvwama.” O abhid’yâ kajikwatela henda, kana.’
6 Jihova wambe kiki: “‘Kinganda kwatela dingi henda ku athu atungu mu ixi yiyi.’ ‘Muthu ni muthu nganda mubhakula bhu maku dya mukwa ni bhu maku a sobha yâ. Ene anda bwika o ixi yiyi, eme kinganda kwabhulula bhu maku mâ.’”
7 Ngamateka kwinga o jimbudi jexile phala kujijibha, ngabhange kiki phala o mbote yâ, mukonda exile mujitatesa. Mukyenyiki, ngakwata mbangala jiyadi. Imoxi nga ixana Mbote, o ya mukwa nga ixana Kukala Kumoxi. Bhenyobho ngamateka kwinga o jimbudi. 8 Mu mbeji imoxi ngo, ngakaye abhidi atatu, mukonda ki nga akwatela dingi mwanyu, ene wa a ngizembele. 9 Eme nga ambela, ngixi: “Kinganda suluka dingi ni ku mi inga. O yoyo yala phala kufwa, ifwe, o yoyo yala phala ku ibwika, a ibwike. O jojo janda subhuka, jididye mudyâ.” 10 Mukyenyiki, ngakwata o mbangala yami a ixana Mbote, nga ibatujula mu kubhwisa o kikutu ki ngatele ni ifuxi yoso. 11 Mu kizuwa kyenyokyo, o kikutu kyabhu, o jimbudi exile mujitatesa, jakexile mu ngitala, jatongolola kwila o njimbu yoyo yatundele kwa Jihova.
12 Eme ngambe ngixi: “Se mwamono kwila kyafwama, ngibhanyenu o futu yami, maji se kana, kanenu ku ngifuta.” Ene a ngifutu makwinyi atatu a mabele a phalata.
13 Bhenyobho, Jihova wa ngambela wixi: “Takula o kama kaka ka ngibhana ene, bhu kididi bhwene mubhaka o ima yavalolo. Kyenyiki, o makwinyi atatu a mabele a phalata nga atakula mu kididi mwene mubhaka o ima yavalolo mu inzo ya Jihova.
14 Mukusuluka, ngabatujula o mbangala yami ya kayadi, a ixana Kukala Kumoxi mu kubhwisa o undandu wa Judá ni Izalayele.
15 Jihova wa ngambela wixi: “Katula o ima yatokala ku mubhidi wayibha. 16 Mukonda nganda bhangesa kwila mu ixi yiyi mukala mubhidi. Mwene kanda langa o jimbudi ja mufwa, kanda sota o kambudi kajimbidila, kanda tumba o jifidila ja mbudi ya dikwama, o mbudi yadisanze kanda ibhana kudya. Muveji dya kiki, mwene wanda dya o xitu ya mbudi yanete ni kuxomona o ikoto ya jimbudi.
17 Lamba dye eye u mubhidi wami wayibha, ubwazeka o jimbudi!
O xibhata yanda tula ku lukwaku lwé ni ku dyesu dyé dya kadilu.
O lukwaku lwé lwanda nemana,*
O dyesu dyé dya kadilu dyanda fwa.”