O Kuila o Bibidia i Tena ku ku Kuatekesa ku Dibhana ni Uhaxi ua Dikota?

O Bibidia i tambuijila

Xe, i tena ku tu kuatekesa. Nzambi u suua o jiselevende jê a kate. O Bibidia i zuela ia lungu ni selevende iê ia fiiele, iexi: “Jihova u mu bhana nguzu bhoxi dia kukata.” (Jisalamu 41:3) Eie se uala u haxi, o ima itatu iala ku luiji i tena ku ku kuatekesa ku kolokota:

1. Bhinga nguzu kua Nzambi phala u tena ku kolokota. Eie u tena o ku tambula “o Kutululuka [ku] Nzambi ku somboka o kitongoluelu,” o kutululuka kuku ku tena ku u kuatekesa o ku kolokota sumbala ni uhaxi.—Filipe 4:6, 7.

2. Kala ni ibanzelu iambote. O Bibidia iambe: “O muxima ua sanguluka, u di bhanga milongo iambote mu mukutu ua muthu; maji o muxima-phe ua budika ni dilamba, u ku kutisa ifuba.” (Jisabhu 17:22) Sota kuelela ni akuenu mukonda o ku bhanga kiki, ki kia-nda ku sangulukisa ngó o muxima maji kia-nda ku bhangela ué kiambote ku sauidi iê.

3. Dielela ku ikanenu ia Nzambi. O ku kala ni kidielelu ku tena ku u kuatekesa ku sanguluka, né muene ni uhaxi. (Loma 12:12) O Bibidia i zuela kuila ku hádia ‘ki bhua kà kala muthu, uila: ‘Nga kata, lèmbua.’’ (Izaia 33:24) Nzambi ua-nda zubha o mauhaxi moso; o jingijiie ku mundu uoso ka tena ku bhanga kiki. Mu kifika, O bibidia i zuela kuila o adiakimi a-nda kituka minzangala, o Bibidia i zuela: “Bhene’obho-phe o xitu jê ji beta dingi ku buingita, anga ji somboka muene kia kexi mu nguzu ia undenge, muene anga u vutukila dingi mu izuua ia unzangala uê.”—Jobe 33:25.

Tala: Sumbala o Jimbangi ja Jihova a dielela mu kikuatekesu ki bhana Nzambi, ene uá mu sota milongo mu ididi muene mu saka o jihaxi. (Marku 2:17) Maji etu ki tu tena ku tangela o athu se milongo iebhi ia tokala o ku i kaiela, mukonda kala muthu ua tokala ku sola o kididi ni milongo iebhi ia tokala ku i kaiela.