DISÁ 14
Ihi Itwabhingi Kubhanga Phala Nzambi Kuxikina o Ubhezelu Wetu?
Kala kitwamono mu disá dya tundumu, Nzambi kaxikina o maukexilu oso akumubheza. Maji tutena kubheza o Mubhangi wetu mu ukexilu umusangulukisa. Webhi o ‘ukexilu wakumubheza’ umusangulukisa? (Tiyaku 1:27) Tumone ihi ilonga o Bibidya.
1. O ubhezelu wetu watokola kulunga ni ihi?
O ubhezelu wetu watokala kulunga ni Bibidya. Jezú wambela Nzambi: ‘O maka mé ene o kidi.’ (Nzwá 17:17) Muveji dya kubhana valolo mu kidi kitusanga mu Mak’â Nzambi o Bibidya, mu jingeleja javulu abhana dingi valolo mu ilongesu ni mu ijila ya athu. Maji Jihova kasanguluka ni yó ‘abhukumukina o kitumu kya Nzambi.’ (Tanga Máluku 7:9.) Ku mbandu ya mukwa, tusangulukisa Jihova kyoso kitubelesela o milongi ya Bibidya.
2. Kyebhi kitwatokala kubheza Jihova?
Twatokala kubheza ngó Jihova mukonda mwéne o Mubhangi wetu. (Dijingunwinu 4:11) Mu kiki kitutokala kubheza iteka, mukonda o henda yetu ni ubhezelu wetu watokala ngó kwa Jihova.—Tanga Izaya 42:8.
O ubhezelu wetu ‘watokala uzela, a uxikina’ kwa Jihova. (Loma 12:1) Kiki kilombolola kwila, twabhingi kubelesela o itumu yê ya lungu ni wendelu wambote. Mu kifika, o yó azolo Jihova abelesela o itumu yê ya lungu ni ukaza. Ene we kabwakula makanya, kanu jidroga, kanu uhôlwa wavulu.a
3. Mukonda dyahi twatokala kubheza Jihova kumoxi ni akwetu?
O yônge yetu ya kaxi kasemana itubhana ujitu wa ‘kuximana Jihova . . . bhwa bhongoloka o mundu.’ (Jisálamu 111:1, 2) Ukexilu umoxi wakubhanga kiki, o kuximana Nzambi bhu kaxi kamimbu. (Tanga Jisálamu 104:33.) Jihova ututendelesa kuya mu yônge mukonda watuzolo, wejiya we kwila o yônge yandatukwatekesa kusanguluka katé kuhádya. Kyoso kituya mu yônge, tuswinisa akwetu, ene we atuswinisa.
DILONGE DINGI
Ijiya se mukonda dyahi Jihova kaxikina kumubheza bhu kaxi ka iteka. Dilonge we o maukexilu atokala akubheza Nzambi.
4. Kitutokala kubheza Nzambi bhu kaxi ka iteka
Kyebhi kitwejiya kwila, Nzambi kawabhela kumubheza bhu kaxi ka iteka? Tala OVIDYU, mukusuluka bhanga o kibhwidisu kya kayela.
Mu ukulu, sayi jiselevende ja Nzambi afikisile kumubheza bhu kaxi ka iteka. Mukonda dya kiki, ihi ya bhiti ni ene?
Sayi athu amba kwila, o kubheza iteka kwazukamesa kwa Nzambi. Maji o kwila kiki kidi? Tanga Makatukilu 20:4-6 ni Jisálamu 106:35, 36, mukusuluka bhanga o ibhwidisu ya kayela:
Eye wene mumona o athu kubheza Nzambi ni iteka yebhi?
O kwila Jihova usanguluka kyoso athu kya mu bheza bhu kaxi ka iteka?
Ihi i ubanza ya lungu ni kubheza Nzambi bhu kaxi ka iteka?
5. O kubheza ngó Jihova kutujituna kumilongi ya makutu
Tala kyebhi o kubheza Jihova mu ukexilu watokala, kutujituna kumilongi ya makutu. Tala OVIDYU.
Tanga Jisálamu 91:14, mukusuluka bhanga o kibhwidisu kya kayela:
Etu tulondekesa kwila twazolo Jihova mu kumubheza ngó mwene. Ihi ya tukanena kutubhana Jihova se tubhanga kiki?
6. Twene mubheza Nzambi bhu kaxi ka yônge mu kilunga
Kyoso kitwimba ni kutambwijila mu yônge, twamuximana Jihova ni kuswinisa we akwetu. Tanga Jisálamu 22:22, mukusuluka bhanga o ibhwidisu ya kayela:
Eye wawabhela kwivwa o itambwijilu mu yônge?
Wamesena we kudisokejeka phala kutambwijila mu kyônge?
7. Jihova usanguluka kyoso kituzwela ni akwetu o ima itwamudilonga
Kwene maukexilu avulu akuzwela o kidi kya Bibidya ni akwetu. Tanga Jisálamu 9:1 ni 34:1, mukusuluka bhanga o kibhwidisu kya kayela:
Kidi kyebhi kya Bibidya kiwadilongo kya, kiwamesena kutangela akwenu?
ATHU AVULU AMBA: “Kitutena kusangulukisa Nzambi.”
Kyene we ki ubanza?
IHI IWADILONGO
Tusangulukisa o Mubhangi wetu mu kumubheza ngó mwene, kumuximana mu yônge ni kyoso kitutangela akwetu o ima itwamudilonga.
Kubhitulula
Kyebhi kitutena kudilonga kubheza Nzambi mu ukexilu umusangulukisa?
Mukonda dyahi twatokala kubheza ngó Jihova?
Mukonda dyahi twatokala kubheza Nzambi kumoxi ni akwetu amesena kubhanga o vondadi yê?
TOKWESA DINGI
Tanga o musoso wamuhatu weha o ubhezelu wa iteka mbandu “Kingamubheza Dingi Iteka”.
“O Bibidya Ilungulula o Myenyu ya Athu” (O Mulangidi, 1 wa Kavwa wa 2011)
Ijiya ihi itena kukukwatekesa kutambwijila mu yônge.
Tala kyebhi o yônge ya kwatekesa muzangala, sumbala kwamubhonzele kuya mu Kididi kya Ubhezelu.
Athu avulu axikina kwila, o Jikidistá atokala kubheza Nzambi ni dikulusu. O kwila kyene mwene kitwatokala o kubhanga?
“Mukonda Dyahi o Jimbangi ja Jihova Kene Mubheza Nzambi ni Dikulusu?” (Milongi ya jw.org)
a O madisá ala kupholo andazwela dingi ya lungu ni maka ya.