O Batizu Ihi?
O Bibidya i tambwijila
Phala o muthu kumu batizala, abhingi kumubonda mu menya ni kumubalumuna.a Kyene kya bhiti ni Jezú kyoso kya mubatizala, mwene a mubatizala mu ngiji. (Matesu 3:13, 16) O Bibidya izwela we yalungu ni diyala mu kwa Itiyopya a mubatizala “mu menya.”—Ikalakalu 8:36-40.
O batizu ilombolola ihi
O Bibidya isokesa o batizu ni kufunda. (Loma 6:4; Kolose 2:12) Kyoso o muthu kya mubonda mu menya, kilondekesa kwila o ukexilu we wa mwenyu wokulu waxala kudima mba wafu, anga ukituka Kidistá ya ubhe wadibhakula kwa Nzambi. Kyoso kyatunda mumunya kilondekesa kwila mwene wala ni mwenyu wa ubhe, mwene wala polondo phala kubhanga o vondadi ya Nzambi. O batizu ilombolola kwila o muthu wala ni kixikanu kwa Jezú Kidistu ni kwila wabhange kima phala kukala ni kitongolwelu kyazele bhu pholo ya Nzambi. (1 Phetele 3:21) Mukonda dya kiki Jezú wambe kuma o maxibulu mê atokalele kwa batizala.—Matesu 28:19, 20.
O kwila o batizu izubha o ituxi ya muthu?
Kana. O Bibidya itulonga kuma o ituxi yethu atena ngó ku ijma bhukaxi ka maynga a Jezú. (Loma 5:8, 9; 1 Nzwá 1:7) Maji phala o muthu kukatula mbote mu sata ya Jezú, watokala kukala ni kixikanu kwa mwene, kukumbidila o ima ya longo Jezú ku mwenyu wê ni kumubatizala.—Ikalakalu 2:38; 3:19.
O kwila o Bibidya ilonga yalungu ni batizu ya tubwetele?
Kana. O kizwelu kiki kikimoneka mu Bibidya. Sayi jingeleja o athu ala ni kifwa kya kulundulula tumunya ku mutwe wa monandege mba kabwetele phala kulombolola kuma amubatizala, mukusuluka amubhana we dijina. Maji o atokala kumubatizala yo ngó wala ni kitala kyasoko phala kutendela “o njimbu yambote ya Utuminu wa Nzambi” anga uyixikina. (Ikalakalu 8:12) Kiki kilombolola kudilonga o maka a Nzambi, kukumbidila yamudilonga ni kudyela o ituxi yé. O kabwetele kikatena kubhanga o ima yiyi.—Ikalakalu 2:22, 38, 41.
Kumbandu yamukwa, o Bibidya ilondekesa kwila o ana a Jikidistá azele bhu pholo ya Nzambi mukonda dya kixikanu ni ufiyele wa jitata jâ, kana mukonda dya kwabatizala mu undenge wá. (1 Kolindu 7:14) Se o batizu ya tubwetele yexile ya kidi, ene kejibhindamena dingi o kixikanu kya jitata jâ, phala akale athu azele bhu pholo ya Nzambi.b
O makutu alungu ni batizu ya Jikidistá
Makutu: O kulundulula tumenya ku muthu kilombolola kwila amubatizala kya.
Kidi: O Bibidya izwela yalungu ni ukexilu watokala wa kubatizala. Mu ukexilu yu o muthu atokala a mubonda mu menya. Mu kifika, kyoso Filipe kya batizala o dyala mukwa Itiyopya, “ene a kulumuka mu menya” phala kumu batizala. Mukusuluka, ‘ene atundu mu menya.’—Ikalakalu 8:36-39.c
Makutu: O Bibidya yamba kuma kyoso kyexile mu batizala o athu ku mwiji, o tubwetele exile we mwabatizala. Mukifika, o yalungu ni Kasalelu mu mbanza ya Filipu yene izwela kiki: “Mwene ni mwiji wê woso a abatizala.”—Ikalakalu 16:31-34.
Kidi: Mu kifika kiki twamono kuma o Kasalelu ni mwiji wê, axikina ya atendela “o mak’â Jihova” mu kiki ene “a sanguluka kyavulu”. (Ikalakalu 16:32, 34) Mu kiki tutena kuzwela kwila ku mwiji wa Kasalelu ka batizaku kabwetele. Mukonda o tubwetele tutu kejitena hanji kutendela o mak’â Jihova.
Makutu: Jezú walongo o maka alungu ni kubatizala o tubwetele kyoso kyambe kwila, o Utuminu wa dyulu watokala ku ana ndenge.—Matesu 19:13-15; Máluku 10:13-16.
Kidi: Kyoso Jezú kyazwela o maka yá, mwene kexile muzwela ya lungu ni batizu. Muveji dya kiki, mwene wakexile mu lombolola kwila phala o muthu kutambula o mabesá a Utuminu wa Nzambi, mwene watokala kulenduka kala mona ndenge.—Matesu 18:4; Luka 18:16, 17.
a O kizwelu “batizu” mu dimi dya Ngeleku kilombolola kubonda o muthu mu menya. Tala o Dictionary Theological of the New Testament, (Dicionário Teológico do Novo Testamento), Volume I, difwe 529.
b Ya lungu ni kubatizala o tubwetele o Encyclopedia Biblica Padrão Internacional, do “[Novo] [Testamento] ki ikwatekesa o ilongesu ya kubatizala o tubwetele.” Yene yambe we kwila o maka a moneka mukonda dya kixinganeku kyayibha kya lungu ni valolo ya batizu, mba o batizu itena kubhwisa o ituxi—Volume 1, difwe 416-417.
c O Nova Encyclopedia Católica mu mbandu “Batizu (mu Bibidya), yamba: “Kiki kilombolola kwila, mu Ngeleja ya dyanga phala kubatizala o muthu akexile mu mubonda mu menya.”—Volume 2, difwe 59.