DISÁ 39
O Ukexilu wa Nzambi wa Kutala o Manyinga
O manyinga ala ni valolo yadikota. Sé manyinga seku muthu wejikala ni mwenyu. Nzambi o Mubhangi wetu, mwene watokala kututangela ihi itwatokala kubhanga ni manyinga ni ihi kitutokala kubhanga ni manyinga. Ihi yambe mwene yalungu ni manyinga? O kwila tutena kudya o manyinga mba kuxikina ukexilu wakusaka ni manyinga? Kyebhi ki utena kusola kyambote mu maka yá?
1. Webhi o ukexilu wa Jihova wakutala o manyinga?
Jihova wambela o jiselevende jê mukulu: “O mwenyu wa xitu yoso wene mu manyinga mê.” (Ijila 17:14) Phala Jihova o manyinga alombolola mwenyu. Se o mwenyu ujitu ukôla wa Nzambi, kiki kilombolola we kwila o manyinga kima kikôla.
2. Ihi yafidisa Nzambi kubhanga ni manyinga?
Phala Jihova o manyinga kima kikôla. Mukiki mwene wambela o jiselevende jê mukulu exile ku mwenyu ande dya Jezú kwiza mu ixi phala kadyé o manyinga. (Tanga Dimatekenu 9:4 ni Ijila 17:10.) Mwene wabhitulula o kitendelesu kiki kyoso o jipoxolo ni tufunga kyambela o Jikidistá: “Kana kudya manyinga moso-moso.”—Tanga Ikalakalu 15:28, 29.
Ihi ilombolola kudituna kudya o manyinga? Se o musaki ukutendelesa kwila kana kunwa uhôlwa, o kwila wejinwa? O kwila wejidya kudya kwate uhôlwa mba kuta uhôlwa mumixibha bhukaxi ka jinguya? Mukidi kana. Kyene kimoxi we ni kitumu kya Nzambi kya lungu ni kudituna o manyinga kilombolola kwila, kitutokala kunwa manyinga mba kudya xitu yakambe kubhubhisa manyinga. Kilombolola we kwila, o kudya kwolambe ni manyinga kitutokala kukudya.
Abha o ya lungu ni maukexilu akusaka ni manyinga? Sayi maukexilu akusaka o fudise mu Bibidya. O maukexilu yá, alungu ni kutambula manyinga mba kutambula jimbandu jamanyinga kala: Ndundula ya kusuka, ndundula ya zele, jiplaketa, ni plasma. Maji sayi maukexilu akamukwa akusaka, nange kitwejiya kyambote se o fudise mu Bibidya mba kana. Mu kifika, sayi maukexilu akusaka ene mwabhanga ni jimbandu ja manyinga jotumbule kyá kutunda, maji amukwa a abhanga mwene ni manyinga amuthu amumusaka. Mukusola o ukexilu yú wakusaka, kala muthu mudyetu mwene watokala o kusola.a—Ngalásya 6:5.
DILONGE DINGI
Tala kyebhi ki utena kusola o maukexilu atokala akusaka.
3. Sola ukexilu wakusaka usangulukisa Jihova
Kyebhi ki utena kusola o maukexilu akusaka alungu ni ukexilu wa Jihova wakutala o manyinga? Tala OVIDYU, mukusuluka zwelenu ya lungu ni valolo ya kukayela o jindunge jiji.
Samba phala kubhinga unjimu.—Tiyaku 1:5.
Tokwesa jivelusu ja Bibidya, xinganeka kyebhi ki utena kujikumbidila.—Jisabhu 13:16.
Sota kwijiya ebhi o maukexilu ene musakanawu mumbanza mu watungu.
Ijiya o maukexilu akusaka uwabhingi kudituna.
Tala se o kima kiwandasola kikyanda thandanganyesa o kilunji kyé.—Ikalakalu 24:16.b
Lembalala kwila, mumaka alungu ni kitongolwelu, seku muthu watokala kukutangela ihi iwatokala o kusola, né mwene se munumyé, muhatwé, kafunga mba mulongexi wa Bibidya.—Loma 14:12.
Soneka o kima kiwasolo.
4. O Jimbangi ja Jihova amesena o ukexilu wafwama wakusaka
Tutena kubelesela o kitumu kya Nzambi kya lungu ni manyinga ni kusola ukexilu wakutusaka sé manyinga. Tala OVIDYU.
Tanga Titu 3:2, mukusuluka bhanga o kibhwidisu kya kayela:
Mukonda dyahi twatokala kulondekesa kuxila ni kutululuka mu kuzwela ni jidotolo?
O Jikidistá kaxikina |
Kala Kidistá mwene usola |
|---|---|
A. Plasma |
Jimbandu ja plasma |
B. Ndundula ya zele |
Jimbandu ja ndundula ya zele |
C. Jiplaketa |
Jimbandu ja jiplaketa |
D. Ndundula ya kusuka |
Jimbandu ja ndundula ya kusuka |
5. Ya lungu ni jimbandu ja manyinga ihi iwatokala o kusola
O manyinga ala ni jimbandu jiwana jakatunda: ndundula ya kusuka, ndundula ya zele, jiplaketa, ni plasma. O jimbandu jiwana jiji, atena kujiwanuna mu jimbandu jofele ajixana jimbandu ja manyinga.c Sayi jimbandu ja manyinga ene mujita mumilongo phala kusaka nawu o mauhaxi.
Ya lungu ni jimbandu ja manyinga, kala kidistá mwene watokala kusola bhukaxi ka kitongolwelu kyê kyolonge mu Bibidya. Nange sayi athu adituna o ukexilu wakusaka ni jimbandu ja manyinga, maji nange akamukwa atena kuxikina.
Mukudibhana ni maka ya, xinganeka mu kibhwidisu kiki:
Kyebhi kingitena kujimbulula kwa dotolo se mukonda dyahi ngixikina mba ngidituna o jimbandu ja manyinga?
NANGE SAYI MUTHU WIBHULA: “O kwila sayi maka mu kutambula o manyinga?”
Kyebhi kiweji tambwijila?
IHI IWADILONGO
Jihova wamesana kwila tudituna o manyinga mu maukexilu oso.
Kubhitulula
Mukonda dyahi o manyinga kima kikôla phala Jihova?
Kyebhi kitwejiya kwila o kitumu kya Nzambi kya lungu ni kudituna kudya o manyinga kya lungu we ni kutambula o manyinga?
Kyebhi ki utena kusola kyambote mu maka alungu ni ukexilu wakusaka ni manyinga?
TOKWESA DINGI
Ihi iwatokala kuxinganeka ande dya kuxikina o ukexilu wakusaka ni manyinga mé?
“Atangi Amadivulu Metu Ebhula” (O Mulangidi, 15 wa Kamusasadi wa 2000)
Ihi iwatokala kuxinganeka ande dya kuxikina kukusaka ni jimbandu ja manyinga?
“Atangi Amadivulu Metu Ebhula” (O Mulangidi, 15 wa Kanake wa 2004)
Ihi ya bhangesa dotolo kuxikina kwila o ukexilu wa Jihova wakutala o manyinga wene watokala?
“Ngaxikina o Ukexilu wa Jihova Kutala o Manyinga” (Despertai!, 8 de Dezembro de 2003)
Tala kyebhi o tufunga abhanga mbandu mu Kibuka Kikwatekesa o Jiphange mu Jinzo Jakusaka kyene mukwatekesa o jiphange.
b Tala o pondo ya katanu, “Ya Lungu ni Jimbandu Jamanyinga Ihi Ingatokala o Kusola?”; Kibandekesu kya 3, “Maukexilu Akusaka Alungu ni Manyinga”
c Sayi jidotolo amba kwila, o jimbandu jiwana jakatunda ja manyinga jene jimoxi ni jimbandu jofele ja manyinga. Mukonda dya kiki, eye watokala kwijiya ni kidi kyoso se o dotolo yé wejiya kwila eye kuxikina kutambula manyinga mba ndundula ya kusuka, ndundula ya zele, jiplaketa, ni plasma.