Sotenu o Mbanza Inangenena Kate Kuhadya ni Hadya

1. Ihi ya zwela Jezú kwila yeji bhita ni Jeluzaleme?

MU IZUWA ande dya Jezú kufwa, mwene wabhange kikanenu yadikumbidila mu veji ya dyanga kyoso kyabwika o tembulu ni mbanza ya Jeluzaleme. Mwene wabhana o kitendelesu kya kwila sayi kizuwa o mbanza ya Jeluzaleme exi ku i “kondoloka ku ifuxi ya masoladi.” (Luk. 21:20) Mwene wambe we ku maxibulu mê kwila kyoso kyamona o ima yiyi kubhita, atokalele kulenga ni lusolo lwoso. O izwelu yiyi yadikumbidila kyoso o kifuxi kya masoladi akwa Loma, akondoloka Jeluzaleme.—Luk. 21:​21, 22.

2. Ihi yambe Phawulu ku jikidistá atungile mu Jeluzaleme ni mu Judeya?

² Mivu kudima ande dya kifuxi kya masoladi akwa Loma kukondoloka Jeluzaleme, Poxolo Phawulu wasoneka kima dya beta kota lelu, twakejiya kala o divulu dya Jihebelewu. Mu divulu didi, Mwene wabhana itendelesu kujikidistá akwa Jeluzaleme ni akwa Judeya yeji kwa akwatekesa kudisokejeka mukonda dya ima yeji bhita. Ima yebhi yeji bhita? Phawulu wadimuna yalungu ni mbanza ya Jeluzaleme: “Etu bhabha kitwala ni mbanza inangenena maji twamusota ni hânji yoso o mbanza ya keza-ku.” (Jih. 13:14) Se o Jikidistá amesenene kubhuluka, ene atokalele kukala polondo phala kuxixa kudima o jinzo jâ ni mawenji mâ.

3. O mbanza yala ni madisesa makolo ilombolola ihi ni mukonda dyahi twatokala kusota o mbanza yiyi?

³ O Jikidistá asolo kuxisa Jeluzaleme ni Judeya nange exile mwa fundisa ni kwa a xongwena. Maji o ima yasolo ene yabhulula o mwenyu yá. Lelu we etu ene mu tufundisa mukonda kitwene mudyelela ku athu, kitwene mubanza kwila o kitadi kyene kitubhangesa kukala ni mwenyu wambote. Etu tusota “o mbanza yala ni madisesa makolo,” o “mbanza yoyo ya keza-ku” kifwa o utuminu wa Nzambi.a (Jih. 11:10; Mat. 6:33) Mukonda dyahi tubhanga kiki? Mukonda twejiya kwila kwakambe ngó bhofele o mundu yu anda ku ubwika. Mu milongi yiyi twanda mona se idifwa yebhi Phawulu waswinisa o jikidistá kwila atokala kukala nayu phala kusuluka mu kusota o utuminu wa Nzambi ni kudisokejeka phala o ima yanda bhita kuhadya. Twanda dilonga we se kyebhi o idifwa yiyi itena kutukwatekesa lelu.

DYELELA KWILA JIHOVA NUKA WANDA KUBWAZEKA

4. Mukonda dyahi o mbanza ya Jeluzaleme yexile ni valolo yavulu phala o Jikidistá?

⁴ O mbanza ya Jeluzaleme yexile ni valolo yavulu phala o jikidistá. O kilunga kyadyanga kya jikidistá kyexile ku mbanza yiyi ku muvu wa 33, o jiphange akwa kibuka kya Utuminu atungile we ku mbanza ya Jeluzaleme. Jikidistá javulu akexile ni inzo ni jimbote jakamukwa mu mbanza ya Jeluzaleme. Maji ne kiki Jezú wadimuna o akayedi’ê kwila atokalele kutunda ku Jeluzaleme ni mu ididi yoso ya Judeya.—Mat. 24:16.

5. Kyebhi Phawulu kyakwatekesa o jikidistá mukonda dya ima yeji bhita ku Jeluzaleme?

⁵ Phawulu wamesenene kwila o jikidistá akale polondo phala o ima yeji bhita. Mukonda dya kiki mwene wakwatekesa kumona o mbanza kala kyamono Jihova. Phawulu walembalala o jikidistá kwenyoko kwila o tembulu ni ima yakexile musatela o akunji amakota, ki yexile dingi kima kikola. (Jih. 8:13) Avulu mu Jeluzaleme aditunine o Mexiya, kyenyiki o athu kexile dingi mubheza Jihova mu tembulu. Mukonda dya kiki, o mbanza ni tembulu eji ku ibwika.—Luk. 13:​34, 35.

6. Mukonda dyahi o jikidistá abhindamene o kitendelesu kyabhele Phawulu mu divulu dya Jihebelewu 13:​5, 6?

⁶ Kyoso Phawulu kyasoneka o mukanda kwa akwa Jihebelewu, o mbanza yiyi yexile ni umvwama wavulu. Sayi musoneki mukwa Loma wambe kwila Jeluzaleme “yexile o mbanza yafumanene dingi mu kukala ni umvwama”. O Jijudé atungile mu ididi yavulu, exile mubhanga njila mivu yoso phala kuya mu Jeluzaleme kubhanga jifesa, mukonda dya kiki o mbanza yiyi yexile ni umvwama wavulu. Kidi kwila jikidistá javulu exile we mukatula mbote mu umvwama yu. Nange o kima kiki kyene kyabhangesa Phawulu kuzwela: “Ki muzole o kitadi maji sangulukenu ni ima i mwala nayu.” Mwene walembalesa we o jikidistá yalungu ni kikanenu kyabhangele Jihova: “Eme nuka nganda kuxisa, ki nganda kubwazeka we, kana.” (Tanga Jihebelewu 13:​5, 6; Mate. 31:6; Jisá. 118:6) O jikidistá atungile ku Jeluzaleme ni ku Judeya, abhindamene mwene o kikanenu kiki. Mukonda dyahi? Mukonda kyoso kyatambula o mukanda yu, ene eji xisa kudima o ima yâ yoso kala o jinzo jâ, o mawenji mâ ni jimbote jâ joso. Kiki kyeji bhonza kyavulu.

7. Mukonda dyahi twatokala kudyelela kwa Jihova kindala?

⁷ Disá phala etu: Kwakambe ngó twanda mona o disukilu dya mundu yu ku “hadi yadikota”. (Mat. 24:21) Kala o jikidistá mu Jeluzaleme, etu twatokala kukala ku mesu azele ni kukala polondo. (Luk. 21:​34-36) Nange ku hadi yadikota twanda bhinga kuxisa ima mba o jimbote jetu joso ni kudyelela kwila Jihova nuka wanda tubwazeka. Kyenyiki ande dya hadi yadikota kumateka, tutena kya kumona se twamudyelela kwa nanyi. Dibhwidise: ‘O kwila o ima i ngisola yalungu ni hadya, ilondekesa kwila ngadyelela mu kitadi inga kwa Nzambi wakanena ku ngilanga?’ (1 Ti. 6:17) O phangu ya jikidistá mu ukulu, itena kutukwatekesa kusuluka fiyele. Maji kitutena kusokesa o ibhidi yadibhana nayu ni ibhidi itwanda dibhana nayu ku hadi yadikota. Kyebhi ki twanda kwijiya o ima itwatokala kubhanga ku hadi yadikota?

BELESELA YO ALA KU PHOLO

8. Jezú wambe ku maxibulu mê phala kubhanga ihi?

⁸ Kyoso o akwa Jihebelewu kyatambula o mukanda, mu kubhita tumivu o jikidistá amono o masoladi akwa Loma kukondoloka Jeluzaleme. Kiki kyexile o kijimbwete phala ene kulenga mukonda o mbanza eji ku ibwika. (Mat. 24:3; Luk. 21:​20, 24) Maji eji lengela kwebhi? Jezú wazwelele kiki: “Oso akala mu Judeya amateke kulengela ku milundu.” (Luk. 21:21) Maji mu mbanza yiyi mwexile milundu yavulu. Kyenyiki ene atokalele kulengela ku mulundu webhi?

9. Mukonda dyahi kwabhonzele kyavulu phala o jikidistá kusola se kwebhi kweji lengela? (Tala o mapa.)

⁹ Talesa o ididi kweji tena kulengela-mu o jikidistá: Ku milundu ya Samadiya, ku milundu ya Ngalileya, ku milundu ya Helemone, ku milundu ya Libanu ni yoyo yakexile ku sambwa dya Njolodá. (Tala o mapa.) Sayi jimbanza jexile mu milundu yiyi yedile kala ididi ya kondama. Mu kifika o mbanza ya Gamla yexile mu milundu yalebhele kyavulu— kwabhonzele kyavulu kubhixila-ku! Sayi Jijudé afikile kwila o mbanza yiyi yexile kididi kyambote phala kulengela-mu. Maji o akwa Loma akondoloka o mbanza ya Gamla ya a ibwika, athu avulu atungile-mu afu.b

10-11. (a) Kyebhi Jihova kyendesa o jikidistá? (Jih. 13:​7, 17) (b) Mukonda dyahi o jikidistá abhange kyambote mu kubelesela o mayala akexile kupholo? (Tala we ofoto.)

¹⁰ Nange Jihova wendesa o jikidistá bhukaxi ka yo exile kupholo mu kilunga. Sayi mukwa musoso amwixana Eusébio ku pholo dya kwenda wambe kwila: “Mu kithangana kyenyokyo Nzambi watangela o jiphange mu Jeluzaleme kwila o jikidistá atokalele . . . kutunda mu Jeluzaleme ni kuya mu mbanza ya Pela mu kibatu kya Peleya.” O mbanza yiyi yexile kididi kyakondama phala o jikidistá. Pela ki yexile dikanga dya Jeluzaleme, mu kiki ki kwabhonzele kubhixila-ku. Ku mbandu yengi avulu atungile mu mbanza yiyi kexile Jijudé. Ene kamesenene kubhânga ni akwa Loma.—Tala o mapa.

¹¹ O jikidistá alengele ku milundu akayele o kitendelesu kya Phawulu kya ‘kubelesela o mayala akexile kupholo mu kilunga’. (Tanga Jihebelewu 13:​7, 17.) Ene atena kubhulula o mwenyu wa mukonda dya kubelesela! O musoso ulondekesa kwila Nzambi ka bwazeka yo exile mukingila “o mbanza yala ni madisesa makolo”—o Utuminu wa Nzambi.—Jih. 11:10.

12-13. Kyebhi Jihova kyene mukwendesa o mundu wé mu ithangana ya bhonzo?

¹² Disá phala etu: Jihova utubhana itendelesu bhukaxi ka mayala ala kupholo mu kilunga. Mu Bibidya tusanga mu misoso yavulu ilondekesa kyebhi Jihova kyendesa o mundu wé bhukaxi kamayala a fiyele mu ithangana yabhonzo. (Mate. 31:23; Jisá. 77:20) Lelu we twejiya kwila Jihova wene mukwendesa o mundu wê bhukaxi ka mayala ala kupholo mu kilunga.

¹³ Mukifika kyoso kyamateka o uhaxi wa COVID-19 “o jiphange ala kupholo” atubhana itendelesu. O tufunga atambula itendelesu phala kulanga o ibhindamu ya jiphange mu nzumbi. Kyoso kyamateka o uhaxi, mukubhita tu ithangana twexile ni kyonge kyadikota. O kyonge kiki kyabhiti bhukaxi ka internete, mu mitelembe ya izuzumbiya ni mu mitelembe ya ifofo mu 500 a madimi. Twasuluka mu kutambula kudya kwavulu mu nzumbi. Mukonda dya kiki o henda yetu mudyetu yadibandekesa dingi. Twadyelela kwila kibhidi kyoso-kyoso kitwanda dibhana nakyu ku hadya, Jihova wanda suluka mu kukwatekesa o mayala ala ku pholo mu kilunga kusola o ima itwatokala kubhanga. Twatokala kudyelela kwa Jihova ni kubelesela o itumu yê. Maji idifwa yebhi dingi yanda tukwatekesa kudisokejeka kindala phala o hadi yadikota ni kusola ni unjimu mu kithangana kyenyokyo?

SULUKENU MU KUDIZOLA NI JIPHANGE NI KUZALELA O ASONYI

14. Idifwa yebhi yatokalele kulondekesa o jikidistá ande dya kibwikilu kya mbanza ya Jeluzaleme? (Jihebelewu 13:​1-3)

¹⁴ Kwakambe ngo twanda bhinga kulondekesa dingi henda kwa akwetu mu ukulu ndenge. O kima kyanda tukwatekesa o kukayela o phangu ya jikidistá atungile mu Jeluzaleme ni mu Judeya. Ene akexile kya mudilondekesa henda mudya. (Jih. 10:​32-34) Maji mivu ande dya kubwika o mbanza ya Jeluzaleme o jiphange abhindamene ‘kudilondekesa dingi henda’ ni “kuzalela o asonyi” mu ukulu ndenge.c (Tanga Jihebelewu 13:​1-3.) Mu kithangana kya hadi yadikota, twandabhindamena we kubhanga kiki.

15. Mukonda dyahi o jikidistá abhingile kudilondekesa henda ni ukexilu wa kubhana kyoso kyalenge?

¹⁵ Kyoso o kifuxi kya masoladi akwa Loma kya kondoloka Jeluzaleme, sé kulaleka ene axisa Jeluzaleme. O jikidistá alenge, maji sé kwambata ima yavulu. (Mat. 24:​17, 18) Kyoso kyayi mutunga ku milundu, o jiphange abhindamene kudikwatekesa mudya. Sé phata o jiphange abhindamene kudya, izwatu ni kididi phala kuzekela-mu. O jiphange abhingile kulondekesa o henda ya kidi ni ukexilu wa kuzalela.—Tit. 3:14.

16. Kyebhi ki tutena kulondekesa o henda yetu ku jiphange abhindamena kikwatekesu? (Tala we ofoto.)

¹⁶ Disá phala etu: O henda ituswinisa kukwatekesa o jiselevende ja Jihova kyoso kyabhindamena kikwatekesu. Mu kifika, mu izuwa yetu jiphange javulu ene mulengela mu jixi jengi mukonda dya ita ni mavuwa. Maji jiphange javulu ku mundu woso ene mudibhakula phala kukwatekesa kikale mu nzumbi mba mu xitu. Phange umoxi wa muhatu mu Ucrânia wabhingile kulenga ku jixi jengi mukonda dya ita wambe: “Etu twamono o lukwaku lwa Jihova kutwendesa ni ku tukwatekesa bhukaxi ka jiphange. Ene atutambula kyambote ya atukwatekesa kyavulu ku Ucrânia, ku Hungria kindala, kuku ku Alemanha.” O yo ala ni ukexilu wa kuzalela ni kukwatekesa o jiphange jâ, edi kala jifalamenda ku maku a Jihova.—Jisa. 19:17; 2 Ko. 1:​3, 4. 

17. Mukonda dyahi kima kyambote kulondekesa henda ku jiphange kindala, ni kukala ni ukexilu wa kuzalela?

¹⁷ Kidi kwila twene mukwatekesa o jiphange jetu. Maji ku hadya twanda bhindamena dingi kwa akwatekesa mu ukulu ndenge. (Haba. 3:​16-18) Jihova wamutulonga kindala kudizola mu dyetu ni kukala ni ukexilu wa kuzalela. O idifwa yiyi twanda ibhindamena kyavulu mu kithangana kya hadi yadikota.

IHI YANDA BHITA KU HADYA?

18. Kyebhi ki tutena ku kayela o phangu ya jikidistá alenge ku Jeluzaleme?

¹⁸ O musoso ulondekesa kwila o jikidistá alengele mu milundu atena kubhuluka mu kibwikilu kya mbanza ya Jeluzaleme. Ene abhingile kuxisa o mbanza, maji Jihova nuka wa abwazeka. Kyebhi kitutena ku kayela o phangu yâ? Etu kitwejiya o ima yoso yanda bhita ku hadya. Maji Jezú watudimuna phala tukale polondo phala kubelesela. (Luk. 12:40) Tutena we kuxinganeka mu ima yasoneka Phawulu kwa akwa Jihebelewu. O itendelesu yê yala ni valolo yavulu lelu kala kyexile nayu mu ukulu. Ku mbandu yengi tutena kudyelela mu kikanenu kya Jihova kya kwila mwene nuka wanda tubwazeka. (Jih. 13:​5, 6) Kyenyiki twamesena kusuluka mu kusota o mbanza yanda nangenena kate kuhadya ni hadya—o Utuminu wa Nzambi. Kyenyiki twanda tambula mabesá avulu.—Mat. 25:34.