Самуйел Ве Йәке Дькьр Чь кӧ Рʹаст бу

Самуйеле щаһьл коне Хԝәдеда дьжит у дьхәбьти. Кон әԝ щи бу, кʹидәре мәрьв дьһатьн, ԝәки Йаһоԝа бьһʹәбиньн. Ле тӧ зани Самуйел ча һатә коне? Ԝәре әм пешийе дәрһәԛа дийа Самуйел, Һаннайе пебьһʹәсьн.

Гәләк ԝәхт Һаннайе нькарьбу зарʹ бьанийа. Ле әԝе гәләк дьхԝәст кӧ зарʹәкә ԝе һәбә, ләма жи әԝе Йаһоԝарʹа дәрһәԛа ве йәке дӧа дькьр у лавайа ԝи дькьр, ԝәки али ԝе бькә. Һаннайе соз да, кӧ һәрге кӧрʹәк жерʹа бьбә, әԝе ԝи бьшинә кон, сәва кӧ әԝ ԝедәре бьжи у хьзмәт кә. Йаһоԝа щаба дӧайе ԝе да, у әԝе кӧрʹәк ани. Һаннайе наве ԝи дани Самуйел. Чахе Самуйел се-чар сали бу, Һаннайе кӧрʹе хԝә һьлда у бьрә кон, сәва кӧ әԝ ԝедәре Хԝәдерʹа хьзмәт кә, чаԝа кӧ әԝе соз дабу.

Әли конда кʹаһине мәзьн бу. Һәр дӧ кӧрʹед ԝи жи, конда хьзмәт дькьрьн. Бьра бира тәда бә, ԝәки кон мала Хԝәде бу бона һʹәбандьне. У мәрьв дьһатьнә кон, сәва кӧ тьштед баш бькьн. Ле кӧрʹед Әли тьштед гәләк хьраб дькьрьн. Самуйел дьдит ԝәки кӧрʹед ԝи чь дькьрьн. Ле гәло Самуйел жи мина кӧрʹед Әли тьштед хьраб дькьр?— На. Самуйел хԝә ль рʹастийе дьгьрт у һʹәму тьшт ӧса дькьр, чаԝа кӧ де-баве ԝи, әԝ һин кьрьн.

Ча тӧ дьфькьри, чахе Әли дьдит ԝәки кӧрʹед ԝи хьрабийе дькьн, әԝи гәрәке чь бькьра?— Әли гәрәке әԝана щәза кьрана. Хенщи ве йәке, әԝи гәрәке ида изьн нәда ԝан кӧ мала Хԝәдеда хьзмәт кьрана. Ле Әли ӧса нәкьр. Ләма жи Йаһоԝа гәләк сәр ԝи, у һәр дӧ кӧрʹед ԝи һерс кʹәт. Йаһоԝа сафи кьр, кӧ ԝана щәза кә.

Шәвәке гава Самуйел рʹаза бу, әԝи дәнгәк бьһист кӧ гази ԝи дькьр: «Самуйел!» Һьнге әԝ рʹадьбә у дьрʹәвә щәм Әли, ле Әли дьбежә: «Мьн гази тә нәкьрийә». Әв йәк дӧ щара зедәтьр ԛәԝьми. Щара сьсийа, Әли готә Самуйел, кӧ һәрге әԝ диса щарәке ԝи дәнги бьбьһе, гәрәке ӧса бежә: «Кʹәрәм кә Йаһоԝа, бежә; әз тә дьбьһем». Самуйел һәма ӧса жи кьр. Паше Йаһоԝа готә Самуйел: «Бежә Әли кӧ әзе малбәта ԝи щәза кьм, бона ԝан һʹәму тьштед хьраб, кӧ ԝана кьрийә». Тӧ ча дьфькьри, Самуйелрʹа һеса бу ве йәке Әлирʹа бежә?— На, әв йәк һеса нибу. Рʹаст ә Самуйел тьрсийа, ле йәкә әԝи һʹәму тьшт ӧса кьр, чаԝа кӧ Йаһоԝа ԝирʹа готьбу. Чь кӧ Йаһоԝа готьбу, һатә сери. Һәр дӧ кӧрʹед Әли һатьнә кӧштьне, у Әли жи мьр.

Самуйел мәсәләкә гәләк баш ә сәва мә. Рʹаст ә Самуйел дьдит кӧ мәрьвед дьн тьштед хьраб дькьрьн, ле йәкә әԝи тьштед рʹаст дькьр. Ле һәла дәрһәԛа хԝә бьфькьрә. Тӧйе бьби мина Самуйел у хԝә мина ԝи ль рʹастийе бьгьри? Һәрге тӧ ӧса бьки, тӧйе дьле Йаһоԝа у дьле де-баве хԝә ша ки.